Uudhano wa N.S. Plumbing omehuliloshiwike twa thinda

OMUUNGANEKI gwUudhano wa kwashilipalekwa kuKapuka noshowo mboka wa kwashilipalekwa ku N.S. Plumbing Services cc, tate Sammy Mushelenga, okwa kolekulula kutya uudhano wetanga lyokoompadhi waamati ye li kohi yoomvula 13, mboka wa kala tau popiwa tau ka kala ko mehuliloshiwike twa thinda lyeti 6 sigo 7 Juni 2009 pOseko yOpombanda ya Ponhofi pOhangwena moshitopolwa sha Hangwena, onkee oko wu li.

Kakele kuudhano mbuka waamatyona yoomvula dhi li kohi yoomvula 13, mehuliloshiwike ndyoka, unene mOlyomakaya geti 7 Juni 2009, otaku ka kala wo uudhano wethigathanopo mondapo waagundjuka mwa kwatelwa naamboka womakuwagakanale (Oukroksa), wa kwashilipalekwa ku Kaansela gwOshikandjohogololo sha Ngela tate Nghidipohamba Ndilula, ano kEhangano lye lyomaudhano ngaka, hali ithanwa Ndilula Marathon Sport Club. Omakuwagakanale nago oge na wo uudhano wEtanga lyokoompadhi.Okapandi hoka taka kondjelwa kwaamboka yoomvula dhi li kohi yoomvula 13 okethike pOoN$3000 nEkopi, omanga hoka taka kondjelwa koonakudhana aakulu yetanga lyokoompadhi kethike pOoN$5000 nEkopi.Oosipana tadhi kutha ombinga otadhi futu kehe yimwe N$200. Osipana ndjoka tayi ya yotango otayi ka pewa N$1500, ontiyali N$1000 nontintatu N$500.Shi na sha nee nethigathanopo mondapo, ano muudhano wOatletika, Mushelenga ota ti kutya uudhano mbuka otau ka tameka ongula onene yOlyomakaya ngaka twa thinda, aamatuki yoshinano oshile taya ka matuka okuza kOhaingu ya thinda kOkapale kOmaudhano koseko yOpombanda ya Ponhofi pOhangwena.Mushelenga ta yelitha nawa ta ti, aamati naakadhona aagundjuka mboka haya matuka oshinano oshile otaya kamatuka okuza kOhaingu sigo okOkapale komaudhano ka Ponhofi.Aanona mboka taya ka kutha ombinga otaya ka matuka okuza lwopOshipangelo sha Ngela sigo opOkapale komaudhano kopOseko ya Ponhofi, omanga aakuluntu, ano omakuyagakanale, gootate Kaansela Nghidipohamba Ndilula nootate Gerson Nghilundilua noyaakwawo yalwe oyendji taya ka tameka pondalaye yopOmafo okuza kEngela sigo opOkapale kOmaudhano kopOseko yopombanda ya Ponhofi.Mushelenga ota indile kOosipana ndhoka dha hala okukutha ombinga momaudhano ngaka dhi inyolithe manga ku na ethimbo ye ta indile koshigwana shi ye shi yambidhidhe Oosipana dhadho nokundjangeka ngeyi uudhano mbuka. Ta indile koshigwana, unene tuu shoka oshinangeshefa shi yambidhidhe omaudhano mokati koshigwana, unene tuu shoka oshigundjuka. Mushelenga ta kolekulula wo kutya Uudhano wa Kapuka onkee ngaa wu li ko mehuliloshiwike lyeti 19 Juni 2009 sigo eti 21 Juni 2009 pOseko yopombanda tuu ndjoka ya Ponhofi pOhangwena ngashi sha kala sha thanekwa.