Ta ya longele kumwe moKunene

OONGUNDU yo DTA no UDF odha shaina euvathano lyokulongelakumwe opo dhikale natango tadhi kwatele komeho oshitopolwa sha Kunene, melelo lyopashitopolwa. Sigo oompaka oongundu ndhika mbali odho tadhi wilike oshitopolwa shika omanga ongundu yo Swapo oyi na mo ashike omuwilik gumwe moshikandjohogololo shimwe. Euvathano ndika olyo etiyali oongundu ndhika tadhi tungu.

Lwotango oongundu ndhika odha li dha uvathana momayovi 2000 okulongela kumwe opo dhi keelele ongundu yo Congress of Democrats yi ninge ongundu yompilameno yopambelewa..Opwa tegelelwa kutya oongundu odhindji otadhi joina elongelokumwe ndika kakele kongundu, yo All People’s Party, ndjoka ya tindi oku gandja ehala lya yo miikandjohogololo yimwe moKavango ando opo yi yambidhidhe oongundu dhilwe.Ongundu yo Rally for Democracy and Progress oya tindi woo okulongelakumwe.Amushangandjayi gwo DTA, McHenry Venaani okwa ti oonkundathana ndhika odho ku longelakumwe ndele kadhi shi ndhoka dhembuinda. Elalakano lya dho okuhumitha komeho uudemokoli woongundu odhindji. Okwa ti oongundu dhompilameno otadhi longo opo dhi hulithe po ewiliko lyoshilongo aluhe lyongundu yimwe oyo ayike. Okwa ti omathimbo ogendji oongundu ndhika ohadhi kana ashike nomawi omashona molwaashoka odha topoka, a ti elongelokumwe otali etele oongundu ndhoka uuwanawa.Venaani okwa ti epangelo oli shishi kutya opena oonkundathana dhokulongela kumwe, onkene lyo olya tokola kutya ota li lundulula ompango yomalelo giitopolwa opo omuwiliki gwoshitopolwa kehe a ulikwe komuperesidende. Shika ngele osha ningwa nena omuwiliki gwoshitopolwa sha Kunene ota ka ulikwa komuperesidende nonando elelo lyoshitopolwa olili kohi yoongundu dhompilameno.Venaani okwa ti epangelo oli na okweetha okuthiminikila aantu yalyo kombanda yoshigwana. Okwa ti shika otashi shuna Namibia komumvo 1992 sho iitopolwa ya li ya lelwa kookomufala ya ulikwa kepangelo. Epangelo ota li ka tula ontotwaveta poshitaafula mbala opo ndjika yi pe omuperesidende uuthemba okuulika oongoloneya yiitopolwa. Omuwiliki gwo DTA, Katuutire Kaura okwa ti ngele shika osha ningwa otashi ka nkundipika uudemokoli.