Uukumwe woompilameno konyala wa dhimi

ETOPOKO olya holoka muukumwe woongundu dhompilameno, ndhoka dha li tadhi kondjitha iizemo yomahogololo gomumvo gwayi.
Oongundu omugoyi odha li dha fala Okommissi Yomahogololo ya Namibia kompangu yopombanda na odha li dha hala iizemo yomahogololo yi ekelwehi nenge Ompangu yi gandje elombwelo kutya iizemo yomahogololo na yi yalululwe.

Oongundu ndhika dhoompilameno oshiwike shika odha kala nokugongala dhi tokole ngele otadhi tumu aahogololwa yadho ya ka ganithilwe iilonga mo parliamende nena[Etitano], nenge otaya kala inaa ya ganithilwa iilonga yawo, omanga ya tegelela iizemo yOmpangu Onene kombinga yeindilo lyawo .Oshipotha shawo osha li sha ekelwahi mompangu Yopombanda, na oongundu odha li dha lombwelwa dhifute iimaliwa yoohahende dhoKommissi yomahogololo noshowo iimaliwa yoohahende dhoSwapo.Aapanguli yaali mboka ya li ya pulakene oshipotha shika oye shi ekelehi ya kankamena komatompelo gopautechnika, ndele yo inaya pitka okupulakena oshikalimo sheindilo ndika .Ongundu yo RDP oyo ayike ya ti itayi pitika aakalelipo yawo ya ganithilwe iilonga metitano.RDP okwa tokola kutya iilyo yongundu ndjika itayi ganithilwa iilonga yawo ,manga pwa tegelelwa etokolo lyOmpangu Onene yoshilongo, meindilo ndika oongundu odha hala ompangu opo yi pulakene oshipotha shika pashikalimo shasho. Pamahogololo ga Novemba 2009 ongundu yo RDP oyo ta yi ningi ongundu yompilameno yopambelewa.Omunambelewa gwomauyelele gwo RDP, Jeremia Nambinga okwa ti ongundu ye oya thikama metokolo lyayo kutya itayi kala po peganitho lyiilyo yoparliamende metitano, osho a lombwele o The Namibian.Amushangandjayi gwo RDP ,Jesaya Nyamu naye okwa koleke kutya etokolo lyongundu ye ina li lunduluka, naahogololwa yongundu ye itaya ka ganithilwa oshilonga.’Otwa hala okumona oompangu tadhi longo oshilonga shadho shuudhapo, na otwa hala okumona uuyuki tawu longwa,’osho a ti, ta gwedha ko kutya RDP ina hala okupiyaganeka aantu ngele iilyo ye oya ganithilwa oshilonga.Otashi vulika oshigwana shi taambeko shika ongo oRDP ta yi taambako iizemo yomahogololo, omanga Ompangu Onene inaa yi gandja etokolo lyawo keindilo lyoongundu ndhika.Kape shiwike kutya uunake Ompangu onene ta yi pulakene oshipotha shika.Opena omipopyo kutya aniwa omuna ,etopoko moongundu ndhika omugoyi kombinga yeganithilo miilonga metitano, naashika osha ningi oshidhigu koongundu ndhika okutokola kutya nadhi ninge shike.Omathimbo ngaka osha kala oshidhigu okumona okomenda okuza koongundu ndhika oshoka aawiliki yadho kaya li taya yamukula oongodhi dhawo.Omuperesidende gwo RP, Henk Mudge okwa tindi okutya sha. Omuwiliki gumwe gwa APP okwa ti yo otaya ka ganithilwa moshilonga. RP naye okwa ti yo otaya ka ganithilwa moshilonga.Pahapu dhiilyo yimwe yoongundu ndhika oohahende dhawo odhe ya pe omayele kutya naya shangele komupopi gwoshigongi shopashigwana kutya yo otaya ganithwa pakulipo omanga ya tegelela iizemo yetokolo lyOmpangu Onene. Omuperesidende gwo DTA, Katuutire Kaura okwa ti aakalelipo yongundu ye otaya ka ganithilwa oshilonga ndele itashi ti yo oya etha po oshipoptha shika mompangu. Okwa ti oohahende odhe ya pe omayele kutya oshinakugwanithwa shawo okuganithilwa miilonga ongo aatotimpango pamautho gekotampango.Kaura okwa tile omanga ompangu onene inaa yi gandja etokolo nena, ekotampango olyo li na oonkondo mwaashika ongo ompango onene yoshilongo.