The Hitman ota ka talelepo kOnooli mEtitano

Enyakwa lyUuyuni lyoongonyo mOshiviha Oshipu sho World Boxing Association (WBA) Paulus ‘The Hitman’ Moses ote ya okutalela po oshitopolwa shokOnooli mEtitano lyoshiwike shika, e ye a tyapule nokuulika esindano lye.

Omukwatelikomoho gwosheendo shika kOnooli tate Kapya Amupolo, okwa hokolola kutya elalakano lya The Hitman okuya kOnooli olyo okuulika epapa lye nokupandula mboka ya kala nokumuyambidhidha nokweeta wo epapa kegumbo lyaakuluntu ye pOkapya.
‘Osheendo otashi tamekele pokapale koodhila pOndangwa mpoka ta tu katamekela okuya kOshakati. Okuza kOshakati osheendo otashi ka kankama poClub The System pOkapya. Ayehe mboka ya hala oku mona The Hitman nenge epapa lye na ye yee nee ye mu tsakaneke poThe System.
Okuza po The System osheendo otashi tsikile shu uka kOndangwa poCOSDEC Centre mpoka tapu ka kala omatyapulo ga kwata miiti, okuza mpoka enyakwa otali ka udhapo manga olweendo lwesiku,’ Kapya ta popi ngaaka.
Molyomakaya, osheeendo sha The Hitman otashi ka tameka okuza mOndangwa okuya koshitopolwa shaHangwena. MoHangwena, The Hitman ota ka talela po Oshikango nOhangwena.
Pethimbo lyoshifo tashiyi momanyanyangidho, Kapya okwa tumbula kutya omolwa ompumbwe yoshimaliwa, inapu longekidhwa ehala mpoka tapu ka thikilwa nenge tapu ka ningwa omapyapulo gasha kosheendo shika.
Onkee nee, Kapya okwi indile kutya aanangeshefa mboka ya hala oku yambidhidha osheendo shika shi thikile pomahala gawo noku shi unganekela omatyapulo gasha, naa ninge omakwatathano naKapya kongodhi ndjika: 081 1248 220.