Uitkomst ya lukwa John Pandeni

OSASIONAyOmapekaapekelo yEpangelo yoohecta 6500, tayi adhika muuninginino wo Grootfontein (Oshaanda) mOshikandjohogololo shoka mOshitopolwa sha Otjozondjupa, mOlyomakaya ga zi ko oya lukilwa nakusa Oministeli yOmapangelo gOpaitopolwa, Omagumbo nEhumithokomeho lyOkomikunda, John Alphons Pandeni ngoka a manene oondjenda dhe moshiponga shohauto mondjila onene ya Tavi na Shaanda ndjoka ya enda mooha dhOsasiona ndjoka, meti 14 Maalitsa 2008.

Oshituthi shelukilo shika, osha li sha kalwa kOfamili ya nakusa Pandeni ngashi komuselekadhi, Julia Pandeni naanona kOmukokolipresidende Sam Nujoma noshowo kOmuprima gwoshilongo, Nahas Angula, ngoka a li noshipopiwa oshinene shOmupresidende, Hifikepunye Pohamba, ngoka ka li a mona ompito okuthika omolwiilonga yilwe yOpambelewa. Gavena ya Tjozondjupa ,Rapama Kamehozu, sho a popi mpoka okwa ti oshoopala okulukila nakusa Pandeni Ofaalama ndjika yi li mOshitopolwa shawo, oshoka Pandeni okwa kondjela shili oshilongo noshigwana sha Namibia nokwa gwana okupandulwa. Pata Joseph Hatutale gwOngeleka ya Katoolika oye a ningi egalikano petameko.Omupresidende Pohamba moshipopiwa she shoka sha leshwa pehala lye kOministeli Onkuluntu, Nahas Angula okwa ti kutya Pandeni ngoka a si moshiponga shohauto mondjila yopokati ka Tavi na Shaanda momumvo 2008, a adhika ta yi niilonga kuuzilo woshilongo, okwa li ependafulefule miilonga ye nokwa li ta kutha ombinga onene mehumithokomeho lyoshilongo konima sho a kondjo miita yekondjelomanguluko nokusindana.Pohamba ta ti molwashoka nakusa Pandeni okwa manena oondjenda dhe pooha dhOsasiona ndjika yOmalolelo nenge yomapekaapekelo ya Uitkomst, Okabinete, paindilo lyofamili, aakewanezimo nUuministeli wUunamapya, Omeya niihwa, mboka owo wene wOsasiona ndjoka, oka tokola shili Osasiona ndjoka ya Uitkomst yi lukilwe nakusa John Alphons Pandeni. Ta ti Pandeni okwa li ta kondjo nokuhumitha komeho Iitopolwa yokomikunda opo aantu, unene aanyasha ya mone iilonga nokuza mo moluhepo. Peresidende Pohamba ta indile koshigwana shi longithe noonkondo Osasiona ndjika yOmapekaapekelo miilonga yomapekaapeko ge na sha nokuhumitha komeho Namibia noshigwana she.Minista Mutorwa, pethimbo olyo tuu ndyoka, okwa fatululile aanashituthi shoka nkene Osasiona ya Uitkomst yatya. Ta ti oyi li ehala lyEpangelo okuza momumvo 1960 nomwa kala hamu ningilwa omapekaapeko nomalolelo, unene tuu gomaludhi giimuna ngashi oongombe niikombo yomaludhi gi ili nogi ili, ya za kiitopolwa yi ili noyi ili. Omupresidende gwEhangano enene lyAaniilonga lya Namibia, Elia Muatumbulange Manga okwa li a popi pehala lyEhangano lyoNAFAU ndyoka, paye lya totwa po ku Pandeni, moka a kala Amushangandjayi gwalyo uule wethimbo ele sho a zi muunkwatwe kontuntu ya Robben petameko lyomimvo dhomilongohetatu. Okwa ti nakusa Pandeni okwa kondjela uuwanawa waaniilonga moNamibia moka kumwe nemanguluko, onkene oshoopala noshuuka, sho a lukilwa Osasiona ndjika ya Uitkomst yomalolelo nomapekaapeko.Kaansela omukulu gwa Anamulenge, tate Joseph Kanyenye Aluvilu ngoka apopi pehala lyaakwanezimo, okwa pandula Epangelo sho lya zimina nakusa Pandeni a lukilwe Osasiona yalyo ndjika yOmalolelo ya Uitkomst. Gumwe gwomoyanamati Jarno Iitha Pandeni, okwa pandula Omupresidende Pohamba noshowo Omukokoliperesidende, Sam Nujoma sho ye ya yambidhidha pethimbo edhigu lyokuthigwa po ku he. Jarno ta ti, onkalamwenyo ya he oya i yeigandjomwene, molwoshigwana. A kala a hala oshigwana shi ningilwe uuyuki nelukilwo lye osasiona ndjika oshuuka noshoopala. Jarno Pandeni ta indile aaleli yoshilongo ya tale ehumitho komeho lyoshilongo meendelelo ngashi tashi vulika. Ta ti omikalo hadhi longithwa kEpangelo kutya na ku konaakonwe manga shika naashiyaka, opo ihe nawa ku ningwe ehumokomeho, oshinima tashi mana po ethimbo nokweethela oshigwana moluhepo. Ta ti aawiliki yoSwapo, na he a kwatelwa mo, sho ya tokola okulwila emanguluko lyoshilongo noshigwana sha Namibia inaku ningwa tango omakonaakono nomapekaapeko, oya tokola lumwe, taya lu nokumangulula Namibia, ngashi lya manguluka ngeyi. Posasiona John Pandeni opena iikombo 750 yomaludhi gane, ngaashi yoludhi lwoko Caprivi, Kavango, Owambo noKunene nenge ya Kaoko. Opena wo oongombe dhomahini 60 nadhilwe 240. Omanga ohapa longwa epungu nomushokolo.