OMUKOKOLIPRESIDENDE tatekulu Sam Nujoma oku li mongundu yaailongo mOunivesiti ya Namibia ye li 1 401, mboka taya ka pewa oonzapo dhawo ngula sho ya mana omailongo gawo mOshiputudhilo shika shopombanda.
Oshituthi shegandjo lyoonzapo kaalongwa mbaka otashi ka ningilwa mOhotela ya Safari Court Hotel mOvenduka. Momumvo 2006, konima sho a a zi ko koshipundi shUupresidende kOmupresidende Hifikepunye Pohamba, Nujoma okwa li a tokola okukutha okoosa yo Master Degree yokwiilongela iikwamamanya mu Unam.
Pethimbo ndyoka okwa li e na oomvul 77. Pethimbo lyiikako ye itatu koshipundi shUupresidende, Nujoma okwa kala aluhe nokupopya kutya Namibia oshilongo shi na uuyamba oundji wopauntshitwe, mboka u na okuhadhwa mo opo oshilongo shi hume komeho.
Pethimbo Nujoma a kutha okoosa ndjika, Omukuluntuwiliki wga Unam Omuprofesora Lazarus Hangula, okwa li a popi kutya etokolo lya Nujoma okukutha okoosa ndjika oshinima sha nyanyukilwa kaaniilonga nosho wo kaalongwa mu Unam.
Kepulo, Omugandjimulombo gwa Nujama, John Nauta, okwa tindi oku shi koleke kutya Nujoma ota pewa onzapo ye nena.
‘Omolwashike ito pula Ounivesiti,’ Nauta ta popi ngaaka. Nande ongaaka, Omugandjimulombo gwa Unam, Utaara Hoveka, okwe shi koleka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
