Uulingilingi tawu kondjithwa nawa

EHANGANO lya Roads Authority opamwe nOkomissi Yokukondjitha iilonga yuulingilingi oya shaina euvathano opo ya kondjithe iilonga yuulingilingi.

Euvathano ndika otali pitike opo Okomissi yo ACC yi vule okukala tayi yi mookompiuta dha Road Authority pwaana engambeko. Omuwiliki gwa ACC, Paulus Noa okwa ti euvathano ndika ota li koleke ekwatathano ewanawa ndyoka lilipo nale pokati komalutu ngaka gaali. Noa okwa ti euvathano otali eta, opo omalutu ngaka ga vule okulongela kumwe mokukondjitha uulingilingi noshowo iilonga yokukengelela.Noa okwa ti euvathano otali pitike Okomissi opo yi kale tayi vulu okulandula uuyelele mboka wa pungulwa mookompiuta dha RA, na otayi ka kwathela okomisi opo yi endeleleke omakonakono momafekelo guulingilingi ngaashi meshangitho lyiiyenditho, nomegandjo lyoombapila dhokuhinga, uuna iiningwanima yatya ngaaka ya lopotelwa okomisi. Pahapu dha Noa euvathano ota li kakwathela woo Roads Authority opo a vule okuninga omakonakono gemwene molwaashoka ota vulu okumona uuyelele okuza koACC. Noa okwa ti opo uulingilingi wu hulithwepo moshilongo nenge wushonopekwe, omalutu kehe nenge omahangano agehe moshilongo oga pumbwa okukala gena omilandu dhili nawa nodhina uuyuki. Omuwiliki gwokulipo gwa Roads Authority, Conrad Lutombi okwa ti omolwiilonga mbyoka ehangano lye hali longo, omalupita ndika olya taalelwa keshongo lyoshinima shuulingilingi. Okuyanda shika nokushi keelela ehangano olya tula miilonga omilandu dhokukondjitha uulingilingi mboka, olya li woo lya tulapo ongodhi ndjoka taku dhengelwa meendelelo ngele opena omuntu a mono iilonga iiwinayi tayi longwa. Lutombi okwa tsikile a ti euvathano ndika olyo onkatu yomukumo oku keelela uulingilingi, ekengelelo noshowo okwaana uuyuki miilonga.