Taya kongo uuyuki molwa omahepeko ya ningilwa koSwapo

AATOTIPO yongundu yo Rally for Democracy and Progress oya indilwa opo yi ikaleke kokule niilonga iiwinayi mbyoka ya longelwe ko Swapo mokuhepeka aaNamibia yamwe pethimbo lyiita yekondjelo manguluko.Eindilo ndika olya ningwa ku Carola Engelbrecht gumwe gwomaatotipo yehangano lyedhina Citizens for an Accountable and Transparent Society.

Engelbrecht okwa ningi eindilo ndika osoondahaa ya yi pethimbo lyedhimbuluko lyomadhipago pokamba ya Mboroma moZambia omasiku 5 ga Auguste 1976.Engelbrecht okwa ti oRDP oyina okwiitedhulula noku pula edhiminopo omolwa omahepeko ngoka aawiliki yamwe ya li ya ningile aaNamibia aakwawo pethimbo lyuupongekwa omanga yo ya li mewiliko lyoSwapo.Oshilyo sho RDP megumbo lyokutota oompango , Kandy Nehova sho sha pulwa kombinga ye indilo ndika osha ti omutoolinkunda na ka pule koombelewa oonene dho RDP.Ongundu ndjika oya dhikilwe po ku Hidipo Hamutenya ngoka a li gumwe gwaanambelewa aaanene yo Swapo. Iilyo omathele yo Swapo oya kanithile oomwenyo dhayo momalambo gomo Lubango mo Angola molwaashoka ya lundilwa kutya oya li iilongithwa yepangelo lya South Africa.Mboka ya hupa momahepekop poLubango oya galuka nokuhokolola nkene ya li ya hepekwa nomonkalo moka ya limo. Oshiningwanima shika osha topola omazimo sha landula oongundu dhopolitika, moka aayambidhidhi aanene yo Swapo ta yi ipumu mumwe noyana mboka yeehamekwa noya uvithwa nayi kongundu ndjoka ya li yiitaala muyo. Ongundu yo Swapo oya tindi oku gandja ombili kwaamboka, naawiliki yongundu ndjika yopombanda oya ti opwa li pwa ningwa omapuko kombanda yoshilongo.Miikundaneki omasiku gaziko otaku tiwa omuwiliki gumwe gwoSwapo ngoka a hala oku ninga omuperesidende gwoshilongo okwa ti aniwa na ye okonyala a kwatwe, na osha li tashi vulika opo naye a tulwe momalambo gomoLubango ngele andola okwa kwatelwe. Pethimbo lyoonkundathna kombinga yedhiminathanopo lyopashigwana moparliamende omumvo 2007, Omuprima Nahas Angula okwa tile iilambo yokoLubango oyo oshiponga shiita yemanguluko, nosho eiyuvo ewinayi nolyeehameka ku kehe gumwe. Okwa li a ti opwa li pwa tokolwa okugamena ekondjelomanguluko moku ikalekela aantu yamwe molwaashoka taku tiwa oyo oondaadhi.Okwa ti iilambo ya Lubango osho oshinima omuntu kehe a hala okuhenuka noshowo oku shi dhimbwa.Okwa ti aantu oya mona iihuna nayamwe oya kanitha oomwenyo dhawo, omaliko gawo oga li ga hanagulwa, nethimbo ndyoka olya li lyuuwehame. Oshinima oshikwawo tashi landula oSwapo ooshoka shomwaalu gwaantu yamwe ya li kombanda mboka yaashiwike kutya oye li peni sigo oompaka. Edhipago lyopoMboroma lyaantu oyendji olya ningilwe momumvo 1976 moZambia sho aaNamibia omathele mboka aniwa ya li ya kwatwa mookamba moZambia, palombwelo lyo Swapo ya dhipagwa.Edhimbuluko lyesiku ndika olya li lya longekidhwa kehangano lya Breaking the Wall of Silencepamwe naandyoka lya Forum for the Future noshowo NamRights. Oyendji mboka ya hupa moMboroma noshowo mo Lubango oya li yena omeho guudha omahodhi esiku ndyoka sho ya hokolola shoka sha ningwapo nonkene ya hupu.