Tatekulu Oswin Mukulu a hanganitha aatekulu ye

ELENGA enene lya Mbalantu moshitopolwa sha Musati Oswin Mukulu, mEtitano lya zi ko okwa li a ithana aatekulu ye ayehe oyendjiyendji, okuza tuu pwaamboka yosheeli she meme Bernadette Mojekwu nayakwawo ayehe kOmbala ye kOhamautsi noku ya ningila oshituthi/opaati yawo yOkrisimesa pamwe, nelalakano lyoku ya hanganitha nokumona wo ompito e ya shiwe, ye mu shiwe, e ya popithe noku ya pe omakumagidho goshikuluntu,gopamuthigululwakalo nogopahungikolupale.

Elenga enene Mukulu tali lombwele aatekulu yalyo poshiithanene shawo pegumbo lye mpoka, kutya shoka a pumbwa kuyo note shi ya kumagidhile, evuliko kaakuluntu, okusimaneka aakuluntu, okugwanitha nokuvulika kooveta dhoshilongo, kutya nee oondhoka dhOpamuthigululwakalo nenge ndhoka dhOpashinanena, naashoka wo a hala kuyo oshinenene osho okudhiginina osiklola, okudhiginina eilongo, opo ya ka kale oongandi monkalamwenyo yawo.
‘Onda hala ndi mu lombwele kutya, ngaye kune onda hala ko ashike omaguwo omaluudhe geilongo. Ogo nda hala mu etele ndje ngoka.
Kehe gumwe gwomune na kondje neilongo lye ndele sho te ya ku ngaye ota etele ndje eguwo ndjoka eluudhe lyeilongo nokambale keilongo komutse. Kehe gumwe kondja opo wu etele ndje eguwo ndjoka. Otandi ku pandula, sho to ya kungaye, to ti tatekulu osho ndi ilongo, osho nde li mono, olyo ndika nde ya ndi li ku ulikile,’ Elenga enene tali lombwele aatekulu yalyo ngawo.
Tatekulu Mukulu okwa kumagidha aatekulu ye yi ikaleke kokule niinima iiwinayi, oshoka yimwe otayi ya etele omikalo omiwinayi inaye shi tegelela noku ya etala wo omikithi nosho tuu.Elenga enene olya li lya tselele aatekulu yalyo mbaka ondumetana onene lela, ya yahwa nondjembo ye hyosalupenda kugumwe gwomaatekulu ye Anton Mojekwu. Te ya landele iinamunate neejuusa, ndele taya tyapula nawa oshiithanene shawo shoka, pamwe nomalenga gamwe omanene ga
Mukulu, ooyene yomikunda, aashiinda nookuume.
‘Otwa tyapula nawa lela shili notwa pandula tatekulu gwetu sho e tu ithana ngeyi tu ye tu mu shiwe pamwe nameekulu gwetu naanegumbo lye ayehe, tse wo tu ishiwe ngeyi, unene kutya otu li ya ngapi, otu li peni nosho tuu. Otwa pandula unene na tatekulu a tu mu halele omwenyo omule
kombanda yevi,’ Anton na Kornelia taya ti ngawo.
Limwe lyomOmalenga omanene ga Mbalantu tatekulu Petrus Aipanda ngoka a li wo poshiithanene shoka okwa pandula noonkondo tatekulu Mukulu sho a ithana aatekulu ye noku ya lombwela sho ye a hala ya kale noku ya kumika moshinima shevuliko, esimaneko lyaakuluntu nooveta dhoshilongo, oshowo okuya tsa omukumo yi ilonge nuudhiginini noye kiilikolelele oonkatu dhelongo monkalamwenyo yawo.