Unam a pewa oshimaliwa oshindji

OSHITAYI sha UNAM shUuwindjinia nUuyelele wOpaunongononi shomOngwediva moshitopolwa sha Shana shoka sha egululwa pambelewa kOmupresidende Hifikepunye Pohamba ta yambidhidhwa kOmukuluntu gwa UNAM Omundohotola Sam Shafiishuna Nujoma mEtitano lya zi ko, osha pewa omagano goshimaliwa Kaanangeshefa, kOombaanga nosho tuu omakwatho galwe gopalongo okuzilila meni nopondje yOshilongo.

Omunangeshefa a tseyika nawa Omundohotola gwOpaunangeshefa Frans Aupa Indongo okwa gandja omagano kOshiputudhilo shika shOoN$200,000, ofamili ya Namundjebo-Tilahun tayi gandja omagano gOoN$300,000. Ombaanga ya Standard tayi gandja N$300,000 omanga ndjoka yo AgriBank ya gandja ekwatho li thike pOshimaliwa shOoN$600,000.
Oombaanga oonkwawo noshowo Omahangano Omakwashilipaleki, ngashi ngoka go Old Mutual nosho tuu nago wo oga kwathela notaga kwathele mokuthikameka po Oshitayi sha Unam shika noku shi kaleka po.
Omukulungtu gwOpevi gwa Unam Omuprofesore Lazarus Hangula, pethimbo ta popitha oshituthi shegandjo lyOonzapo kAailongi yomo Unam yokoNooli mOshakati omvula ya zi ko sha ningilwa mOshinyanga shomOsenda yOmaulikilo gIipindi mOngwediva mEtitano lya zi ko, okwa ti kutya Oshitayi sha Unam shika shUuwindjinia sha Ngwediva osha simana noonkondo kombinga yElongo lyoshigwana shokomongula sha N¥amibia nosho tuu noshi na nee okukwathelwa nawa n gashi tashi vulika oshoka otashi gandja elongo lya pumbiwa nolyongushu koshigwana. Ta ti mOshiputundhilo shOpombanda sha Unam shika omu na aalongwa ye li 55 mboka ya tameke nasho petameko lyomvula ndjika.
Hangula ta ti mokati aalongwa mboka 55, ya za mo Namibia, ko Burundi, koZambia nokoZimbabwe, omu na oomeme ye li 15. Mbaka oya tameka nee tayi ilongele uumakeninga, omalusheno, iikwaradio noshowo omakwatakanithokumwe gopaengodhi nosho tuu. Hangula ta ti opu na wo ye li 116 tayi ilongele Uuwindjinia kOshiputudhilo shUuwindjinia oshinene kOvenduka.
‘Shika oshinima sha simana noonkondo ku Namibia, tashi ti ngashiingeyi e na aantu tayi ilongele Uuwindjinia wopombanda moshilongo shoshene Namibia notaya mono oonzapo dhongushu dhi ikwatelela kwaandhoka dha uvathanwa palongo lyoludhi nduka lwa Washington. Hangula ta ti konale Namibia okwa li ha tumu aalongw aye yoludhi nduka ko South Africa, ihe ngashiingeyi, molwashoka South Africa, okwa ti kutya ita vulu we okuhumbata aalongw ambaka ya Namibia, Namibia okwa tokola ano ngeyi a kuthe ko oshinakugwanithwa shika.
‘Kashi shi nee oshipu oku shi humbata, molwashoka kakele koshimaliwa, otashi pula wo aalongi ya longeka ya thikama mOoprofesore nosho tuu. Onkee otatu pandula noonkondo sho iilongo yopondje ngashi China, taka kutha ko oshitopolwa oshinene shOlabora, shUumakeeninga noshowo ta kutha poaalongwa yomwaalu gwotumba ya ka longwe Uuwindjinia koChina noya ka galuke yee ya longe Aanamibia yakwawo.
Omuprofesore Hangula ta ti, India okwa gandja omambogokwiilongitha ku Unam nokwa uvaneka okutungitha po omatungogUuwindjinia womOomina nOndjugo yOmambo mo Unam ya Ngwediva.
Egypt okwa gandja Aalongi, ano Ooprofesore ko Unam ya Ngwediva nokwa uvaneka ta ka gandja natango Ooprofesa dha gwedhwa po monakuyiwa moka.Finland (Soomi) okwa uvanekaq ta gandja Ooprofesore dhokulonga moUnam ya Ngwediva okupitila mo University ya Oulu ndjoka yi mli kahewa ka Unam noshowo oshimaliwa shokwiilongitha kAailongi yomoUnam ya Ngwediva moka noshowo ngaa iikwaniilongitho yilwe yomoUnam ya Ngwediva moka.
Nigeria otaka gandja aalongisikola, ano Ooprofesore nOotechnishena koUnam ya Ngwediva. Oshimaliwa shoka sha gandjwa ku AgriBank oshoku yambidhidha Oshinyanga shUuwindjinia wUumakeninga noshUuwindjinia wUuyelele wOpaunongononi. Old Mutual ta yambidhidha Olabora yOokoompita yOshikondo shUuwindjinia wUuyelele wOpaunongononi.
Ombaanga ya Standard otayinya mbidhidha ombinga yUuwindjinia wUumakeninga nUuyelele wOpaunongononi omanga shoka sha gandjwa kOmundohotola Frans Indongo tashi ka yambidhidha mOlabora moshitopolwa shOmalusheno shoka opo natango tashi tungwa.
Shoka sha gandjwa kOfamili ya Namundjebo-Tilahunotashi ka yambidhidha mOlabora nenge moshinyanga moshitopolwa shOmalusheno noshowo mOshitopolwa shegandjo lyoshimaliwa shokwiilingitha kAailongi yamwe moUnam moka.
Omupresidende Pohama noshowo Omukuluntu gwa Unam Omundohotola Sam Nujoma nOmupeha gwe Omuprofesore Lazarus Hangula, oya pandula ayehe mboka ya kwathela ngeyi notaya tsikile nokukwathela.