Tse itatu fanditha po omavi mOmuthiya: Shivute ta ti

MOMBAPILA yawo ndjoka a shangela ko The Namibian omasiku ngaka, ya shainwa kOmunashipundi gwOkomitiye yElelo lyondoolopa ya Muthiya ndjoka tayi enditha iilonga mOndoolopa ya Muthiya moka, Kaansela Samwel Shivute, Elelo lya Muthiya olyiipatana kutya lyo inali ninga etokolo kutya omahala, ano ooplota dhi li 90 lwopondingandinga yondoolopa ndjoka otaga ka landithwa po pafanditha.

Oshinima shika shokufanditha po ooplota ndhoka 90, osha tseyithwa pambelewa miikundaneki. Kutya nee oshi li ngiini sho Elelo lya Muthiya tali shi ipatana, omuntu ku shi uvite ko naanaa nawa we. Ashike osho shi li ngawo kutya Elelo lya Muthiya olya ti kutya aniwa halyo lya tokola ngawo.
Omunambelewa ngoka a kala a kelela pEhala lyomunambelewa Omukuluntupitithi gwElelo lyondoolopa ya Muthiya omusamane Kennedy !Haoseb, oye a shaina ombapila yetseyitho lyelandithopo lyomahala ngoka pafanditha.
Ombapila ndjoka oyi li momake giikundaneki, nayimwe oye yi nyanyangidha nokuli. Tayi ti kutya Elelo lya Muthiya olya tokola okulanditha po omahala ge li omugoyi mondoolopa ndjoka pamukalo gwofanditha nondando tayi tameke po N$17850 paohandimwe noshowo no N$21,000 no N$36390 pamahangano gokutunga omagumbo.
Pambapila nee yElelo lyaMuthiya yokupukulula aniwa oshinima shika, ya shainwa ku Kaansela Shivute, ngashi sha popiwa metetekelo, otayi ti ngeyi; gElelo lyoshilando Omuthiya olya hala okugandja uuyelele womondjila kiinyolwa ya holokele mOshifo sho The Namibian sheti 09/02/2009 mOshiwambo nosheti 10/02/2009 mOshiingilisa omoluuyelele wu li metsitsiya wa gandjwa kOmunambelewa Omukuluntu a li ta kwathele (mElelo lya Muthiya) gwedhina Kennedy !Haoseb.
Oshinima shokulanditha evi mOmuthiya, nakushifala kiikundaneki, okwe shi fala ko omanga Elelo lyoshilando shaMuthiya inaa li pewa epitikilo lyokulanditha evi okuzilila kOmbelewa ya Minista gwOmalelo gOpaitopolwa, Omagumbo nOmapendulopo gokUuushayi. Sigo oompano sho tatu popi ngeyi, omukalo gwokulanditha po evi mOndoolopa ya Muthiya, okuza kOministeli, katu gu na natango. Onkene twa tegelela eyamukulo okuza kOmbelewa ya Minista.
Tse ong’Elelo lyOndoolopa ya Muthiya, katu na ofanditha yevi mOndoolopa ya Muthiya. Omunambelewa nguno a tumbulwa metetekelo, uuyelele mbu a gandja ko The Namibian owa puka nokwe shi ninga momutse gwe mwene mokwaashiwike kElelo lyoshilando (sha Muthiya); h Ombapila opo ya hulila manga mpaka notashi ti uuyelele mboka Omunambelewa nguka !Haoseb a gandja kiikundaneki ayihe wu na sha nefandithopo lyomahala 90 mOmuthiya nowa nyanyangidhwa mo nale pambelewa, owa puka nani.
Nonando Oshifo shika sha mona omanyenyeto ogendji ga zilile
kaakwashigwana yokOmuthiya, yamwe tu yashi AakwaSwapo lela mOmuthiya moka nokumona wo kuyo omauyelele giihwapo nawa, konima sho ya uvu punewe edhilaadhilo lyokufanditha po omahala mOmuthiya, Elelo lya Muthiya okupitila mu Kaansela Shivute, otali ti ishewe ngeyi kutya; gOmapopyo ge li mOshifo shika, shomasiku ga tumbulwa metetekelo, taga ti kutya ofanditha oya kalekwa omolu omanyenyeto gaakwashigwana, ndino elundilo. h Elelo tali ti ishewe kutya; gOmunyoli gwOshifo okwa lopota natango kutya ofanditha ndjika oya kalekwa kewiliko lyopombanda lyOswapo Party, mbino iifundja iiluudhe. h
Tali tsikile ko tali ti: ‘Tse mba tu li Ookaansela dho Swapo Party, otu wete kutya aalopoti mbano otaa kambadhala okudhenga
omitse kumwe aakwashigwana nElelo lyoshilando papolotika yiifundja. Otaa kambadhala okuhwameka nokukuna evundakano opo ya tondithe Epangelo lyo Swapo nOngundu yOswapo party, taya pitile mElelo lyOndoolopa ya Muthiya, ya fa shimbungu e li moshipa shonzi. Inaya lundila nadenande Aamuthiya yiimwenenena. Naya ethe Aamuthiya ya tunge oshilando shawo pambili nopaimangokumwe. Omapopyo gatya ngawo shapo oompangela dhomuugongi wokonima yuuhaka (wokiikololo) mbu hawu ningwa monanguwi kiimpangangundu mbi tayi kambadhala okufundjaleka uuyuni, okutopola Aanamibia nokuyona po ombili yoshilongo shika, h Elelo lya Muthiya tali ti ngawo pamukanda gwalyo ye gu shangela kOshifo shika tali ya mukula kwaashoka sha li mOshifo shika shi na sha nefandithopo lyomahala 90 mondoolopa ya Muthiya. Etseyitho lyelandithopo lyomahala lyatya ngeyi, lya tumwa kiifo hanga ayihe yomoshilongo, nomEtitano lya zi ko olya nyanyangidhwa natango mOshifo sho Republikein.
Omatseyitho goludhi nduka ohaga futilwa oshimaliwa oshindji nomuntu oto ipula nee kutya olye ta futile etseyitho ndika ngele nani Elelo lya Muthiya otali ti kutya halyo lya gandja, oonkondo kOmunambelewa gwalyo Kennedy !Haoseb, a pitithe nokugandje uuyelele mboka kiikundaneki wu nyanyangidhwe? Aamuthiya, ye shiwike nawa, oyo wo yene ya ya dhengele kIikundaneki, unene koshifo shika taya nyenyeta oshinima shika konima sho ye shi uvu yoyene okuzilila mElelo lyawo moka.