Taya pandula noonkondo kwaa shoka we ya ningile

OFAMILI yOmusita Josef Avia mOngwediva mOshitopolwa sha Shana otayi gandja olupandu olunene kwaayehe mboka ye ya kwathele shi na sha nepango lyomumati gwawo Mandume (John Black) Avia ngoka e li mepango enene lyomukithi gwo kankela.

Tate Josef Avia na meme Ndiyakupi Avia, taya ti epango lyomumati gwawo onkee tali tsikile natango.Tashi ti Mandume onkee ngaa e li momake gOondohotola.Omathimbo ga zi ko, tate na meme Avia oya li ya indile koshigwana shi ya kwathele oshimaliwa omoluepango lyomumati gwawo, noyendji yomoshigwana oya li ye ya yamukula noku ya pa ekwatho lyoshimaliwa, shoka ya longitha okupangitha nasho manga omumati gwawo.Otaya ti nee kutya otaya pandula noonkondo oonakuyakwathela mbaka, kutya nee opashimaliwa, opambepo-pamagalikano, opahungomwenyo nopa ku ya tsa omukumo.Sho nee epango ta li tsikile natango ngeyi, tate na meme Avia onkee ngaa taya konkola komiyelo dhaasihenda ye ya kwathele natango. Taya ti epango lyomumati gwawo oli li paendondo. Ondondo yotango, epango lye ndyoka lya ningilwe kOkapa ko South Africa okuza Omwedhi Januali sigo Maalitsa nuumvo, nepango etiyali otali ka kala ko momwedhi nguka Septemba 2009, natango tuu kOkapa ko South Africa.’Oshigwana oshisimanekwa, tse aavali ya Mandume, otu uvite kutya ekwatho lyoye, otali ka endelelitha okukala po nawa komumati gwetu. Onkee otatu mu pandula shili noonkondo nonesimaneko alihe, sho mwe tu kwathela notamu tsikile noku tu kwathela natango, ‘tate na meme Avia taya ti ngawo nokupandula oshigwana sho tashi ya kwathele mepango lyomumati gwawo nguka.