Uudhano wa Kapuka ota wu kala ko mehuliloshiwike ndika moshitopolwa Ohangwena

OMUWILIKI gwuudhano woKapuka mboka hau kala ko omumvo kehe moshitopolwa sha Hangwena, Sammy Mushelenga, okwa tseyitha kutya uudhano mbuka wu holike nawa nuumvo otau kala ko mehuliloshiwike ndika okuza meti 22 sigo ometi 24 Juni 2012, tau ka dhanenwa mokapale kOseko yopombanda ya Ponhofi noshowo pokapale komaudhano ka Namundjebo pOmafo mo Helao Nafidi.

Mushelenga oye omukwatelikomeho gwuudhano mbuka wa Kapuka sho wa holoka po momumvo 1996 omanga omunangeshefa, Gerson Kapuka Nghilundilwa oye omweetipo gwawo.Petameko uuudhano mbuka owa tamekelwe waanasikola ashike, ihe ngaashingeyi owa kwatela mo wo noosipana dhaakuluntu pondje yoosikola. Wa kwatela mo nee ngashi etanga lyokoompadhi, ovolley, obasketa, ndyoka lyomoshimbamba lyaakadhona, lyokoompadhi lyaakadhona, aadhani aakulu, omanyakwa noshowo ethigathanopo lyokakadhona okawanawa dhingi ka Kapuka. Ethigathanopo lye tanga lyokoompadhi olyaa nasikola ashike.Okapandi akehe kumwe koodola dha Namibia N$2500 otaka ka kondjelwa. Oonakusindana otaya ka pewa oshimaliwa noshowo omakopi noomedalia. Osipana ndjoka tayi ya yotango, otayi ka pewa OoN$1500. Ontiyali otayi ka pewa ooN$1000 nontintatu otayi ka pewa ooN$500. Mushelenga okwa ti kutya aanangeshefa oyendji oya gandja po sha shokweenditha nawa uudhano mbuka mehuliloshiwike twa thinda. Ta ti kutya ya gandja okapandi koodola dha Namibia omilongohamano (N$60,000). Oosipana ndhoka tadhi dhana otadhi ka hogololwa nokutulwa pomahala gadho meti 21 Juni 2012, tashi ka ningilwa moshinyanga shOseko yOpombanda ya Ponhofi pOhangwena.Ongeshefa Paradise cc no Kick-Off Bar dhomo, Helao Nafidi moshitopolwa sha Hangwena nadho odha yambidhidha uudhano wa Kapuka naashoka ye na po omathimbo ga zi ko. Mwene gwo Kick-Off Bar, Peter Bonga Nghede okwa pe Kapuka ooN$1000 omanga, Martin Shingondjo gwo Paradise cc pOhangwena, ngoka ha yambidhidha shito Kapuka nguka, a gandja ooN$400. Oshimaliwa shika osha pewa, gumwe gwomaawiliki yuudhano mbuka Bonifatius Ndakolute.OoNghede na Shingondjo oya ti ota ya yambidhidha Kapuka muudhano we mbuka molwashoka oya hala okuyambulapo uudhano moshitopolwa sha Hangwena, noya hala wo okugandja sha moshigwana. Mushelenga ota indile koshigwana ashihe mOhangwena shi ye shi tale uudhano mbuka.