The Hitman ota ka talela po kErongo

ENYAKWA lyUuyuni lyoongonyo mOshiviha Oshipu moWorld Boxing Association (WBA), Paulus ‘The Hitman’ Moses mehuliloshiwike ndika ota ka ulikila oshigwana shomoshitopolwa sha Erongo epapa lye ndyoka a sindana omasiku ga zi ko mu Japan.

Omudheuli gwe Nestor Tobias okwa lombwele iikundaneki kutya The Hitman ota ka thika pokapela koondhila ka Mbaye potundi onti:11h30 ongula yonena, mpoka ta ka tsakanekwa ku Mayola gwondoolopa Uilika Nambahu, Kansela John Nangolo nosho wo kOokansela mElelo lyondoolopa ndjika.
Okuza mpoka, The Hitman ota ka ya nosheendo she ko Swakopmund, hoka ta ka talela po Ngoloneya gwoshitopolwa sha Erongo, Samuel Nuuyoma, Meya gwondoolopa Germina Shitaleni nOokansela mElelo lyondoolopa. Potundu ontitatu, The Hitman ota ka endithwa momapandaanda molukanda lwa Kuisebmond nomuNarraville mOmbaye. Okuza mpoka, ota ka ninga nee oshigongi naakwashigana mo Kuisebmond Hall potundi ontihamano. Molyomakaya potundi onti:12h00, The Hitman ota ka enda tulwa mOloli tayi ka za poshitaasi shokudhima omililo, ya thinda momapandaanda molukanda lwa Mondesa, Tamariskia na Vineta. Konima yaashika, The Hitman ota ka kuutumba nee noshigwana mOsaala ya Meduletu petata lyontano.