Uudhano wekopi lyo The Namibian wa tseyithwa

UUDHANO wekopi lyoshifo sho The Namibian owa tseyithwa pambelewa moVenduka omaandaha. Uudhano mbuka otawu ka dhanenwa koshitopolwa sha Karas moKaiti mehuliloshiwike lyopaasa, okuza omasiku ga hamano sigo omugoyi gApilili nuumvo.

Ngoloneya gwa Karas ngoka a li petseyitho lyuudhano mbuka okwa ti omalongekidho agehe oga manithwa poshilando shoka , nokwiitaala kutya uudhano mbuka otawu ka kala wumwe mboka itaawu ka dhimbiwa. Bernardus Swartbooi okwa ti okomitiye yokulongekidha uudhano mboka yomoshitopolwa oya longitha konyala oodola omiliona okwoopaleka iipumbiwa noshowo omahala, okusoshimpwiyu kutya mbuka oweenda nawa.Swartbooi okwa endulula kutya oshitopolwa she oshi ilongekidha nawa oku taamba aayenda ayehe mboka taya ka kuthombinga muudhano mboka. Okwa popi nomukumo, nonando okwa ti opwa li omalimbililo ngele oshitopolwa shoka otashi keshipondola okulongekidha ashihe omanga ethimbo lyuudhano inaali thika. Okwa ti oya longitha shivulithe poodola omiliona 1,2 okwiilongekidhila uudhano mboka wekopi lyo The Namibian Newspaper cup olundji lya talikako ongo ekopi lyuuyuni kaagundjuka aadhanitanga ya Namibia. Ekopi ndika ohali dhanenwa koospana dha kalelapo iitopolwa ayihe 13 yoshilongo ashihe. Ospana yokOshikoto oyo tayi egulula uudhano naandjoka yokoKaras, tadhi landulwa kwaandhoka dhokOkavango na Caprivi, ko kuye ospan yokOhangwena na Hardap ta ku landula Otjozondjupa nOshana oshowo Omusati nOmaheke, omanga uudhano wesiku lyotanga inaawu ka hulithwa koospana yokErongo ta yi dhana noKunene.