Shoti negumbo lye ya thigwa pomutenya

OMUKULUPE gwoomvula omilongoheyali (70) gwomomukunda Othika mUukwambi Taapopi Shithigona a tseyika wo nedhina Shoti, okwa thigwa pomutenya thiluthilu kumwe naanegumbo lye sho egumbo lye lya pi po komulilo momasiku 30 Septemba 2010.

Tatekulu Shithigona ota ti kutya sho ya tala omulilo ogwa zilile pomulilo gwa li gwa temwa poshoto nogwa thigwa inagu dhimwa kwali kuyamwe yomaanegumbo lye.Egumbo alihe olya pya po thiluthilu kumwe niinima yawo ya li moka, ngashi oombete, omakumbatha, oonguyo dhaakuluntu nodhaanona, iiyuma, iimbale niikwatelwa ayihe yomukulukadhi gwe, ano meme Cecilia Shilongo oya pya po. Tashi ti elugo lya meme Cecilia niinima yalyo, ngashi yi shiwike nawa paShiwambo, oya pya po thiluthilu, oodokumende dhawo, ano dhaakuluntu nodhaanona, ngashi unene oonzapo dhomavalo, Uukalata wopaumwene waakuluntu naanona, iimaliwa yi vulithe poodola dha Namibia omayovi gaali, ano yi li pooN$2200 lwaampoka, oongaku dhaakuluntu nodhaanona nosho tuu nosho tuu, ayiheyihe oya pya po. Tatekulu Shoti ota ti kutya oya adhika taya tungu ngeno oondunda dhoondhopi megumbo lyawo moka. Ya adhika nee ya landa Oosamende, Iipeleki nIipilangi, ayihe mbika oya pya po thiluthilu kumwe niikwathitho yi ili noyi ili yopagumbo.Tatekulu Shoti ota hokolola kutya megumbo lye moka oye li mo omulongonayane, naayehe mboka oya kanithila mo omaliko gawo momulilo moka. Ngashi ngaa aakalimo yamwe moNooli, iigandhi yawo hayi kala momapya, naambyoka ya tate Shoti, oyi li mepya, oometa ngaa dhontumba okuza pegumbo lye ndyoka lya pya po, ashike nande ongawo omulilo ogwa nuka okuza kegumbo ndele tagu kiidhenga ku limwe lyomashisha, ano lyiigandhi ye mepya moka noku li fika po ombinga yimwe.Omunona gumwe gwomunasikola mOgrade 12, Eino Elias, ha sikola pOthika Combined School, otaku tiwa kutya momulilo moka okwa kanithila mo Omambo ge gOgrade 12.Tatekulu Shoti Shithigona, ngoka ta pandula Kalunga molwashoka inamu pila omuntu momulilo moka, ota ti nee kutya okwa thigwa pomutenya thiluthilu komulilo nguka nokwa pumbwa eyambidhidho enene okuzilila moshigwana, mEpangelo, mElelo lyOpashitopolwa, mOmahangano, unene ngashi ngoka gOmushigakano Omutiligane nosho tuu mookuume. Tatekulu Shithigona pamwe nomukulukadhi gwe meme Cecilia naanegumbo lye ayehe otaya pandula noonkondo aashiinda naanamukunda gwawo Othika kumwe nookuume naakwanezimo mboka ye ya tondokela sho ya uvu uupyakadhi wawo mbuka. Unene ta pandula tate Abiatar Shikongo ngoka e mu etela ondumba yiihenguti a tameke okudhika nayo nande ngaa oondunda dhimwe manga. Ta pandula unene ngashi ootate Petrus Uudhigu nootate Petrus noshowo oomeme Klaudia Ndakolo noomeme Hilda Uudhigu nOotate Risto sho ya kala noye li ye na oshimpwiyu oshinene nayo omolu oshiponga shika oshinene shomulilo.