Tu ka hogololeni Oswapo yetweni: Ya Kasita ta ti

OMINISTA yOpevi yOmavi nOmatulululo Henock ya Kasita, ngoka wo e li Kaansela gwOshikandjohogololo sha Kaku okwa indila koshigwana shi ka hogolole o Swapo ya Namibia nOmupresidende gwayo momahogololo gOpaupresidende nogOshigongi shOpashigwana ngoka taga ka kala ko pehulilo lyomvula ndjika.

Ya Kasita shika okwe shi popi pethimbo a li popitha engathithi enene lyAakwSwapo moshiithanene shokudhimbulukwa evalo lyo Swapo lyoomvula 49, sha ningilwa pomigongi dhiigongi dha Ngwediva mOngwediva moshitopolwa sha Shana, mOsoondaaha yeti: 19 Apiilili 2009.
Sswapo ya Namibia, mOsoondaha ya zi ko yeti 19 Apilili 2009 oya gwanitha oomvula 49 okuza sho ya totelwe po meti 19 Apilili 1960. Poshituthi shevalo lyo Swapo mOngwediva opwa li Ookaansela dhondoolopa ya Ngwediva, tadhi kwatelwa komeho ku Meya gwOpevi gwa Ngwediva meme Patricia Kashuupulwa, Aanambelewa, Aawiliki yOswapo mOshikandjo sha Ngwediva nosho tuu, Aawiliki yOpambepo noyopaMuthigululwakalo nayalwe wo yopashigwana.
Minista gwOpevi Ya Kasita ta lombwele aanashituthi shevalo lyoSwapo shika shoomvula 49 mpoka kutya omahogololo ngoka ta ge ya pehulilo lyomvula ndjika otaga ka kala ga kindja molwashoka otamu ka kuthwa ombinga lwotangotango kAanamibia aagundjuka mboka opo ya gwanitha oomvula 18 omvula ndjika nenge omathimbo ga zi ko konima yomahogololo ngoka ga li ko pwa pita oomvula ntano ngashiingeyi.
‘Oshiwanawa nee sho oshigwana oshigundjuka tashi ka kutha ombinga momahogololo ngoka twa thinda pehulilo lyomvula ndjika nonda hala okuninga eindilo enene nolya simana lya thinda moshigwana sha Namibia ashike, shoka sha kala nale tashi hogolola naashoka opo tashi ka hogolola, shi ka hogolole nawa, ano shi ka hogolole Oswapo yasho ya Namibia ndjoka ya kondjela shili emanguluko lyoshilongo shika noyendji yomuyo ya kanitha oomwenyo dhawo, ya lemana noya kanitha omaliko gawo, omolu ekondjelomanguluko lyoshilongo shetu Namibia noshigwanba sha mo,’ Ya Kasita ta ti ngawo nokutsikila ko ta yelitha kutya Ongundu yo Swapo oya ulika nale ngoka te ke yi ka lela po momahogololo gUupresidende, ano ya ulika Omupresidende Hifikepunye Pohamba kutya oye ta ka thikama ongOmupresidende gwOswapo momahogololo gOpaupresidende pehulilo lyomvula ndjika.
Oongundu oonkwawo ndhoka dha tokola okukutha ombinga momahogololo ngaka nadho wo otadhi ka ulika Oopresidende dhadho noshigwana tashi ka tala nee kutya osha hala lye yomuyo oye a ninge Omupresidende gwOshilongo. Ano otandi indile koshigwana OshikwaSwapo nosho tuu shi ka hogolole omusamane Hifikepunye Pohamba gwOswapo a tsikile ta lelaoshilongo shika Namibia ongOmupresidende gwasho ngashi a kala momathimbo twa zi mo.
