Shikale a fumvikwa pEtilyasa

ENGATHITHI lyaalilasa olya li lya gongala pEgongalo lya Tilyasa mOlyomakaya ga zi ko mpoka lya li lye ya okuthindikila Omunangeshefa a tate Jairus Shikale, ngoka a manene oondjenda dhe ongulohi yeti 29 Kotoba 2009 mo Nandjokwe mepipi lyomimvo omilongontano na ne.

Oshituthifumviko sha tate Shikale,ngoka wo a tseyika nawa nedhina Punyu, osha li sha kalwa kOfamili ye,ano kOmukulukadhi gwe meme Abia noshowo kaanona ye , ye li omulongonayatano naatekulu, kAakwanezimo taya kwatelwa komeho kOmupeviminista Petrus Iilonga, naawiliki yOpamuthigululwakalo, taya kwatelwa komeho kOmukwaniilwa gwOndonga tatekulu Immanuel Kauluma Elifas, ngoka e li kuume kopothingo ka nakusa tate Shikale. Aaniilonga moongeshefa dhoPunyu.Omunangeshefa a tseyika nawa tate Prins Shiimi oye a lesha ondjokonona ya nakusa tate Shikale ye meme Ndilimeke Kandombo ta lesha ewi lyomuselekadhi omanga ewi lyaakwanezimo lya etwa po ku Minista gwOpevi Petrus Iilonga, Ewi lyaavalwa olya li lya kwatelwa komeho ku Loini Shikale na Fransina Shikale. Omumbiishofi Kleopas Dumeni, Omumbiishofi Apollos Kaulinge, Omusita Kasindani Ngula, Omusita Eliakim Iiyambo-Omuntu gwaKuku, oyo ya li noshimpwiyu shOmagalikano, Omauvitho noshowo eyapulo lyomudhimba, eyapulo lyombila nelaleko nuuyamba.Aanangeshefa mboka ya popi pehala lyayakwawo ngashi Omundohotola Frans Aupa Indongo, meme Martha Namundjebo Tilahun, noshowo Omunambelewa Omukuluntupitithi gwEhangano lyAanangeshefa tate Tarah Shaanika, oya indila kOfamili nokEwiliko lyOongeshefa dhoPunyu, kutya ngeno Oongeshefa dhoPunyu, dhi kalekwe po dhi li ngaashi dhi li. Lyo Ewilikongundu dhalyo, ngele osha pumbiwa, tali zulwa mo nawa nokukolekululwa, ndele ongeshefa tayi yi komeho yi li ngashi ya kala nenge shi vulithe po nokuli. Omupeviminista Petrus Iilonga, ngoka a ti kutya ezimo lyawo lyAakwanangombe olyas kanitha yimwe yomoongudhui dhalyo oonene.Tate Iilonga ta uvaneke kutya otaka sa oshimpwiyu opo ezimo lyawo lyAakwanangombe li kale li li kumwe ngashi nakusa Shikale a li a hala li kale li li kumwe. Ta indile koluvalo lwa Shikale lu kale mondjila ombwanawa noyayela moka ya thigwa kuhe. Omupeviminista ta pandula omushelekadhi meme Abia sho a longa nuudhiginini pamwe nomusamane gwe nokuyambula po oongeshefa dhawo nofamili yawo. mEtumwalaka lye Omupresidende gwoshilongo omusamane Hifikepunye Pohamba okwa tanga nakusa Shikale kutya okwa li Omunangeshefa omudhiginini, omukwatheli gwaayehe nokwa li e na omalalakano omawanawa gokuyambula po oshilongo.