Tsvangirai a zimina okuya mEpangelo lyopaukumwe

HARARE- Omuwiliki gwongundu yompilamena mu Zimbabwe yo Movement for Democratic Change (MDC), Morgan Tsvangirai, okwa ti ye okwa zimina okuya mEpangelo lyopaukume ndyoka tali ka totwa po moshilongo shika.

Shika okwe shi popi konima ashike sho opaati yawo ya li tindi etokolo lyoshigongi shaaleli yiilongo yAafrika lyUumbugantu (sha li mu Pretoris mOmaandaha) kutya mu Zimbabwe namu kale mwa totwa Epangelo ndika pokati komwedhi tagu ya na Tsvangirai, oku na okukala a ganithilwa oshipundi she shUuprimimanista momasiku 11 gomwedhi tagu ya. Iinima mbika itayi tsu kumwe otayi ulike etopoko mopaati ndjika kombinga yetulomiilonga lyetsokumweuvathano lyokweeta po Epangelo lyopaukumwe mu Zimbabwe, ndyoka lu lya shainwa mu Septemba 2008. Omupresidende gwa Zimbabwe Robert Mugabe, ngoka e shi popya sha yela kutya ota ka eta po Epangelo lyopaukumwe kamu na oongundu dhompilamena ngele otashi pumbiwa, okwa ti oonkundathana dhokoPretoria odha li dhe shi manitha na Okabinete ompe otayi vulu nee okweetwa po. Mepangelo ndika, Robert Mugabe ota tsikile nokukla Omupresidende, omanga omuwiliki gwa MDC Morgna Tsvangirai ta kala Omuprimimanista. Okuniwe eitaalo ndika kutya Epangelo lyopaukumwe mu Zimbabwe, osho asho ashike oshinima tashi ka kwathele okukutha oshilongo shika muudhigi moka shi li pethimbo ndika. Etokolo lyoshigongi shokoPretoria olya ningwa konima ashike sho ehangano li na sha nuundjolowele lyIigwanahangano nenge World Health Organisation (WHO), lya popi kutya ngashiingeyi aanttu mboka ya si komukithi gwOkolera mu Zimbabwe, otaya ihilile po 3 000 omanga ya konda po 56 000 ya kwatwa komukithi nguka okuza mu Auguste 2008.
’Iinima oya li ya kundathanwa shuukilila na sho twa thiki pehululi, kapwa li we omapulo inaga yamukulwa,’ Omupresidende gwa South Afrika, Kgalema Motlanthe (ngoka oye a li omunashipundi gwoshigongi shika),osho a popi ngaaka. Nande ongaaka, MDC okwa li a pititha omushanga konima yoshigongi shika, moka a popi kutya yo etokolo ndika itaya tsu kumwe nalyo. ‘Shika osha li ashike osheetwapo shotango shoka sha gandjwa ku SADC. Etokolo lyolela otali ka ningwa kOlaata yOpashigwana mEtitano,’ Omugandjimulombo gwa MDC, Nelson Chamisa, osho a popi ngaaka. popi ngaaka. *Oshiwike shika, ehangano lyOombiishofi yOngeleka ya Katooliki mwAafrika lyUumbugantu, oya popi kutya aaleli yiilongo yAafrika lyUumbugantu oye na okusitopa okuyambidhidha Mugabe nengele hasho, oye na okuzimina kutya oyo taya monitha AaZimbabwe iihuna. Oku niwe eitaalo ndika kutya Epangelo lyopaukumwe mu Zimbabwe osho awike oshinima tashi ka kutha oshilongo shika muudhigu moka shi li.