Ya Kasita ta gwedha po ta ti kutya Ongundu kehe tayi ka kutha ombinga momahogololo oya tegelelwa yi ka gandje omwaalu gwaahogololwa yayo ye li 72, ano omwaalu ngoka ogo gwiilyo ya thikameka po Oshigongi shOpashigwana. ‘Ongundu yo Swapo inayi mu lombwela natango kutya aahogololwa yayo ye li 72 oyo oolye na otashi ka ningwa muule wethimbo twa thinda mo manga omahogololo nenge iikonga yomahogololo inayi thika, ashike nee otaku kiikankamekwa unene kokuhogolola ongundu yo Swapo ndjoka tayi kalelwa po nee kaahogololwa mboka 72 yongundu yo Swapo,’ Ya Kasita ta ti ngawo nokwiindila natango koshigwana OshikwaSwapo nosho tuu shi ka hogolole Oswapo naawiliki yasho mboka, mwa kwatelwa Omupresidende Hifikepunye Pohamba. Oongundu oonkwawo nadho wo odhi na okugandja omadhina ge li 72 gaahogololwa yadho noshowo OmuhogololwaPresidende gwa kehe ongundu tayi kutha ombinga momahogololo ngoka. Minista yOpevi Ya Kasita ta ti kutya opu na yOongundu dhilwe taya ti kutya Oswapo nayi ze ko koshipundi shokupangela molwashoka oya pangela aniwa nee ngaa ethimbo ele. ‘Onda hala ndi ya lombwele mboka kutya Oswapo oyi na okupangela Namibia ngashi oshigwana sha hala, na hangashi oongundu dhontumba noongandi noongandi ya hala. Oswapo oya kala momuthitu moka ethimbo ele tayi kondjele emanguluko lyoshilongo shika, noku shi mangulula shili ndele tayi tameke oku shi pangela noku shi patolola.
Onkee nee oyi na oshinakugwanithwa oshinene shokutsikila nokupangela oshilongo shika Namibia, ngashi ye shi mangulula nuudhigu uunene, nombinzi ya tika, aakondjelimanguluko ya kanithila mo oomwenyo dhawo, ya lemanena mo noya kanithila mo omaliko gawo. Swapo nEpangelo lye li li koshipundi, okwa tula po omalandulathano ge gopahumokomeho, ano nkene e na okuhumithakomeho Namibia noshigwana sha mo, ngoka e na oshinakugwanithwa shago oku ga thikitha pehulilo, ngashi osho shi li mondjodhi yetweni yo 2030, kutya Namibia momvula ndjoka a ka kale a humakomeho ngashi iilongo iikwawo mbyoka ya humakomeho kamana muuyuni,’ Minista Ya Kasita ta ti ngawo nokwiindila koshigwana shi ka hogolole o Swapo ya Namibia momahogololo ngoka tage ya pehulilo lyomvula ndjika.
Minista gwOpevi Henock ya Kasita ta ti kutya Swapo okwa tula po Epangelo nokuunganeka oshigwana sha Namibia shi kale kumwe okuza sho sha li sha topagulwa komukolonyeki. ‘Epangelo lya Namibia li li mewiliko lyoSwapo, olya eta po ombili, uukumwe, euvathano nombepo yedhiminathanepo, omolwaasho ho mono Aanangeshefa aanene nAapunguli yopondje yoshilongo ye hole okuya ya tunge nokupungula koNamibia molwashoka omu na ombili, oku na Epangelo tali wilikwa koSwapo yi shi sho tayi ningi noya hala Namibia a kale mombili nokukale e holike ngawo kuuyuni wopondje. Oshinima shoka tashi tu petheni omakwathelo gokuhumitha komeho oshilongo shetweni opo tu kaleni monkalo yi li nawa, yi na emona li li nawa nosho tuu,’ Ya Kasita ta popi.
Ta indile mboka ya pukithwa ya galukile kOswapo yawo. Ta ti Omupresidende Pohamba naye osho ta indile ngawo kutya mboka ya pukithwa, nayi itedhulule ndele taya galukile kOswapo yawo. Otaya taambwa nomaako gaali. Kombinga yomaindilo gOonakulwa aakulu kutya ya futwe oshimaliwa shawo palumwe shOoN$30,000 tashi indjipalekwa noomvula omuntu a kala muupongekwa, Minista yOpeviu ya Kasita okwa ti kutya Epangelo itali kala omuntu moshipala a indile shoka a hala, ashike kombinga yeindilo ndika, olye shi tala ko shi li pombanda unene na itashi vulika pethimbo ndika. Ta ti sho ye shi konaakona mo nawa oye kiiyadha kutya, ngele otaya futu omwaalu ngoka, oye na okukala noshimaliwa shi li poombiliona 22 lwaampoka, ano omwaalu gu thike pOmulekeneno gwopamumvo gwa Namibia. Ya Kasita ta indile koonakulwa aakulu, ya kale ya ngungumana nokutegelela shoka tashi longekidhwa po kEpangelo pethimbo ndika, sha kwatela mo omauwanawa ogendji lela noge li nawa koonakulwa aakulu.
Ta ti omakwathelo