Shipoh a ninga kahewa kOsikola ya Kelemba noku yi pa omagano

OSIKOLA ya Kelemba mOukwanyama mOshitopolwa sha Hangwena oya pandula noonkondo Omundohotola Peingondjabi Shipoh, sho e yi pa okapandi kOodola dha Namibia omayovi gahetatu (N$8000) omasiku ga zi ko, ano meti 29 Novemba 2008, yi kiikwathele moompumbwe dhayo.

Omukuluntusikola gwa Okelemba Combined School meme Lylie Hangula ta ti Dr Shipoh, oku li kahewa kOsikola yawo ndjika note yi kwataha moompumbwe dhayo odhindji.Ta ti, N$5000 okwe yi pa kahewa ke omanga N$3000 e yi pa kahewa ke a ka lande oshiteta she shOmuthigululwakalo molwashoka Omundohotola Peingondjabi Shipoh oye tuu nguka okwa lukilwa wo Ongundu yOmuthigululwakalo yopOsikola ndjoka ya Kelemba, yi na nee edhina ndika; Dr Peingondjabi Shipo Cultural Group.
‘Uukahewa kOsikola ndjoka, Omundohotola Shipoh okwe wu taambele ko mu Mei 2008 nokuza mpoka okwa tameke ta kwathele noonkondo kahewa ke nguka.Meme Hangula ta lombwele The Namibian kutya Omundohotola Shipoh ota tsikile nokukongela kahewa ke omakwatho mookuume ke moka.
Hangula ta ti kutya omagano ngaka ga pewa Osikola ku Kahewa kayo, inaga gandjwa pwa ningwa oshituthi shasha manga omolu ethimbo lya pumba kashona, ashike taye ke shi ninga ngaa komeho, uuna tapu ka gandjwa sha natango ku kahewa ke nguka nosho tuu.
Ashike ota pandula noonkondo Omundohotola Shipoh pehala lyOsikola yawo ayihe, ano pehala lyaanasikola, lyaalongisikola, aaniilonga noshowo aavali yaanona haya sikola pOsikola mpoka.
Meme Hangula ta pandula wo noonkondo ookuume kawo yamwe, ngashi Mediva Fishing Company ngoka e ya tungila omala goongulu dhosikolage li gaali, ompungulilo noku ya pa iipundi ethele (100) niitaafula ethele (100) momumvo 2006, noshowo Nored ngoka e ya pa N$1000 momumvo 2007.
Meme Hangula ta indile kOmahangano galwe nokoohandimwe ya landule oshiholelwa oshiwanawa shOmundohotola Shipoh, Mediva Fishing na Nored shokukwathela Osikola yawo.
Ta ti otaye ke shi pandula noonkondo molwashoka oye na po uunona oundji, wu li 798 omanga pOsikola mpoka iikwaniipangitho yi li po tayi nyangwaanyangwa.
Aalonisikola mpoka oye li 19 naye a kwatelwa mo.
Osikola kayi na natango Amushanga, ashike oyi na omuwapaleki. pOsikola yawo mpoka onkee ngaa pu na omatsali nota indile koshigwana shi ya kwathele opo omatsali ngoka ga ende taga shonopala po, ndele haku enda taga indjipala mpoka, ngashi hanga osho shi li pethimbo ndika