Shovafitaongalo moNamibia xwangu

… ounona ve li 32 va ningilwa ominyonena dopaixulo moule weedula nhee

Pefimbo ashike opo kwa li e shi okwa mona olukalwa la amenwa olo tali mu vatele opo a dule okuya komesho nelihongo laye nokulongela Kalunga kaye keshe efiku, okakadona keedula 10 kokOpuwo oka mona oshinima shi kumwifa.

Oke ke lihanga taka kosho oiyaxa nomufitaongalo wako weedula 50, te ka pe oumbishinyu, ta kufa mo oikutu yako yee te ka ulikile oilyo yaye yopaumwene.

“Okwa li ndi li mokombifa handi wapaleke oiyaxa eshi kwa li ta kendabala okushuna nge, ashike okwa li nde shi anya. Okwa dula mo ombulukweva yaye etata ndee ta kufa mo oshilyo shaye shopaumwene . . ,” Okakadona osho ka lombwela opolifi ngaho.

Oshibofa shomutumwa waGerman Flick Ramon eshi ta ningile ounona omahepeko opaixulo okwa li sha andjakana nai momudo 2021 ashike natango otashi ningilwa omakonakono.

Oshifokundaneki shoThe Namibian osha mona omaumbangi hokololo oo nakuningilwa ominyonena okudja molopota yopolifi yopambelewa.

Okutula kumwe eelopota dopolifi oshilongo ashishe, okwa monika oshinima tashi kumwifa neenghono shovafitaongalo tava ningile ovanhu ominyonena dopaixulo va dja keengeleka da yooloka, mwa kwa telwa oshibofa shimwe shokaana ke na eedula omuwoi.

Moibofa imwe, ovakwaneongalo vovafita ava kala vehe shi kutya muhongi ota tamanekelwa oibofa i li ngaha.
OMWAALU

Omwaalu oo wa ya djwa kondjai yomatanga opolifi komufala Joseph Shikongo owa ulika kutya ovafitaongalo ile ovapolofeti ve li omuwoi okwa li va mangwa po okudja ngaa momudo 2021 shi nasha nomakwatongonga nominyonena dopaixulo, odo kwa li da kwatela mo ounona ve dulife po30.

Oshitopolwahoololo shaKhomas osha didilika omahepeko ahapu okudja momudo 2021, eshi kwa didilikwa oibofa itanho.

Oshitopolwahoololo shaMusati osha didilika oibofa itatu omanga Kavango Uninginino a didilika oshibofa shimwe.

Mokati koibofa ei omu na imwe ya ningilwa ounona ve li koshi yeedula 18, ovo va shona unene kamwe oke na eedula 9 omanga kamwe ke na 12, navamwe ve li vanhe ve li pokati keedula 17 no19.

‘PAPA RAMON’

Ramon oo e shiivike nawa nedina ‘Papa Ramon’ okwa tota po eumbo leefiye ledina Hope Kids, koshitopolwahoololo shaKunene, elalakano lohinima eshi okwa li okuyandja ehongo loshali kwaavo ve li momumbwe.

Moshitopolwahoololo omu na eepelesenda 40 doluhepo, onghee nee ovanhu itava dulu okufuta ehongo lounona vavo. Omuunganeki woimbuluma koshitopolwahoololo shaKunene omupedu komufala Paavo Iyaambo okwa ti Ramon va ti okwa heka ovadali opo va pitike ounona vavo e va pe ehongo loshali.

Omutumwa ou paife ota tamanekelwa oibofa yokuningila ounona omahepeko opaixulo ve li 11 veedula okudja pu5 fiyo 11, Iyaambo osho a ti ngaho.

“Otaku tiwa kutya omanga oukadona va li keumbo lomufeekelwa, okwa kala ta kwata oilyo yavo yopaumwena yee ta faneke vamwe manga kwa li ve li hamunghele,” Osho a ti ngaho.

Ramon okwa li a mangwa po momudo 2021 konima eshi kwa li a lopotwa koukadona, ovadali noshiwana shomomudingonoko, Iyaambo osho a ti ngaho.

Okwa li a holoka komhangu momafiki 29 Novemba 2021 nokwa li a pewa e lifutile mo noshimaliwa shi fike poN$50 000 muJanuali 2022 ashike nande ongaho okwa li a pulwa opo a yandje omikanda daye dokudja mo moshilongo kopolifi.
Ramon okwa li natango a kwatwa po muKotoba 2022 konima eshi natango a ningila ounona voukadona ve li vahetatu ominyonena dopaixulo.

OMULUMENHU WOKALAPI

Oshibofa shaRamon hasho shotete. Momudo 2019, okaana kokakadona keedula 17 kokOhangwena okwa li ka lombwela opolifi kutya omufitaongalo Onesmus Angula wongeleka yovakwaluuteli (Elcin) okwa kala nokukakwata ongonga oule weemwedi hamano. Omutumwa womwene ou okwa kala nokulandela okaana eepele dokukelela omateelelo. Angula naye okwa li a mangwa po kopolifi.

Omudo oo tuu oo, omufitaongalo wedina Marvin Damaseb (39) wongela yedina Holy Ghost Fire Ministry okwa li a mangwa po eshi kwa li a kwata po ombambyona nokukwata ongonga okakadona keedula 13 kOmbaye.

Paulus Panduleni woBurning Fire Ministry koSwakopmund naye okwa li a lopotwa kutya ota ningile ovakwaneongalo vaye omahepeko, eembambyona nomakwatongonga momudo 2019. Vati okwa li a patela nakuningwa oshihakanwa shaye umwe monduda yaye, omo a kala ta monifwa oixuna oule woivike itatu.

Momudo 2019 omufitaongalo wokOkahandja umwe naye okwa li a kwatwa po shi na sha nomakwatongonga. Oku na yoo noshibofa shokumitika po omonakadona waye.

LOMBWELA OMUNHU

Omuhungimwenyo umwe wehangano ledina Economy Foundation Elizabeth Viall okwa ti ngee omuponhokeli e na eenghono donumba moshiwana, ngaashi omufitaongalo, oonakuningwa oihakanwa luhapu ohava kala ve na oumbada kutya kapu na ou te va itavele.

“Otashi kala ondjila ya kukuta, ashike okulombwela omunhu opo ondjila tai ti po xwepo,” Osho a ti ngaho.