TransNamib a kanitha iimaliiwa

EHANGANO lyokututa iinima lya TransNamib aniwa olya kala tali kanitha oshimaliwa, nomumvo gwiimaliwa gwahugunina ngoka gwa ulikwa pamayalulo gomambo, ehangano ndika olya kanitha oomiliona dhooN$73,5.

Uuyelele mbuka owa kwatelwa momushangwa ngoka TransNamib a tula komeho gohofa yaaniilonga, mekondjitho lyeindilo lya Titus Haimbili na Charles Funda opo andola ya shunithilwe iilonga yawo konima yokutidhwa miilonga omwedhi gwayi. Amushanga gwa TransNamib, Eugenia Taylor Tjaronda okwa gandja uuyelele mbuka wa ndjandjukununa nkene TransNamib a kanitha iimaliwa omimvo dhiimaliwa sigo opo mumvo 2011 pehulilo lyaMaalitsa. Talyor Tjaronda okwa ulike kutya ehangano ndyoka olya kanitha iimaliwa pakutula kumwe yoomiliona ooN$57, omanga momumvo gwembo lyiimaliwa lyomo 2011 ekanitho konima yokufuta iifendela olya li oomiliona ooN$73,5. Shika osha kondjitha uuyelele mboka wa li wa gandjwa ku Haimbili momushangwa gwe sho a tile pethimbo a taamba iilonga, TransNamib okwa li a yalula ekanitho lyooN$609 000, ndele mewiliko lye, ehangano olye shipondola oku mona oprofita yoomilona ooN$ 75 membo lyomumvo gwiimaliwa 2010.Pahapu dha Taylor-Tjaronda, onkalo yiiyemo ya TransNamib oya nayi pala unene momuvo gwembo lyiimaliwa 2011. Ekanitho ndika ota ku tiwa olya ningwa pethimbo ehangano lili mewiliko lya Haimbili pamishangwa ndhoka dha ganjwa kuTransNamib yemwene.Haimbili na Funda oya tidhilwe kewilikongundu lya TransNamib momasiku 5 ga April. Konima ye tidho lyawo oya ningi eindilo lyeendelela kohofa yaaniilonga moVenduka , ya indile opo ya shunithilwe iilonga yawo. Oompata meindilo ndika odha li dha pulakenwa komupanguli Kobus Miller oshiwike shayi, omupanguli ina gandja etokolo lye kombinga yaashika note ke li gandja momasiku 14 ga May nuumvo. Haimbili okwa kutilwe miilonga mbika ongo omukuluntupitithi gwa TransNamib mokati ka January 2008 moshikako shomimvo ntano, shoka tashi hulu kwali mokati ka January 2013. Funda okwa kutilwe mu Maalitsa omumvo 2010 moshikako shiilonga oomvula ndatu. Omukalelipo gwopaveta gwa Haimbili na Funda, Raymond Heathcote okwa lombwele ohofa kutya aapopilwa ye oya li yena oku pewa ompito yi ipopile omanga inaa ya tidhwa miilonga. Heathcote okwa lombwele ohofa kutya ewilikongundu olyiihumbata ongo omweeti gwoshipotha, ombangi, omupulakeni gwiihokolola noshowo omupanguli. Okwa ti ewilikongundu olye ya lundile , ta li ya mono ondjo noku tokola kutya na ya tidhwe. Oshinima shika Heathcote okwa ti oshili, kondje yomautho gevulikitho ga TransNamib. Okwa ti otashi halutha shoka sha ningwa kehangano ndika onkene Haimbili na Funda oye na oku shunwa miilopnga mbala. Pehala lyewilikongundu lya TransNamib, Festus Lameck okwa popi okupitila mu hahende, Reinhard Totemeyer a ti ohofa yaaniilonga ka yina uuthemba oku pulakena iihokolola mbyoka molupe lweendelelo oku shunitha Haimbili na Funda miilonga unene sho mbaka ya li inaa ya gandja oshinima shina sha nokwaa uvathana pokati komugandji gwiilonga nomutaambi gwiilonga. Totemeyer okwa ti mbaka oya li yena oku gandja enyenyeto lya tya ngaaka ku komufala gwaaniilonga omanga inaa indila opo oshinima shokutidhwa kwawo shi pulakenwe.Totemeyer ina tala woo uupyakadhi mboka Haimbili na Funda taya ka taalela kombinga yoshimaliwa ngele ina ya shunwa miilonga.Okwa tsikile a ti ekwatathano inekelo pokati ka Haimbili newilikongundu olya tekapo kutya ngaaka oku mu shuna miilonga kashishi we ompito ta yi vulu oku talwa. Haimbili na Funda oya ti meindilo lyawo kutya oya li ya tidhwa pwaana ompito oku pulakenwa no inaa pa landulwa omikalo ndhoka dhina oku landulwa.Lameck na Taylor-Tjaronda oya ti Haimbili omanga inaa tidhwa okwa li a tuminwa omalundilo ngoka. Oya ti Haimbili okwa li ena ompito oku yamukula ngaka ndele aniwa ineshi ninga onkene, okwiiyugu uuthemba woku pulakenwa naashika osha fala mokutidhwa kwe.