Ta kongwa kopolisi

OMUFEKELWA medhipago nekwatonkonga, Michael Tsowaseb natango ke wetike, konima sho a ndopa oku holoka mOmpangu yOpombanda ya Venduka piihokolola oshiwike shapiti.

Tsowaseb nomufekelwa omukwawo, Kinsley Dausab oya li ya tegelelwa oku holoka komeho gOmupanguli Nate Ndauendapo metamaneko lyedhipago, neshundulo lyomudhimba nuufuthi nomatamaneko gaali gekwatonkonga. Tsowaseb ina holoka mohofa na okwa li keepo sho Dausab a holoka oye awike metitatu lyoshiwike sha yi. Ndele molwaashoka Tsowaseb ka li po iihokolola ina yi vula oku ya komeho noshipotha osha tulwa momusholondondo gweholoko mohofa omanga iihokolola yoyene inaa ti yamo.Dausab na Tsowaseb oya tegelelwa ya holoke mOmpangu Yopombanda ishewe momasiku 27 ga Kotoba nuumvo.Opolisi ota yi tsikile oku konga Tsowaseb.Mbaka yaali ota ku tiwa oya kwata omukiintu nokumudhipaga pokati komasiku 3 sigo ga 4 ga September 2005 poShiwakopo. Tsowaseb na Dausab aniwa oya kwata koonkondo, Menesia Owoses, ngoka Epangelo lya ti okwa dhipagwa sho a pondwa.Tsowaseb na Dausab ota ya lundilwa kutya oya yonagula omudhimba gwa Owoses sho ye gu tete, nokugutsa, moshipala, mothingo, noshowo piilyo yopaumwene ye shi ningi nekende lya tatulwa, na ishewe oya lala nomudhimba ngoka. Aalumentu mbaka oya li ya pewa okwiifutilamo noodola omayovi gaali kehe gumwe momasiku 2 ga April 2009. Tsowaseb okwa li a egululwamo mondholongo sho iifuta ye ya li ya futwa momasiku 22 ga Mai 2009.Dausab oku li pondje sho iifutilamo omanga iihokolola yawo ya tegelelwa okutameka. Opolisi oya indile koshigwana opo shi gandje uuyelele mboka tawu vulu oku kwatitha Tsowaseb.Uuyelele nawu ukithwe konomola ya Detective Inspector, George Xoagub 0812778185 nenge Detective Warrant Officer Rafael Litota, 081256 5757.