Swapo a ulika oonkondo dhe mOshakati

ONGUNDU yOswapo osho ya ulike oonkondo dhayo, sho AakwaSwapo ye li momangungo omanene ya mbombolokele kOkapale okanene kOmaudhano ka Shakati mOlyomakaya ga zi ko nokukapulakena ketumwalaka lyOmuperesidende, Hifikepunye Pohamba, ngoka a li a ende pamwe na Amushanga Ndjayi gwOswapo me, Pendukeni Ivula Iithana nOoministeli dhilwe.

Engathithi lyAakwaSwapo lya li pOkapale okanene komaudhano ka Shakati mpoka, olya ethwa mo nale moNamibia nolya li lya kumitha oyendji ya li mpoka. Aakwashigongi oya udhitha oopaviliuna oonene mbali, dhokapale noshigwana oshindji osha kala momunkulo gwOkapale hoka, omanga yamwe ya kala pondje yako. Gumwe gwomaalongekidhi yoshigongi shika, omunangeshefa a tseyika nawa tate John Shikongo,okwa ti kutya omalongekidho oga enda nawa unene molwashoka aanangeshefa yOswapo oya longela kumwe nawa nOmbelewa yOmupongololi gwOswapo mOshitopolwa sha Shana omusamane Erastus Uutoni melongekidho lyoshigongi oshinene shOswapo shika. Ta ti Aananngeshefa mbaka oya gandja omaloli omanene ge li pomulongo naga hamano lwaampoka ga tutile AakwaSwapo kOshigongi shoka okuza kIikandjohogololo omulongo nosho tuu mOshitopolwa sha Shana.AakwaSwapo mbaka oya kala momikweyo ongula onene, taya hadhwa pomiyelo dhokuya mOkapale moka kopolisi nokukutha omahala gawo koopaviliuna ndhoka mbali, opo ya pulakene nawa etumwalaka lyOmupresidende Pohamba, naawiliki yalwe yOswapo mboka ya popi pOshigongi mpoka. Opolisi, oya kala nokulonga neitulomo enene opo yi hadhe kehe ngoka ta yi mOkapale moka, ashike nee, osha ka kala oshidhigu okuyoolola mo, aawiliki aakuluntu paendondo dhi ili nodhi ili noku ya pa oompito tango ya ye mOkapale, manga inaya undagulwa. Nonande aantu ya tameka okuya mOkapale moka okuza manga omugoyi gwongula inagu dhenga, oshigwana oshindji, sigo opombali yomutenya mpoka pwa li pwa uthwa pu tameke oshigongi, osha kala natango tashi thiminike okuya mOkapale moka,nashi Omuperesidende a thiki mpoka konima yOmbali yomutenya, oshigwana osha kala natango pomiyelo mpoka tashi hadhwa nokwiithiminika shi ye meni, omanga shimwe oshindji sha kala konimayondhalate yOkapale hoka sha pulakenene ewi lyOmupresidende gwasho. Mokupopitha nee oshigongi, Omupresidende Pohamba okwa pandulaOmuunganeki gwOswapo mOshitopolwa sha Shana kumwe nOmbelewa ye ayihe noshowo aayehe ya longekidha nawa.Omupresidende ta pandula wo ayehe ye yile koshigongi shoka nokuulikakutya oshigwana oshindji sha Namibia onkee tashi tsikilenokuyambidhidha Oswapo.Omupresidende ta lombwele oshigwana she mpoka kutya oSWAPO ndjoka oyo ya mangulula Namibia muupika waakolonyeki, noya lele nombili Namibia uule woomvula omilongo mbali dha piti po, onkee yi ilongekidha natango okulela Namibia noku mu humitha komeho.Omuperesidende ta indile koshigwana sha Namibia shi tsikile nokuhogolola Oswapo yasho naaleli yawo opo ya tsikile nooprograma ndhoka ina, manuthulula natango, nota ende te dhi mana pamathaneko ngoka a tula po. Ta kumagidha nokulondodha oshigwana sha Namibia kombinga yOongundudhOopolotika ndhoka dha totwa dhi li paukwamuhoko noshowopaumwayinathana, paufamili. Ta ti oongundu dha tya ngawo kadhi na sha nuuwanawa waayehe, ihe odhi na sha ashike nomauwanawa gaamboka ye dhi tota nenge gaamboka yomihoko dhawo.Molyomakaya, manga Swapo ta ningi oshigongi she mOshakati ye RDP ota ningi she mOluno mOndangwa, mOshitopolwa sha Shana tuu moka. AakwaSwapo nAakwaRDP sho ya thinda kiigongi yawo hoka , oya kala taya pingathana moondjila oonene moka ngashi unene mwaandjoka ya Ndangwa Ongwediva nOshakati.Osha li oshikumithi okumona sho iilyo naayambidhdhi yOongundu ndhika mbali ye li miiyenditho yawo tayi pingathana, tayi ulike nombilinomandhindhiliko gOongundu dhawo, nonando mpaka naampeyaka pwa kalangaa omalaka gokwiiningilila mo. Komanda gwOpolisi mOshitopolwa sha Shana, Komufala gwOpolisi Ndahangwapo Kashihakumwa, kepulo, okwa lombwele Oshifo shika kutya, iigongi ayihe mbika iyali oya enda nawa.Ta ti inapu lopotwa nande eipumomumwe lyasha tali uvitha nayi.Komufala Kashihakumwa ta pandula noonkondo Opolisi ye sho ya longanuudhiginini mokukaleka po ompango nElandulathano. Ashike okwa pandula shi vulithe, aawiliki, iilyo naayambidhidhi yOongundu ndhika mbali,Oswapo no RDP, sho ya longela kumwe nawa nOpolisi nokuuvakoomalombwelo gOpolisi ngoka ya li ya pewa, opo iigongi yawo mbikaiyali yi ende palandulathano, ngashi osho shali. ‘ Ngeno osho ngaa oshigwana sha Namibia, tashi kala nokwiihumbata ngeyi, nena ombili nengungumano, ndyoka li li moNamibia, otayi kala ya kwashilipalekwa ethimbo alihe,’ Komufala gwOpolisi Kashihakumwa ta ti ngawo nenyanyu nokwiindila koshigwana shi kale aluhe tashi ihumbata ngawo nelalakano lyokukaleka po ombili,elandulathano nengungumano moshilongo.