SPYL a kuutumba shi na sha nomapopyo gOmupresidende

OKOMITIYE ompitithi yopashigwana yEwawa lyAagundjuka mo Swapo/National Executive Committee of the Swapo Party Youth League (SPYL) oya li ya ningi oshigongi uusiku wEtiyali, mpoka pwa li wo aniwa pwa kundathanwa kombinga yomapopyo gOmupresidende Hifikepunye Pohamba poshigongi shOkangundu okaningimatokolo gOpapolitika omenene mOpaati (Opolitiburo) sha li ko mehuliloshiwike.

Otaku popiwa kutya iilyo yimwe ya SPYL oyu uvite nayi sho aniwa Pohamba a lombwele oshigongi shOpolitiburo kutya Ewawa lyAagundjuka mo Swapo omwa monika ombululu kaazaizai, kaantu ya li iilyo yOkoevoeta nokwaamboka ya li nale aagundjuka yo DTA. Opaati yo Swapo inayi ikala omapopyo ngaka, ihe omuntu gumwe e li popepi nOmupresidende okwa ti iinima yimwe mbyoka ya holoka mOshifo shika kombinga yaashoka sha popiwa kOmupresidende, inayi ya mo ngashi e yi popi na kashi li shu uvika ko nawa. Omupresiende okwi ilongekedha aniwa okuyelithila SPYL nomahangano gaaniilonga kombinga yaashihe shika a popi ngele osha pumbiwa.
Oshipopiwa sha Pohamba sha kindja shoka a ningi poshigongi shika, okwa talika ko ong’oshizemo shokuunayi kwe kombinga yoonkambadhala dhi li konima yekuma tadhi ningwa mOpaati nelelakano ka ye mOmahogololo gOpaupresindende ngoka taga ka ningwa pehulilo lyomumvo nguka.
Pohamba okwa li aniwa popi kutya iilyo yo SPYL mbyoka inayi hala a ye mOmahogololo ngaka, nayi shi mu lombwele moshipala ye mu ukilila.
Okwa li aniwa e shi popi sha yela mo kutya ye okwa vulwa omahilathano mOpaati.
Oonzo dhomauyelele mo Swapo odha popi kutya Pohamba okwa li a popi kutya ota ka longitha oonkondo dhe ong’Omupresidende ‘okutula pevi iilyo (yOpaati) mbyoka tayi ihumbata nayi.’
Pohamba okwa popi wo aniwa kutya aagundjuka yamwe mbaka otashi vulika ya li nale iilyo yOkoevoeta, ye li aakwiilonga noya mono ombululu mOpaati okuza ko DTA. Iitayi yi ili noyi ili mo Swapo oya hala aniwa Hage Geingob oye a kale okandindate yo Swapo mOmahogololo gOpaupresidende, ihe opaati oya li nale ya tokola pOkongresa yomomumvo 2007 kutya Pohamba oye awike ta ka kala okandidate yOpaati.