UDF a hala iizemo ya Daures yi yalulwe ishewe

OMUPERESIDENDE gwa United Democratic Front[UDF], Justus Garoeb okwa endulula eindilo lye kutya omawi gehogololo lyoshitopolwa sha Daures ga yalulwe ishewe.

Oku za tuu sho iizemo yomahogololo ga Novemba omumvo gwayi ya tseyithilwe momi 28 ga Novemba 2010, ongundu ndjoka oya kala noku indila opo iizemo mbyoka yi yalulwe ishewe konima sho ndjika ya kanitha oshikandjohogololo shoka nomawi 23 gongundu yoSwapo.Garoeb okwa ti oUDF oya hala oku ulika kutya oshikandjohogololo shoka osho ohotehala yayo, na ka ya li ya tegelela yi kane mehogololo.Mombilive a shangele komunashipundi shoKommissi yomahogololo, Victor Tonchi momasiku 28 ga Desemba 2010, Garoeb okwa ulike kutya oUDF oya kala nokusindana moshikandjohogololo shoka pwaana nando omalimbililo okuza tuu omumvo 1992. Pethimbo lyomahogololo gomumvo gwayi, kansela gwa Daures ngoka gwongundu yo UDF, Apius Auchab okwa mono omawi 1371, nokwa kanitha ehogololo nomawi 23 oku yeleka nomuhogololwa gwoSwapo, Ernest Katjiku, ngoka a mono mo omawi 1 394.Otaku hokololwa kutya sho ehala lyokukoleka omahogololo po Uis lya edhile, Auchab aniwa okwa li eli komeho nomawi 1 371 okuyeleka naangoka ga Katjiku taga tengenekwa ga li lwopo mawi 900 lwaampoka. Ndele aniwa omolwa uupyakadhi wosheenditho ongundu yokuhogololitha yonomola 302 aniwa oya gandja iizemo yomahogololo ya yo pangodhi kaanambelewa yomahogololo po Uis, naashika osha eta mpoka kutya Katjiku a sindane moshikandjohogololo shoka.Garoeb okwa ti ongundu ndjoka aniwa oya ka thika pehala lyokukolekela iizemo konima yootundi mbali. Okwa ti ishewe ongundu ndjoka yonomola 302 ka ya li ta yi tonatelwa oshoka oya ende oyo ayike yo ishewe ka ya li yina aakalelipo yoongundu dhopolitika.Okwa ti omayalulo agehe pomahala gokuhogololela oga li ga ningwa kaanambelewa yomahogololo,naamboka ya li ta ya talele omahogololo oya li ya tindindilwa oku tala omauyelele ge nasha noombapila dhomahogololo kaanambelewa pomukunda gwa Uis.Okwa ti shoka tashi kumitha ooshika kutya omukalelipo gumwe ashike gwa UDF oye a pitikwa a ye mehala moka mwali tamu kolekelwa omawi, omanga ooyakwawo ya li pondje taya nyenyeta, no ya indile opo pa ningwe omayalulo omatiyali giizemo mbyoka. Ndele eindilo lyawo olya li lya tindwa. Garoeb okwa ti ombangi yimwe awike ndjoka ya li meni lyehala lyoku talela omahogololo ando opo yi lopote uulingilingi ngele opwa li pena, oyo Jorgan Matsuib[21] ndjoka ya sile momeya pofaalama yoohi po Uis konima ashike sho iizemo yomahogololo ya kondjithwa.Garoeb okwa nyolele Tonchi tati omalupita oUDF oya li ya indile ombelewa ya Tonchi opo omaupyakadhi ngoka ga tsakanekwa kongundu yonomola 302 ga konakonwe.Garoeb okwa gwedha ko ta ti oku shishi kutya omunashipundi shoKommissi yomahogololo okuna uuthemba oku gandja elombwelo opo iizemo yi yalululwe, opo ehilathano pokati koshigwana li shonopekwe.Garoëb okwa ti omolwa uuwanawa woshigwana ,omuwiliki gwomahogololo ,Moses Ndjarakana, na talulule uumbapila womahogololo okuza kongundu yonomola 302 mboka wa zi koshikandjohogololo sha Daures, nokugandja iizemo yaashoka a mono montaneho.O The Namibian’oya li ya kambadhala oku konga okomenda okuza ku Tonchi nenge ku Ndjarakana ndele kapena ngoka gomwaambaka a popi sha oshoka yo ayehe oye li mefudho.