Shigwana tu endekeleni hoka itaku ziya; Shailemo ta ti

PETHIMBO ta popitha oshigongi sho RDP pOkongo mOshitopolwa sha Hangwena, oshilyo shomOngundumutima gwo RDP, omusamane Ismael Shailemo, okwa indila koshigwana sha Namibia shi dhilaadhile nawa noshi endekele hoka itaku ziya.

Omusamane Shailemo ta ti; okwa dhidhilika kutya oshigwana sha Namibia kashi wete ko oshoka, oshi li tashi endekele hoka taku ziya nokukala moshipilili.Omusamane Shailemo ta ti, nonande aawiliki yamwe yOswapo taya ende taya popi iilumbu yi kuthilwe oohamala, Aanamibia oyendji oya lamba ko ashike ya panda sho yakwawo taku tiwa kutya naya kuthilwe oohamala nokudhengwa nadho.Shailemo ta ti, iilumbu mbyoka kwa tiwa, kutya nayi dhengwe noohamala, oyo hayi ningi oohamala nopethimbo ndika,oye dhi ninga nee ondilo. Omusamane Shailemo ta ti, nande ongawo, ota pandula ngaa sho Aanamibia oyendji taya ende taya dhimbulula kutya iinima kayi li we nawa mEwiliko lyOswapo notaya ende taya gama kombinga yelunduluko, ndyoka tali lalakanewa ko RDP.Omusamane Shailenmo ta ti, shampa wa mono omuwiliki ta kumike elongitho lyoohamala, nena kala wu shi shi kutya iinima kayi li we nawa,oya pumbwa elunduluko. Shailemo ta tsikile ko ta ti Omupresidende Hifikepunye Pohamba, sho e yile kOkongo, ndele poshigongi tapu kala kapu na aantu oyendji okwa tokolwa ku ka kuthwe mo aanona yomOseko yomOkongo, nashi omweelo gwa kala gwa patwa nekumba, okwa longithwa ohamala nenge oshitenda sha fa ohamala, opo aanona yaanasikola ya pandwe mo, yee koshigongi.’Ano ta kamitheni, ohamala ohayi teyagula,’ omusamane Shailemo ta ti ngawo nokutsikila ko ta ti Aanamibia naya tameke tayi ilombwele oshili.Ta ti oshinima shimwe shoka shi na okukala sha tulwa mondjila mondjokonona ya Namibia nekondjelomanguluko lye, osho shoka shokutya oolye ya tota po Oswapo naanaa. Shailemo ta ti ondjokonona yoshili, oyo ndjoka kutya OSWAPO oya totwa po komusamane Andimba Toivo ya Toivo,omanga omusamane Sam Nujoma ya tota po oSWANU. ‘Ano Omukokoli gwOswapo keshi Sam Nujoma, ihe oAndimba Toivo yaToivo.Ngele ano otamu ti, Omukokoli gwOswapo, oSam Nujoma, nena kaleni nee hamu mu ithana omukokoli lwaali, gwOSWANU nOSWAPO, ne tamu thigi po Toivo yaToivo.Ondi shi shi omapapa moNamibia, oga tsilikwa ohethi, ashike oondjokonona nadhi shangwe nawa,’ omusamane Shailemo ta ti ngawo nokwiindila kAanamibia ya longithe omadhilaadhilo gawo nawa nokutala iinima mbyoka yi li mondjila naambyoka ya puka. Ta ti oshigwana inashi kala ashike tashi ligola, tashi pandula omake nokuyelutha ongonyo nomiinima mbyoka kayi li mondjila, ano ya puka.Ta ti iinima yimwe mbyoka ya puka ongashi, oshimaliwa shoka sha li sha pewa Aanona yAanamibia mboka ya hepa ku China ye kiilongithe ndele tashi kuthwa po kaanenentu ya ka longithe aanona yawo kOosikola dhopombanda, mwa kwatelwa nokanona kOmupresidende gwoshilongo. ‘mOshilongo muka, omu na aantu taya pukitha oshigwana.Taya pukitha yakwawo, nondiwete kutya nOmupresidende okwa pukithwa.Kandi wete oye mwene shili, a tokola okanona ke ka pewe oshimaliwa sha li sha nuninwa uunona uuhepele,ke kiilongithe nasho,’ Shailemo ta ti.