Swanu ta konakona onkalo po Herero Mall moVenduka

ONGUNDU yo South West African National Union[Swanu] oya tumu osheendo shaantu yaali koHerero Mall moKatutura opo ya ka konakone, omakuyunguto ngoka ga li pehala ndyoka omasiku gapiti.

Omunashipundi shopolitburo shongundu ndjoka, Kuzeeko Kangueehi okwa popi metalelopo lyawo pehala mpoka etiyali oshiwike shika ati ye pamwe nomunambelewa mewiliko lyesiku kehe lyongundu oya pewa oshinakugwanithwa oku konakona nokugongela uuyelele kombinga yaashoka sha ningwa pehala mpoka naashoka tashi inyengepo ngashingeyi. Okwa ti onkalo oya nika oshiponga sha landula sho aantu ya umbwa kopolisi omasiku gapiti.Okwa londodha kutya ooyene yoositola pehala mpoka oshowo aalandi mpoka itaya kiidhidhimikila oshinima shoka, oshoka esiku limwe otaya ka ndwafuka yafa ohandje ndjoka tayi ka ninga omulilo.Oya ti oya gongele uuyelele okuza kaalandithi mpoka noshowo kaalandi , nagamwe oye ga kutha miikundaneki, sha landulako otaya ka pula ashike opolisi ombinga yayo yehokololo opo ya kale nehokololo lina oombinga adhihe.Okwa ti oshafa opolisi yoodheka okulandula aantu mboka haya landithile pehala mpoka, nenge taye ya hongakanitha. Ndele ongundu ye Kangueehi okwa ti ka yi shiwo kutya omolwashike shika tashi ningilwa, ndele elalakano lye nosheendo she oku pula opolisi opo yi gandje ehokololo lyayo moshinima shika..Kangueehi okwa ti okuna omaipulo kombinga yelongitho lyoondjembo noshowo ekuyungutop ndyoka lyali mpoka metitano oshiwike shayi. Aantu yaali mboka ya li ya kwatwapo kopolisi metitano oya holokele mOmpangu ya Mengestrata gwa Venduka moKatutura ya tamanekelwa okuponokela omupolisi, okutinda ya kwatwe, noshowo okuya moshipala iilonga yuuyuki.Samson Ngombe na Ngumenitize Katjimune oshipotha shawo osha undulilwa komeho sigo omomasiku 20 ga Septemba nuumvo na oyiifutilemo mondjedhililo oodola eyovi limwe ku Ngoma omanga Katjimune okwa futu omathele gatano.Etitano lya yi opwa li omakuyunguto shalandula oonkambadhala dhopolisi opo yeedhile oondingosho ndhoka ooyene yadho noshowo aalandi oya li ya tindi ndhoka dhi edhilwe. Oya li woo ya pula opolisi opo yi ulike uuthemba wawo woku pata omahala ngoka pambelewa, ndele opolisi inayi wu gandja oya ka tala yalwe.