Tatekulu Ya Toivo a simanekelwa Ombandi ye ku kuume ke

EPENDAFULE lyOpolotika lya Namibia ngoka wo a kala kwali Ominista mEpangelo lya Namibia, tatekulu Herman Andimba Toivo ya Toivo ngoka a pelwe Ombandi yesimano yOshisiliveri ya O.R. Tambo kOmupresidende omukulu gwa South Africa Kgalema Moltlanthe pamwe noshigwana ashihe sha South Africa, mOsoondsaha yeti 24 Mei 2009, okwa li a ningilwa oshituthi oshinene shoku mu simanekela Ombandi ye ndjoka ku kuume kekopothingo Omundohotola Otto Mwandingi Kapia pamwe negumbo lye pOndangwa.

Oshituthisimaneko nepandulo kumwe shoka, sha li sha kalwa kOmuprima gwa Namibia Omusimanekwa tatekulu Nahas Angula, kOoministeli dhEpangelo, kOndjayi yIita Leitenande-Ndjayi Martin Shali, kAanambelewa Aakuluntu mEpangelo noyOmahangano gaashi gEpangelo naangoka ga yama kEpangelo, kAaleli yOpambepo noyOpamuthigululwakalo, kAanangeshefa, kAanafaalama, kAalongisikola, kAapangi noshowo kaanyasha nokaawiliki yi ili noyi ili yopashigwana, sha li sha wilikwa kOmupopiliko gwOmbaanga ya Standard moNooli tate Paul Nakawao nOmulongisikola moUNAM yomoNooli mOshakati Seesitela Ndapewa Shifiona, osha li sha tamekwa nElongelokalunga kOmusita tatekulu Efraim Angula, ta yambidhidhwa kOmusita omukwawo tatekulu Titus Kasindani Ngula, sha ningwa konima sho mwene gwegumbo Omundohotola Otto Kapia a taamba aanashituthi pambapila ye ya leshwa ku kuume ke tate Sacky Ekandjo.
Omunashipundi gwElelo lyoshilongo shOndonga Elenga enene lya Ngula yaNetanga tatekulu Petrus Kauluma oye a eta po oshipopiwa shepandulo shOmukwaniilwa gwOndonga tatekulu Immanuel Kauluma Elifas, nokwa pandula noonkondo sho aawiliki yoongundu dhOpolotika ya li ye ya pamwe koshituthi shoka.
Tatekulu Kauluma ta ti osho nashi kale ngeno ngawo,
aawiliki yetu yOpolotika taya etha po mbyoka yoopolotika uuna ku na oshituthi she ya pamba ayehe pamwe, ngashi shika. Meme Magano Maria Kapia
ta gandja Onzapo yEpandulo nEsimaneko ku tatekulu Ya Toivo pamwe nomukulukadhi gwe meme Vicky yaToivo. Meme Loide Mweendeleli ta eta po oshipoiwa she shokupandula nokusimaneka Ependafule tatakulu Ya Toivo. Omupopiliko gwElelo lyaNdonga Elenga enene tatekulu Boas Mweendeleli, oye a pewa ompito pehala lyElenga enene lya Ndangwa tate Nangombe John Walenga, a tseyithe Tatekulu mwene gwOshituthi Herman Andimba Toivo yaToivo noku mu pa ompito a popithe aanashituthi.
‘Yakwetu, onda hala oku mu pandula amuhemuhe noonkondo, unene onda hala okupandula kuume kandje kopothingo Omundohotola Otto Mwandingi Kapia nomukulukadhi gwe meme gwIindongo Maria Kapia, sho ya longekidhila ndje oshituthi oshinene shi thike mpaka nosha simana noonkondo ku ngaye, komukulukadhi gwandje nokOfamili yandje ayihe. Tangi nunene, Kalunga ne mu yambeke, nonda hala okutya epapa ndika, ano ombandi ndjika nda pewa komupresidende omukulu gwa South Africa Kgalema Moltlanthe nokAasouth Africa yakwawo ayehe, kayi shi yandje ongaye ike, oyetweni atuheni, oyAanamibia atuheni, okee tu isimanekeleni Ombandi yetweni ndjika, epapa lyetwen i ndika,’ tatekulu Andimba Toivo yaToivo ta ti ngawo omanga aaanashituthi taya ligola nokukaluka. Oshipopiwa oshinene osha li shi na okuningwa kOmuwiliki gwOpaigwana gwo SABC, ashike kali a vula okuthika.
Tatekulu Andimba Toivo Ya Toivo okwa pewa oshipundi oshiwanawa noshondilo shokuninga omadhewo golutu nokumbyangwaambyangwa, oshiwanawa noshondilo, e shi pewa ku kuume ke Omundohotola Kapia yo nomukulukadhi gwe meme Maria Kapia.
‘Hangame awike nde shi ku pe, oshipundi shika, ihe otwe shi ku pe tse atuhe ookuume koye,’Omundohotola Kapia ta lombwele tatekulu Ya Toivo ngawo sho te mu pe oshipundi shika oshiwanawa noshondiloOshituthi shika sha li oshiwanawa noonkondo, nosha patwa negalikano kOmusita tatekulu Efraim Angula, osha li sha tyapulwa kwaayehe ya li pOondohotola Kapia mpoka.