Tutekula a pewa Omambo 12000 ku Wawa Motors Company

EHANGANO li na sha nesiloshimpwiyu lyaanona, unene mboka yoothigwa naamboka ya mona iihuna lyedhina Tutekula Children Organisation, tali adhika moHangwena mewiliko lya meme Eunice Heita na meme Mirjam Shaulwa, mEtitatu lyoshiwike sha zi ko olya pewa omagano gomambo gokulesha ge li 12, 000 kOkampani nenge kOngeshefa yokulanditha iihauto yopOshikango yedhina Wawa Motors Company yomusamane Ahmed Shaquel.

Ehangano ndika,li na Ombelewa yalyo pOnuno moshitopolwa sha Hangwena, oli na ondjugo yOmambo, yi li pOnuno,moka aakwashigwana, unene tuu uunona wawo, ha wu yi nokulesha momambo ngoka wi iimonene omaunongo gi ili nogi ili.Etungo lyawo lyondjugo yOmambo, kali li ngaa pamuthika, oshoka olya thikama miipeleki, na meme Eunice Heita ota ti kutya oya pumbwa ekwatho lyokutungilwa Etungo ewanawa lyekuma ndyoka taya vulu okulongitha ongongulu yawo yomambo.Oshituthi shegandjo lyomambo ngaka, sha li sha wilikwa ku meme Agnes Ndakeva, osha li sha kalwa nokupopithwa ku Gavena yOshitopolwa sha Hangwena tate Usko Nghaamwa ngoka e li Kahewa kEhangano ndika noshowo kOmunashipundi gwEhangano ndika Tutekula, Omusita Paulus Heita, ku Kaansela Phillip Namundjebo noshowo nee ku tate Shaquel, omukulukadhi gwe naanona ye noshowo nee kiilyo oyindji ya Tutekula mewiliko lya meme Eunice. Aavali yamwe nayo wo opo ya li mpoka nokutala nkene ongulu yawo yomambo tayi pewa omagano gomambo gomwaalwu gu thike mpoka.Pethimbo ta taamba ko aayenda ayehe koshituthi shika, Omusita Paulus Heita, Omunashipundi gwa Tutekula, okwa pandula noonkondo omusamane Shaquel, Ongeshefa ye naaniilonga ye, sho a ninga etokolo ewanawa lyokugandja omambo gokulesha kOngulu yOmambo ya Tutekula opo ga kwathele mokwiindjipaleka ontseyo yuuyuni mokati koshigwana, unene tuu shoka shokomongula. Ta ti oshigwana sha Tutekula otashi ka mona mo iiyimati iwanawa mokulesha omambo ngaka. Omusita Heita ta ti, oshigwana sha lesha otashi kala oshigwana shi shi sha, notashi vulu okweeta po sha, sha kola monkalamwenyo.Gavena Nghaamwa, okwe ya pandula nokutanga oomeme mbaka yaali, Eunice Heita na Mirjam Shaulwa,mboka ya tota po Ehanghano ndika Tutekula. Ta ti oomeme mbaka yaali aakwashigwana yoshilishili. Ye na omadhilaadhilo nomatokolo omawanawa gokutunga oshilongo nokugandja ekwatho nomayakulo kwaamboka ye ga pumbwa, unene tuu kaanona, yoothigwa, ya mona iihuna nosho tuu.Gavena Ngaamwa ta ti, onakuyiwa yoshilongo noshigwana oyi ikwatelela maanona, moshigwana shokomongula, onkee okugandja ekwatho kaanona, ngaashi oomeme mbaka yaali, oshinima oshinene nosha simana noonkondo. Gavena ta pandula noonkondo omusamane Shaquel nOngeshefa ye noku mu tsa omukumo a tsikile ngawo. Omukalelipo gwEpangelo mOshitopolwa sha Hangwena ta indile kaaniimaliwa yalwe ya landule oshiholelwa oshiwanawa shOngeshefa yomusamane Shaquel.Gavena Nghaamwa ta ti otashi ka kala oshiwanawa ngele Tutekula taka tungilwa etungo lyokolela lyOmambo pOnhuno nenge pOshikango. Pethimbo ta gandja omagano gomambo ngaka ku Tutekula, omusamane Shaquel okwa ti kutya ye nOngeshefa ye oye li iilyo ya Tutekula, onkee a tokola toko okukwathela Ehangano lyawo ndika nOmambo gomwaalu gu thike mpoka.Ta ti natango onkee taka tsikila nokuyambidhidha Tutekula Children Organisation ngashi tashi vulika.Omusamane Shaquel ta ti, Ongeshefa ye oyi ilongekidha okutungila Tutekula Ongulu yOmambo ombwanawa pOshikango. Ta indile kElelo lyOndoolopa ya Helao Nafidi li ya pe ehala mOshikango mpoka taya vulu okutunga ongulu ombwanawa yOmambo.Meme Eunice, ngoka a pandula noonkondo omusamane Shaquel nOngeshefa ye kumwe negumbo lye, sho ye ya pa omagano gomambo ge thike mpoka, okwa pandula wo sho omusamane Shaquel a uvaneka e ke ya tungile ongulu yomambo mOshikango.Ashike okwa ti ngaa kutya otashi ka kala oshiwanawa ngele tayi tungwa mpoka pu na ombelewa yawo nale, ano mOnuno. Ta pe wo tate Shaquel omagano getiti.Mokati komambo ga gandjwa esiku ndyoka, omu na embo limwe li hokitha li na sha nomahogololo.Kaansela Namundjebo oye a li a pandula ayehe yiile kOshituthi shEgandjo lyomambo ngaka.