Shigwana i shangitha omolu omahogololo

OMBELEWA yi na sha nOmahogololo mo Namibia otayi lombwele oshigwana shikiinyolithe nokumona uukalata womahogololo omolu omahogololo gOpaupresidende nogIilyo yOshigongi shOpashigwana ngoka taga ka kala ko mu Novemba nuumvo moshiloongo ashihe.

Moshitopolwa sha Hangwena nosha Shana otaku tiwa kutya omainyolitho ngaka otaga ka kala mo okuza meti 5 Mei 2009 sigo ometi 5 Juni 2009.
Paveta ya Namibia, kehe omukwashigwana gwa Namibia e na oomvula 18 nokuuka pombanda, oku na uuthemba wokwiishangitha a mone okakalata komahogololo noku ka hogolola.
Omainyolitho ngaka ohaga ningwa shi ikwatelela kOveta yOmahogololo yaNamibia yonomola 24 yomomumvo 1992 ngashi ya lundululwa notayi gandja uuthemba kukehe Omunamibia e na oomvula 18 nenge dhi vule po a vule okwiishangitha, a mmone okakalata komahogololo nokukahogolola Ongundu ye ndjoka a hala uuna moshilongo tamu ya omahogololo.
Kakele nee kokunyola mboka ya ninga oomvula 18 nenge ye vule po, ohaku nyolwa wo mboka ya kanitha uukalata wawo womahogololo.Ombelewa yOmahogololo otayi ti kutya omainyolitho goludhin nduka oga ningilwe nale mIitopolwa ngashi Hardap, Karas, Kunene na Caprivi momumvo 2007 nomomumvo 2008 oga li mIitopolwa ngashi Omaheke, Erongo,Kavango nomOmusati.
Kuyele nuumvo oga ningilwe miitopolwa ngashi Oshikoto, Otjozondjupa nomoKhomas.
Ombelewa yOmahogololo otayi tseyitha wo mpaka kutya otaku ka kala natango omaishangitho gaahogololi ga gwedhwa po mu Septemba nuumvo ngoka taga ka goya ko nee thiluthilu manga omahogololo gOpaupresidende nogOshigongi shOpashigwana ngoka taga ka kala ko mu Novemba 2009 inaga thika.
Oshigwana shoka shina oomvula 18 nokuuka pombanda, shoka inashi inyolitha natango, otashi indilwa shi kiinyolithe shi mone uukalata washo wokuhogolola, oshoka ngele ku na okakalata haka, ito vulu okukahogolola