Unam ta tungu omihandjo

E
TUNGO lyomihandjo omipe dhongushu yoodola oomiliona 160 po Univesiti yaNamibia ota li ka tameka mbala. Shika otashi ka ningwa konima sho Ominista Yelongo, omundohotola Abraham Iyambo a ningi etameko lyomukanka mpoka ta tungwa omatungo ngoka mEtitatu moshilandopangelo. Omatungo gomihandjo tadhi ka gandja olukalwa kaalongwa omathele 800 ota ga ka dhikwa pehala lyenongelo ndika lya kunkula nepandaanda lya Hendrik Witbooi muumbugantu woshilando, momukunda gwa Pionierspark.

Pethimbo ndika omuhandjo ngoka gu lipo gwoshiputudhilo shika oshinene sha Namibia oha gu edhilile ashike aanasikola ye li lwopeyovi limwe nasha okuza maalongwa yeli omayovi 10 000 mboka yiishangitha nenongelo ndika. Omwaalu ngoka gwa hupako oha gu zi komagumbo gaakuluntu yawo moshilando, omanga mboka aakuluntu yawo yaashi aaVenduka oya edhililwa momagumbo moka haya futu omilalo dhawo nopomathimbo gamwe ota ku tiwa mbaka oya edhililwa moonkalo dhothina. Okondalaka ndjika oya pewa ehangano lyAaludhe ya nkondopekwa lya Namibia pamwe nalimwe lyoko South Africa. Ehangano lyaankondopekwa lya Namibia oli na aaniipambuliko yatatu aanene miilonga yepangelo.Mbaka oyo oya kwatelamo, Ndeutala Angolo Amutenya amushanga takalele mOmbelewa yOmuperesidende, omanga aawiliki yamwe yehangano ndika oyo James Hatwiikulipi, na Sackey Shanghala. Ehangano ndyoka ta li tungitha omihandjo ndhika olyo Hanganeni Emona, ndyoka lya giongele iimaliwa mbyoka ya pumbiwa oku za momahangano giimaliwa moshilongo. Lyo ndika ota li longele kumwe nehangano lyedhina Academia Cape ndyoka lina iipambuliko yooperesenda 49 mehangano lya Hanganeni Emona, niipambuliko yooperesenda omilongo 51 oyi niwe ku Hanganeni Investments Holdings. Omupoliko gwa Unam, Utaara Hoveka okwa ti omihandjo ndhika ngele dha pu ota dhi kala ha dhi wilikwa kehangano lyedhina Academia Namibia.Pethimbo ta fulu omukanka pehala ndyoka, Minista Iyambo okwa ti holomende ota nyengwa oku gandja omahala gokukala kaanasikola naalongi mboka omwaalu gwawo tagu indjipala omumvo kehe. Kombinga ye Pro-Vice Chancellor, Boniface Mutumba okwa ti nuumvo Unam okwa taamba omaindilo gomihandjo geli omayovi 3000 ndele oku na ashike omahala gomihandjo omashona.Etungo lyomihandjo ndyoka tali tameke mbala olya tegelelwa li kale lya manithwa omanga omumvo gwenongelo gwomayovi 2012 inaa gu tameka opo aalongwa mboka taya ka pumbwa omuhandjo ya langekwe moka.