Swapo oku li othika, i ilongekidha, Mbumba ta ti

AMUSHANGA-NDJAYI gwopevi gwo Swapo, tate Nangolo Mbumba, okwa ti opaati yawo otayi yambidhidha Omupresidende Hifikepunye Pohamba okuudha na oyi ilongekidhila Omahogololo gAayehe nogOpaupresidende, ngoka taga ka kala ko mu Novemba nuumvo.

Mbumba shika okwe shi popi mOmaandaha mOvenduka, pethimbo a li ta yamukula komapopyo kutya mokati kaawiliki aakuluntu yo Swapo omu na etopoko na oshinima shika oshi aniwa sha eta Omupevipresidende gwo Swapo Hage Geingob, na Amushaga-Ndjayi gwOpaatu Pendukeni Iivula-Ithana ya kale inaa ya koshigongi sho Swapo shoka sha li sha popitha kOmupresidende Hifikepunye Pohamba pOhangwena omasiki ga zi ko. ‘Kapu na eimboikoto lya sha mpaka. Opaati oya thikama po miilyo. Katu na iilyo mbyoka yi na okukala ya ya koshigongi kehe,’ Mbumba ta popi ngaaka. Shika oshikando oshitiyali Swapo ta ningi oshigongi shaanankundana, okulombwele oshigwana kutya yo oye li pamwe nOmupresidende gwawo.
Oshipopiwa sha Mbumba osha ningwa unene okuyamukula komapopyo kutya oshigongi shokOhangwena osha li sha longekidhwa kEgumbo lyEpangelo na Ngavena yoshitopolwa sha Hangwena, Usko Nghaamwa, pehala lyokulongekidha kOmbelewa onene yo Swapo.
Mbumba okwa ti osho shili kutya oshigongi osha li sha longekidhwa ku Nghaamwa molwasoka osha li oshigongi shopashitopolwa. Okwa ti Omupresidende okwa li a popitha oshigongi shika molwashoka, ka li ta vulu okuthiga po oshitopolwa ine ya kunda.
Pohamba okwa li a popi uule woowili ndatu lwaampoka poshigongi shika. Mboka ya li poshigongi shika oya ti kutya Pohamba okwa li a fa ta gandja oshipopiwa kombinga yaampoka pwa thikama oshilongo.
Aawiliki yalwe aakuluntu yo Swapo mboka kaya li po wo poshigongi shika oyo. Jerry Ekandjo, Abraham Iyambo, Elijah Ngurare na Errki Nghimtina, ngoka naye a li wo moprograma.
Mbumba okwa ti omapopyo kutya aantu mbaka oya li ya boikota oshigongi shika, oshi li ashike omafekelo giifundja ga RDP.
‘Aawiliki ayehe mboka taya popiwa AakwaSwapo na oya tala ko Swapo ong’egumbo lyawo lyopapolitika. Omuntu oto boikota ngiini egumbo lyoye,’ Mbumba ta ta popi ngaaka.