Standard Bank ota kwathele mewapalekululo lyOshipangelo shaShakati

OMBAANGA ya tseyika nawa ya Sandard Bank Namibia, oya tokola okukwathela Uuministeli wUuhaku nIilonga yOnkalonawa mewapalekululo netungululo lyOosala nUuklinika mOshipangelo shEpangelo sha Shakati sho omasiku ga zi ko ya kutha moshiketha shayo okapandi kOodola Omiliona yimwe nomayovi omathele gatano yi longithwe meopalekululo ndika lya simana noonkondo kEpangelo nokoshigwana ashihe unene tuu shoka hashi mono omayakulo gopauhaku mOshipangelo shoka shEpangelo sha Shakati.

Oodola omayovi gomathele gatano odha longithwa po nale mokuwapalekululitha oshitopolwa shokupangela uunona mOshipangelo shika shEpangelo sha Shakati noshowo Oklinika yo CDC.
Metine lya zi ko, Omukuluntukuluntu gwOmbaanga ndjika ya Standard, omusamane Mpumzi Pupuma okwa li e ya okugandja pambelewa oshitopolwa shuunona mOshipangelo shEpangelo sha Shakati noshowo oshitopolwa nenge oklinika yo CDC
kOministeli yUuhaku nIilonga yOnkalonawa Omundohotola Richard Kamwi, ngashi ya opalekululwa nawa kOmbaanga ndjika noshimaliwa shoka shOondola/N$500,000.
Oodola dha Namibia emiliona limwe ndhoka dha hupa ko, Omukuluntu bgwOshipangelo shEpangelo sha Shakati Omundohotola Shannon Kakungulu, okwa lombwela The Namibian kutya otaya tala kutya otadhi ka longithwa mokuwapalekulula oshitopolwa nenge iitopolwa yini mOshipangelo shoka.Pupuma okwa ti kutya Ombaanga yawo oya tokola okukwathela Epangelo miinima yontumba noyongandi, unene tuu moshinima shonkalonawa yoshigwana.
Oministeli yUuhaku nIilonga yOnkalonawa Omundohotola Kamwi, okwa pandula
noonkondo Ombaanga ya Standard, unene tuu omukuluntukuluntu gwayo Pupuma kombinga yekeathelo lyawo enene li thike mpoka.
Omundohotola Kamwi ta ti Elelo lyOshipangelo sha Shakati otali ka eta po natango omathaneko ge li nawa kutya oshike shi na oku opalekululwa nenge okutungululwa noshimaliwa shoka sha hupa ko shomiliona yimwe.
Minista Kamwi ta indile kaaniilonga ye ayehe, Oondohotola, Aapangi naaniiolonga yalwe mOshipangelo sha Shakati nokIipangelo iikwawo, ya kale taya longo muukumwewumwe nopaithano lyawo. Ano kutya ya longe yaa na oondjoolola
yasha miilonga yawo.
Ta ti okwa kundana pu na yamwe yamaapangi naaniilonga yamwe haya hala ya ete iinima yOopolotika miilonga. Ta ti oshinima shoka nashi mone ehulilo neyakulo lyopauhaku nosho tuu nali pewe ayehe shi thike pamwe.
Oondohotola kumwe nAapangi naaniilonga haya longo moshitopowla shuunona noshowo mwaashoka sho CDC kumwe naayakulwa moka, oya nyanyukwa noonkondo kewapalekululo lya ningwa momahala gawo moka pakwathelo lyOmbaanga ndjika ya Standard Bank Namibia notaya pandula Epangelo, Uunministeli wUuhaku nIiloonga yOnkalonawa sho ye uvitathane nawa nOmbaanga ndjika ya Standard Bank ndele tashi eta ewapalekululo ewanawa lyiitopolwa mbyoka
iyali.
Taya ti kutya iitopolwa mbyoka oya tulwa lela pomuthika gu li nawa noshayela kutya naamboka taya yakulilwa mo oye uite uugumbo shi vulithe nale. Ngashi moshitopowla shaanona omwa tulwa nuudhanitho waanona, wo kudhana nawo manga wa tegelela okutalika kOondohotola.
Tamu tulwa wo uukolola waandjuka nawa wokuyakulila aavu, wu na iipundi
niitaafula yoonakuyakula aavu mvoka.
Omwa tulwa wo oshitopolwa shimwe shiigongi yOondohotola kumwe nAapangi moka taya vulu aluhe okuya ya kundathane iinima ya pamba epango lyaavu nenge okuya ya ka fudhe po moka.
Mu na iitaafula niipundi hyi li nawa lela. Koshitopowla sho CDC,ano kOklinika ndjoka oyo aluhe yi ipyakidhila naavu oyendji mOshipangelo shEpangelo sha Shakati, nako okwa tulwa oombaanga oondeendeka dhokukatuumbwa kaanuuvu sho ya tegelela omakonaakono gawo kOondohotola nenge ya tegelela omayakulo nomayamukuko gawo okuza kOondohotola nokaapangi.
Omwa tulwa wo nookoompiuta dhokugandja omauyelele kombinga yaanuuvu nosho tuu wiilonga tayi longwa moshitopolwa shoka. Omwa tungwa wo uukololo womayakulilo waandjuka nawa lela.
Aakwashigwana mboka taya pangwa moshitopolwa shika sho CDC , esiku ndjoka, oshitopolwa shika sha pewa Minista gwUuhaku Omundohotola Kamwi kOmukulountu gwOmbaanga ya Standard omusamane Pupuma, oya pandula noonkondo Epangelo, ano Uuministeli wUuhaku sho wa taamba ko kahewa kawo Standard Bank, e ya kwathe oshimaliwa opo ku opalekululwe ngeyi iitopolwa yomayakulilo mOshipangelo shawo shika, unene tuu oshitopolwa sho CDC, shoka sha tulwa oombaanga oondeendeka opo ya vule okukatumba ko sho ya tegelela omayakulo gawo okuza kOondohotola nokAapangi.
Ethano:Oswald Shivute
Methano otamu monika wo Gavena yOshitopolwa sha Shana omusamane Klemens Kashuupulwa (omutiyali okuza kolumoho), Omukuluntu gwOmbaanga ya Standard mOshitopolwa shomoNooli tate Matti Kanalelo (gwotango kolumoho) noshowo Omukuluntu gwOshikondo shOmalanditho mOmbaanga ndjika ya Standard tate Thaddius Maswahu (kolulyo).