Uudhano wEkopi lya Metropolitna kOosikola ongula mOlyomakaya

UUDHANO wEkondjelo lyEkopi lyEhangano Ekwashilipaleki Metropolitana, hau ithanwa Metropolitan Namibia Summer Cup, hau dhanwa kOosikola dhopevi moNooli(Oshana), Omusati, Oshikoto nOhangwena) wonuumvo owa thinda) nee pehulilo, nomOlyomakaya (03.10.2009) Oosipana ne (4) dhetanga lyokoompadhi nOosipana ne dhEtanga lyomoshimbamba, otadhi ka pwakela mOshakati opo ku talike ndjoka yetanga lyokoompadhi naandjoka yetanga lyomoshimbamba tayi ka dhenga mo oonkwawo nokukapewa oshishani ku Metropolitan.

Oosipana, dhetanga lyokoompadhi, ndhoka dha thika kedhingoloko lya hugunina lyuudhano mbuka odho nee Uukumwe Combined School, Okatana Combined School, Oshikango Combined School na Pendukeni Iivula-Ithana Combined School. Osipana ya Metropolitana oyi li mo ya manguluka. Ndhoka dhetanga lyomoshimbamba odho Onyuulaye Combined School, Okatana Combined School, Pendukeni Iivula-Ithana Combined School nOmuve Combined School.Pethimbo lyoshiithanene shodroo, sha ningilwa pOkapale kOmaudhano ka Shakati, mEtitatu lyoshiwike shika, sha ningwa mewiliko lyOmukuluntu gwOpashitopolwa gwa Metropolitana, tate, Elifas Oupapa Shipanga, osha zi mo ngeyi kutya kEtanga lyokOompadhi, Uukumwe otau dhana nOkatana nOshikango otashi dhana na Pendukeni Iivula-Ithana, omanga ndjoka lyomoshimbamba, ano lyaakadhona,Onyuulaye tayi dhana nOkatana, na Pendukeni Iivula-Ithana ta dhana nOmuve.Omusamane Shipanga ta ti, ngoka e ya omutango paShitopolwa mEtanga lyokoompadhi ota mono OoN$700, omutiyali OoN$500 nomutitatu OoN$300.Mokati nee kOosipana ndhoka tadhi dhana ngula mOlyomakaya, ano ndhoka dhe ya lela kedhingoloko lya hugunina, ngoka teya tango metanga lyokoompadhi ota pewa OoN$8000, Ekopi lyeyugathano, Oomedalia dhoshingoli niikwatanga lyokoompadhi, Omutiyali ota pewa OoN$4000, Oomedalia dhoshisiliveli, niikwatanga lyokoompadhi, omutitatu ota pewa OoN$2000, Oomedalia dhoshikushu niikwatanga lyokoompadhi naangoka te ya omutine ota pewa OoN$1000 niikwatanga lyokoompadhi.Kombinga yEtanga lyomoshimbamba, ano lyaakadhona, pashitopolwa ngoka e ya tango ota pewa OoN$500, Omutiyali OoN$300 nomutitatu OoN$200. Mboka yetanga lyomoshimbamba ye ya kedhingoloko lya hugunina, taya dhana ngula mOlyomakaya, gwotango otaka pewa OoN$4000, iikwatanga lyomoshimbamba, Ekopi lyeyugathano nOomedalia dhOshingoli, omutiyali ota pewa OoN$2000, iikwatanga lyomoshimbamba nOomedalia dhoshisiliveli, omutitatu otaka pewa OoN$1000 nOomedalia dhoshikushu nomutine otaka pewa OoN$500. Uudhano mbuka, omusamane Shipanga okwa ti kutya, otau ka egululwa pambelewa ku Gavena yOshitopolwa sha Shana omusamane Klemens Kashuupulwa, ngula, ongula mOkapale kOmaudhano okanene ka Shakati. Omusamane Shipanga ngoka a pandula noonkondo Oosikola adhihe ndhoka dha kutha ombinga muudhano mbuka, noshowo Aakuluntusikola, aalongisikola, aalongekidhi ayehe yuudhano mbuka, Uuministeli wElongo nowOmaudhano nAanambelewa yOmaudhano, Oshikondo shokulongekidha omaudhano mu Metropolitna mewiliko lyOmunambelewa tate Opeipawa Shiyagaya noshowo Iikundaneki, okwa ti kutya Ehangano lyawo lya Metropolitan olya tokola okukwathela oshigwana, unene tuu shoka shokomongula, ngele tashi ya komaudhano nosho tuu. Ta ningi ehiyo enene e li ukitha moshigwana moka, unene tuu shoka shomOshakati nomomudhingoloko, shi ye momangungo shi tale nkene aanasikola mbaka taye shi enditha nawa muudhano mbuka. Omusamane Shipanga ta ti, omuntu ito futu sha okuya mokapale. Otapu ka kala wo omainyanyudho mpaka naampeyaka.