Swapo okwa dopa okuungaunga noluhepo – Ovandjadjukununi

Swapo okwa kala nokunyengwa okuungaunga noikumungu ya fimana, ngaashi omaumbo, okuhena oilonga nokukufa po oluhepo, ovanandjungu osho va ti ngaho eshi ongudu ya dimbulukwa ewanifo lomido 65 mexuliloshivike.

Omundjadjukununi woikwapolitika Erika Thomas okwa ti oinima ei, okuyandja omayakulo opaundjolowele e na ongushu nomumbwe yomeva otai twikile okulandula ongudu.

“Nande nee otwa pandula Swapo eshi e tu mangulula, opolohalama yokutunga omaumbo natango otai twilikile nokulimbililika oshiwana, shaashi natango konima yeedula 35 omumbwe yomaumbo otai twikile ashike,” Osho a ti ngaho.

Okwa pula ngee ehongo oloshali ngaa shili eshi ovadali natango tava twikile ashike nokufuta ofikola.

Thomas okwa ti nande opu na eenghendabala di li moilonga, epangelo oli li konima momafaneko alo omayambulepo oshiwana.
Swapo okwa dopa okuwanifa po omaudaneko aye, osho a ti ngaho.

Sakaria Johannes okwa ti Swapo okwa longa oilonga ya nghundipala, okuyelakanifa naasho a ninga pefimbo lemanguluko.
“Kombinga yokutunga omaumbo, okuhena oilonga nefikopamwe okwa dopa,” Osho a ti ngaho.

Okwa ti Swapo okwa fyuululwa eeveta depangelo lokatongotongo odo de mu imba okuungaunga oikumungu ngaashi edu, osho sha imbaa wanife po omaudaneko edu.

Johannes nande ongaho, okwa ti eyokomesho ola ningwa moshikondo shehongo noundjolowele, nosho yo mokulonga eendjila.

Natango, hamushanga wevavav lovanyasha loSwapo Ephraim Nekongo Omaandaxa okwa ti:”Eshi hatu tale monakwiiwa, otwa mona omumbwe yokutwikila nokuyambula po oikondo ya yooloka.”

Okwa ti ongudu otai lalakanene okutota eemhito dihapu dovanyasha va kufe ombinga mepangelo nomokuninga omatokolo.

Okwa ti oshinima shimwe oshoSwapo a ninga shakula oku shi pondola mokumangulula oshilongo – ondjokonona oyo ya eta oudemokoli nokuyambula po oshiwana. Nekongo okwa ti nande opu na omapuko onhumba, ongudu oya ninga oinima iwa moikondo ya yooloka, ngaashi ehongo.

“Elitulemo letu mehongo ola nghonopeka Ovanamibia vahapu,” Osho a ti ngaho.

Okwa ti ewedelo loipangelo, ola yambula po eenghalamwenyo nola shonopeka omafyo pefimbo lokumona ounona. Eenghendabala dokulwifa oHIV-AIDS nokuyambula po omayakulo opaundjolowele okumona ounona nado oda ninga lela nawa, osho a ti ngaho.

Okutala vali keeproyeka domatungo nako okwa xwaxwameka eenghalo dovanhu nokwa yambula po eliko koitopolwa yokomikunda nomeedoolopa.

Nekongo okwa ti ongudu oya kwatela komesho omilandu odo tadi popile efikopamwe loukakwashikekookanhu nosho yo enghonopaleko loiwana oyo ya kala nokulyatelwa pedu, tai lalakanene okukwashilipaleka kutya Ovanamibia aveshe otava dulu okutya sha nove na eemhito.

Nekongo okwa ti ongudu oya longa noudiinini mokumbwalangadjeka eliko, okutwa ovanageshefa omukumo moikondo ngaashi omatalelepo, ounamapya nounaimuna noikwanghono, oyo ya fimana meyambukepo laalushe.