Tu dhimbulukweni nosimaneka omapenda ga Afrika

PETHIMBO ta popitha Oshigongi oshinene shOswapo mEsiku lya Africa pOlunkono mOndangwa Omaandaha ngaka ga zi ko, Omupresidende Hifikepunye Pohamba okwa indila kAafrika ayehe, unene tuu kAanamibia, ya kale nokudhimbulukwa noshowo okusimaneka Omapendafule ga Africa ngoka ge shi pondola okutota po Ehangano lyUukumwe wAafrica.

Omupresidende Pohamba ta ti kutya Aaleli ya Africa mboka ye shi okusimanekwa mEtotopo lyEhangano lyUukumwe wa Africa, ongashi nee omusamen Kwame Nkurumah, Modibo Keita, Abdel Nasser Emperor Haile Selasie, Julius Nyenrere, Ahmed Sekou Toure nayalwe wo oyendji.
‘Eitulomo lyawo nomukumo gwawo nomatokolo, osho wo sha eta Aanamibia nayo ya kuthe onyati nokuya mekondjo lyokukondjela emanguluko lyoshilongo shawo sigo tashi manguluka ngashi twa mangulukeni nena ngeyi. ‘Ehangano lyUukumwe waAfrica olya tulwa po li hanganithe Africa nAafrica yalyo nokutula po onkalo yi li nawa yokukwathela Aafrica meyokomeho lyawo, okugamena iilongo yawo ya manguluka na Africa alihe koonono, okukutha Africa alihe mUukoloni, okuyelutha po ekwatathano lyOpaigwana ngashi naanaa shi li mOmulanduhokololo gwIigwanahangana. Onkee ano sho tu lyeni nena mpaka tatu tyapula Esiku lya Africa otu na okudhimbulukwa Aakuluntu yetu mboka ye tu kokoleleni ondjila yetu yUukumwe wa Afrika moka tu li nena tatu li iiyimati yiilonga yawo
iiwanawa,’ Pohamba ta ti.
Okwa ti sho nee twa thika ponkatu yatya ngeyi natu kaleni nee kumwe nokulonga twa mana mo tu yambule po Africa lyetu nokwiikutha monkalo yoluhepo, yomikithi noyiita nomaipumomumwe ndele tatu kala tu na etegameno li li nawa neyokomeho. ‘Natu ye ni nee komeho nelalakano limwe lyokusinda okuhahumakomeho, uuthigona, okuhepa, omikithi ndhoka tadhi hepeke omaliliona gAafrica noku ya ninga ya nkundipala nokaye na we ekwatho lyasha. Africa okontinende onene notwa pumbwa oku yi humitha komeho. Tu tungeni uukumwe wiihwapo nawa, tu kalekeni po ombili mu Africa lyetu, etameno noku li ninga limwe, evi lyetu meme gwetu atuheni kumwe,’ Pohamba ta ti ngawo.
Ta lombwele engathithi lyAakwaSwapo poshigongi shawo mpoka kutya nuumvo moNamibia otamu ka kala omahogololo gOpaupresidende nogOhigongi shOpashigwana, onkee Aanamibia naya ka kuthe ombinga momahogololo ngaka ye na uutsa nontsinu koomwenyo dhawo sho ye li oshitopolwa shOkontinende ya Africa e na ondjokonona yi
li nawa noya simana noonkondo, n, tayi lalakanene okukala a kola nokwiikololela mombili, memanguluko nomuuyuki.
‘Natu ningeni Africa, Africa e na uutsa mu ye mwene,’ Omupresidende Pohamba ta ti nokugwedha po kutya Iilyo yOswapo nayi ye momahogololo ngoka tage ya yi li kumwe
noyi na elalakano limwe lyokugandja esindano kOswapo nOoperesenda ethele (100%). ‘Ehwahwameko lyoshigwana nali yage kegonga okuza nena ndjika sigo okesiku lyomahogololo oshoka otwa hala Swapo yi ka mone omake ga gwana opo yi tsikile okulela Namibia pwaa na epiyaganeko lyasha.
