Shigwana igamena kOmalaria: Kamwi

SHO a li ta popitha oshigwana pOndoolopa ya Shifo pooha dhoshipangelo sha Mona waTjihozu moRuacana mOshitopolwa sha Musati pethimbo lyOkudhimbulukwa Esiku lyOmalaria mUuyuni mEtitano lya zi ko lyeti 24 Apilili 2009, Oministeli yUuhaku nIilonga yUundjolowele Omundohotola Richard Nchabi Kamwi, okwa indila koshigwana sha Namibia, unene tuu shoka shi li miitopolwa yOmalaria, ano ngashi moCaprivi, mOkavango, mOhangwena, mOshikoto, mOshana, mOmusati nomOkunene, shi longithe kehe shimwe shoka tashi kelele shaalike koomwe nokukwatwa kOmalaria.

Minista Kamwi ta ti omukithi gwOmalaria ohagu kwata nokudhipaga aantu, unene tuu aanona ye li kohi yoomvula ntano noshowo oomeme ye li momategelelo. Ta ti omukithi nguka ohagu indjipalekwa unene koomwe, unene tuu ndhoka oonkiintu noshigwana, unene shoka tashi adhika miitopolwa ya tumbulwa metetekelo naashoka tashi talele po mIitopolwa mbyoka, osha pumbwa nee okwiigamena okulika koomweMinista Kamwi ta ti kutya esiku lyOkudhimbulukwa Omalaria mUuyuni, ohali dhanwa nelalakano lyokugandja omauyelele koshigwana kombinga yomukithi omudhipagi gwa Malaria muuyuni na nkene, hagu kwata aakwashigwana na nkene gu na okupangwa nenge okukelelwa.
Minista Kamwi ta ti, oshigwana na shi kale tashi longitha oonete ndhoka dha gwayekwa omuti gwokudhipaga oomwe. Aanona naamboka ye li momategelelo momagumbo moka naya kale ya silwa nawa oshimpwiyu nokupewa oonete yi isiikile. Minista Kamwi ta gandja omayele kutya aakwashigwana ya kale haya zala oohema dhomaako omale noshowo oombulukweya oonde.
Aakwashigwana ya kale tayi igwayeke omagadhi gokukelela okulika koomwe noshinima oshinene oshigwana shi kale tashi pombelitha omagumbo gawo no DDT nokulongelakumwe naamboka haya pombele omagumbo nosho tuu okuzilila kUuministeli wUuhaku. Minista ta ti otaku vulu wo okulongithwa Etse lya Kuku, ndyoka olwithi lwalwo hali dhipaga wo oomwe.
Ta ti wo kutya mboka haya ende okuza kIitopolwa kaaku na omalaria ya thinda kIitopolwa yi na omalaria, naya kale taya omuti hagu ithanwa Chemoprophylaxis. Minista Kamwi ta ningi eindilo lya mana mo lela kooyene yomagumbo nOositola, ya kale haya zimine oonakupombela omagumbo nosho tuu, ya pombele momagumbo moka nelalakano lyokudhipaga mo oomwe, omayi gadho nuunimwena wadho.
Minista ta yelitha ta ti omadhidhiliko gomuntu a kwatwa komalaria ogo ngoka kutya omuntu a tya ngawo oha kwatwa kolwiidhi, e uvite uutalala, ta kanitha ehalo lyokulya, ta kungu, e uvite omutse ethimbo alihe, e na eshikitha nosho tuu noku na oshimela. Omunona oha kala ke na engungumkano lyiihwapo, ta lili unene nota kolola wo unene.
Otema yonuumvo, Minista Kamwi ta ti, ‘Okukelela Malaria.’ Minista ta ti kakele komukithi omudhipagi HIV-AIDs, ngoka kagu na epango, Malaria oha vulu okukelelwa nokupangwa. Onkee oshigwana nashi igameke ashike komauyelele tashi pewa kAaniilonga yUuhaku, tashi pombelitha omagumbo gasho nosho tuu. Tashi yi kIipangelo nokOoklinika meendelelo uuna shi wete nenge shi uvite shi na omalaria, pamadhidhiliko ngoka ga tumbulwa metetekelo.
