UAG a landa oshidhindi meya

EHANGANO lya United Africa Group[UAG] olya landa iipambuliko yooperesenda 50 moshidhindi meya sha Areva, hashi ithanwa Areva Wlotzbaken/Trekkopje Desalination plant.

Oshipambuliko shika shooperesenda 50 otashi gu oodola obiliona 1,8.Elongelokumwe ndika epe oha li ithanwa Erongo Desali Company[EDC].Omupevi peresidende gwehangano lya Areva, Enrico Barbaglia ina vula okutya ehangano ndika lyo EDC olya dhikwa po uunake ndele okwa koleke kutya olya dhikwa kuyele omathimbo ga piti, nonando inali monenwa ewilikongundu.Oshidhindimeya okuza mefuta shika osho ,shotango moNamibia osha tegelelwa shi ka tulwe miilonga mu April 2010, pethimbo omeya gotango ga dhindwa ta ga ka pombelwa komina yo Uranium ya Trekkopje ndjoka tayi longwa kehangano lya Areva.Elongelokumwe lya UAG na Areva okwa tegelelwa li egulule ondjila opo Namwater noshowo omahangano galwe moshilongo ga ninge iilyo melongelokumwe moprojeka ndjika.Barbaglia okwa lombwele oThe Namibian kutya ehangano lya UAG olyo lyotango melongelokumwe ndika ndele ha lyo ta li kala lya hugunina.Pahapu dhe, okwa tegelelwa Namwater a ninge oshilyo shelongelokumwe ndika, no nando shika ina shi longekidhwa natango nawa.Okwa ti ehangano lye lya Areva ota li kala nokwii kutha mo miilonga yoshidhinditho. Omatompelo oongoka kutya iilonga yomina po Trekkopje osho ehuku lyiilonga ya Areva.’Omeya hago ekota lyiilonga yetu, otwa li tu na okutunga oshidhinditho shika opo tu vule okulonga nomina yetu.’ osho a ti.Oshidhindimeya shika otashi vulu okulonga omeya gookubikemeta oomiliona 20 komumvo, ookubikemeta oomiliona 14 odho tashi vulika dhi kale hadhi longithwa komina ya Trekkopje.Ngashingeyi Areva ota kala ta landa omeya okuza ko EDC.