Aakwaswapo, tsikileni nokulonga oshigwana omalalakano gongundu yetweni yoSwapo ngashi ge li mEmbo lyetweni lyOmanifesto yOmahogololo opo tu kwashilipalekeni kutya Ongundu yetweni yOswapo yi ninge Egumbo lyAanamibia atuheni opo tu vuleni pamwe okuhumitha komeho emona lya Namibia gwetweni kumwe palandulathano nopambili,’ Omupresidende Pohamba ta ti ngawo nokutsikila ko ta ti Namibia okwa koneka etotopo lyoongundu dhoopolotika dhi ikwatela kuukwamuhoko nokOofali, nelalakano dhadho
okutopola Namibia naantu yamo paukwamuhoko.
‘Onkee otandi mu londodha noku mu kumagidha mu kale mwa lungundja noonkondo nomwa kotokela oongundu dhOopolotika ndhoka,’ Pohamba ta ti ngawo nokwiindila kiilyo nokaayambidhidhi yoSwapo yi kaleke kokule nomiyonena nomaipumomumwe naantu yamwe, pethimbo nokonima yomahogololo, oshoka shoka motashi ka yona ashike edhina ewanawa lyOswapo.
‘Ngele mboka yoongundu dhoomilameno, naamboka haku tiwa aniwa oyUuthemba wOmuntu otaye mu hindi, ka lopoten i kopolisi ya namibia ndjoka yi lile po okukaleka po Oveta nElandulathano mOrepublika ya Namibia,’ Pohamba ta ti ngawo nokwiindila wo kAaleli yopamuthigululwakalo ya longele kumwe nEpangelo kombinga yiinima yi na sha nelelitho lyiikwamithigululwakalo miitopolwa yi li kohi yomalelo gawo.
Pohamba ta pandula aawiliki yOpambepo sho taya tsikile niilonga yawo yopambepo mokati koshigwana sha namibia nokuulikila oshigwana sha Namibia ondjila yoshili noyuuyuki.
Kombinga yAanangeshefa, Omupresidende Pohamba ota ti Epangelo lyOswapo olya tula po ombepo nonkalo yi li nawa moka aanangeshefa, unene tuu mboka aashona noyopokati taya vulu okuninga oongeshefa dhawo nokungeshefa ye li monkalo ombwanawa, ya manguluka nawa, moka taya vulu okukuta aanamibia yakwawo noku ya pa ngeyi iilonga ya mone uuhupilo.
Omupresidende Pohamba ta ti kutya Epangelo lya Namibia li li mewiliko lyoSwapo olya tula po Ombaanga yEhumithokomeho yokugandja omakwatho gopashimaliwa kAanangeshefa mboka taye shi enditha nawa, onkee ota indile kaakwashigwana mboka ya hala okuninga oongeshefa ya ninge ekwatathano nombaanga ndjika opo ya mone ekwatho lyopashimaliwa, opo ku monikile oshigwana oompito dhiilonga.
Kombinga yAagundjuka, Omupresidende Pohamba okwa ti kutya Epangelo lyOswapo oli na omalandulathano gokunkondopaleka aanyasha nOomeme. Ta ti kombinga yaanyasha, Epangelo olya hala okuyakula aanyasha yAanamibia ayehe shi thike pamwe. Iatku katalika kutya nguka okwa za kombanda, okwa valelwa mekondjelomanguluko nenga okwa kala meni, ina valwa kaakandjelimanguluko.
Ta ti Epangelo molya tula po ooprograma haanyasha noomeme, naanyasha noomeme mbaka naya longithe oompito ndhoka dhe ya tulilwa po kEpangelo. Omupresidende Pohamba ta indile kwaayehe mboka ya pukithwa koongundu dhoompilameno, ya galukile kOswapo yawo, ano ya galukile kEgumbo kOswapo yawo. Ta ti ayehe mboka taya ka galukile kegumbo lyawo ekulu, kumwe naamboka kaya li mo ndele oya hala okundjoina
Swapo, naye shi ninge, otaya kataambiwa ko nombili nonenyanyu.