Omundohotola Kamwi ta vti, ngashi omvula ndjika omupya omunene sho Iitopolwa mbyoka yOmalaria ya li ya adhika komeya gefundja nuumvo ngoka ga eta oomwe odhindji nosha yela kutya mIitopowla moka omu na malaria ogundji pethimbo ndika. Ta ti ngashi mOmusati okuza mu Novemba 2008 sigo omu Maa;litsa 2009, omwa loptwa nale kwali aantu ye li 908 ya kwatwa kOmalaria nomwa si ye li 29. mOhangwena oye li 549 nomwa hulitha 36 pethimbo olyo tuu ndyoka. mOkavango omwa kwatwa aantu ye li 2182 kOmalaria nomwa sa ye li 34. Kumwe ayehe moNamibia omwa kwatwa aantu ye li 4070 komalaria nomwa dhipagwa kugo ye li 135. Nande ongawo, Minista Kamwi ta ti, Epangelo nUuministeli we otau longo noonkondo nopethimbo ndika Omalaria moNamibia oga uka pevi noonkondo. Okuza momumvio 2006 Omalaria moNamibia oga ya pevi nOoperesenda 35% momumvo 2006 nomomumvo 2007 onOoperesenda 75%, omanga omaso komalaria momumvo 2006 ga ya pevi nOoperesenda 41% nomomumvo 2007 onOoperesenda82%. Omolu ekondjo ndika lyEpangelo mokukondjitha Malaria, Ehangano lyUundjolowele mUuyuni (WHO) olya pandula kwaashihe tashi ningwa po ku Namibia mekelelo lyomalaria, ngashi naanaa iishiindalongo she Botswana, South Africa na Swaziland ye shi ninga mekwatathano lyuumayintahana mekondjitho lyomalaria miiloonga yawo moka noku ga eta pevi noonkondo.
Ye na po nokuli elalakano lyokukala ya vudha mo Malaria miilongo nyawo moka momumvo 2015. Minista Kamwi ta ti shoka otaya vulu ashike oku shi ninga ngele iilongo iishinda yawo, ngashi Angola, Mozambique, Zambia na Zimbabwe nayo tayi itula kumwe mekondololo lyOmalaria nawanawa miilongo yawo moka. Ta ti opo wo wu kelele nawa omikithi moshilongo shoye, ngashi Oomalaria ndhika, ou na okukala wu na wo oshimaliwa. Omundohotola Kamwi ta ti ngashi Namibia, oku na ngaa okuadhigu nomushiinda she Angola, ngoka sigo oompaka ina katuka natango oonkatu dha kwata miiti dhokukelela malaria moshilongo she.
Tashi ti, kutya nee Namibia okukondje ngiini nokukelela malaria moshilongo she, manga ngaa omushiinda she Angola ita ningi ngashikwawo, nena itashi ka kwatha naanaa unene. Onkee Minista Kamwi ta ti, Angola naye oku na okwiitula mo mekondjitho lyomukithi omudhipagi nguka gwa malaria opo Namibia a adhe elalakano lye lykukomba mo malaria meni lye.
Pehulilo, Minista Kamwi ta indile nee koshigwana ashihe sha Namibia, unene tuu shoka shi li mIitopolwa yOmalaria, shi longele kumwe nEpangelo, nUuministeli mekondjitho lyomalaria opo Namibia a kale noshigwana shaa na we malaria. Moshipopiwa she, Gavena yOshitopolwa sha Musati Sackey Kayone, shoka sha leshwa pehala lye ku Kaansela gwa Shikuku Peter Endjambi, okwa pandula noonkondo Epangelo sho tali kondjo ngeyi okuvudha mo malaria moNamibia. Omukuluntu gwEhangano lyUuhaku mUuyuni mu Namibia Omundohotola Madga Robalo, moshipopiwa she shoka sha leshwa pehala lye kOmundohotola Desta Tiruneh, naye okwa pandula Epangelo lya Namibia sho tali kondjo mokuvudha mo malaria moshilongo she.
Ta ti Ehangano lyawo onkee tali ka tsikila nokuyambidhidha Namibia moonkembadhala dhe ndhika nokukutha mo Malaria mokati koshigwana she.