Sheya na ze mo mUukuluntusikola

YAMWE yomaavali yaanona taya sikola mOseko yOpombanda ya Haimbili Haufiku pEenhana moshitopolwa sha Hangwena, ye li momizalo dhOngundu yoSwapo, mOlyomakaya ngaka ga zi ko oya maashingile mEenhana moka taya holola omadhilaadhilo gawo pambili noku indila kEpangelo, ano kUuministeli wElongo wu kuthe mIilonga Omukuluntusikola gwOseko yOpombanda ya Haimbili Haufiku pEenhana meendelelo ngashi tashi vulika oshoka oha fala aanasikola ye kiigongi yoRDP, unene e wu falele komaashinga yo RDP ya li mEenhana meti 29 Maalitsa 2009.

Omukanda gwawo nguka gwomanyenyeto oye gu pe Oministeli yElongo Nangolo Mbumba, ye gu mu pela pondje yosheelo shOseko ndjoka ya Haimbili Haufiku pEenhana moka konima yOmaashinga ndjoka ya tameke nayo tango mondoolopa ya Eenhana nokuya nee kOseko yOpombanda ya Haimbili Haufiku hoka ya gandja nee ombapila yawo ndjika yOmanyenyeto ku Minista Mbumba. Kaansela William Shatimwene, ngoka wo naye e li gumwe gwomaavali yaanona taya sikola mOsikola moka, oye a lesha ombapila yomanyenyeto gaavali ngaka noku yi gandja wo koministeli Nangolo Mbumba.
Ombapila otayi ti ngeyi: ‘Tse aavali yaanona taya sikola mOseko yOpombanda haimbili Haufiku otatu gandja okuuvanyi kwetu omolu aanona yetu ya kuthilwe mOsikola meti 29 Maalitsa 2009, pazimino lyOmukuluntusikola Dineinge Sheya, opo ya kakuthe ombinga momaashinga yOpolotika yo RDP ya ningilwe mEenhana esiku ndyoka. Tashi ti Sheya nOmukuluntu gwOmuhandjo mOseko moka, ya ningi po omusholondondo gwaanasikola ye li omilongone (40), taklu tiwa kutya ngeno oya indila ya ye pondje kOositola ya kalande iinima yawo, ashike oya li ya kuthwa mo
pamukalo ngoka opo ya ka kuthe ombinga momaashinga yuo RDP esiku ndyoka
mEenhana moka noshowo okukala moshigongi sho RDP nasho sha ningilwe mEenhana esiku ndyoka.
Otu shi shi kutya aanona ngele taya laleke mOsikola, ya ye pondje omolu oompumbwe dhontumba, ohaya pewa kehe gumwe operemeta ye, ano ombapila ye mwene yuuthemba wokuza mo mOsikola, ashike esiku ndyoka oya shangele ashike yimwe yaalongwa ayehe mboka omilongone.
Tse otatu tumu aanona yetu kOosikola ya ka longwe ihe haku ka falwa kiigongi yoopolotika,’aavali mbaka taya ti ngawo nokutsikila ko kutya yo otaya tsu kumwe nombapila ya fa onkwawo ya pelwe Omuwiliki gwElongo kaavali mEenhana meti 3 Apilili 2009 moka wo ya pulile ekuthomo lyOmukuluntusikola Sheya mOseko ya Haimbili Haufiku nokukuthwa mo miilonga yEpangelo meendelelo ngashi tashi vulika.
Aavali taya ti kutya oya lombwelwa wo kaanona yawo kutya mOseko moka omu na ehala limwe moka mboka yo RDP haya gongala nokukundathana iinima yopolotika yawo yo RDP.
‘Otwa lombwelwa wo kutya aanona mboka ya yile komaashinga oya pelwe oshimaliwa,’ taya ti ngawo nokutsikila ko kutya omathimbo ga zi ko oya koneka kutya Omukuluntusikola Sheya okwiitula ashike miinima yopolotika pehala lyokulonga iilonga yeithano lye ongOmulongisikola nOmukuluntusikola. Onkee otatu indile kutya Sheya ngele okwa hala okukala Omunapolotika na thige po Oseko ndjoka oshoka ote yi longitha mokunwethano aanona omalalakano gOngundu ye yo RDP.
‘Naye a ka longe ongOmunapolotika ethimbo alihe,’ taya ti ngawo nokugwedha po kutya uuna tapu ya omukalo gwokugandja eethelo lyanaona ya ze mo mOsikola nombapila yimwe, nashi lombwelwe aavali ndele taye shi zimine.
‘Omolwashike kasha li sha ningwa esiku ndyoka? Tse aavali otwa kanitha einekelo mOmukuluntusikola ngoka Sheya na otatu indile a thige po Oseko ndjoka moompadhi oontalala ndele Epangelo, ano uuministeli wElongo tau kutu po
Omukuluntusikola gwOseko ya Haimbili Haufiku meendeelelo ngashi tashi
vulika,’aavali mbaka taya ti ngawo.
Aavali mbaka oya oya lombwela wo Minista Mbumba kutya kakele ka Sheya, mOshikondo shElongo mOshitopolwa sha Hangwena, omu na wo Aanambelewa yamwe mboka taya uhala taya hwahwameka aalongisikola naalongwa ya ndjoine oRDP, omanga Sheya naaniilonga yamwe mOshikondo shoka shElongo, taya uhala taya nyana Epangelo lyoye kutya ethigona, tali wilikwa kaantu inaya longwa.
‘Nayo wo mbaka tse otwa kanitha mu yo einekelo,’aavali taya ti ngawo nokutsikila ko kutya yo wo oya vulwa noya kenyanana aatalelisikola yamwe mOshitopolwa, ngashi unene Omutaleli walter Ndakondja nAakuluntusikola yamwe mboka taya uhala taya nyana nokutuka aaleli yEpangelo ya hogololwa koshigwana.’Otatu ku lombwele wo Minista kutya Aanambelewa aakuluntu moshitopolwa sha Hangwena otaya longitha oonkondo dhawo pambambo, taya kutu miilonga yopombanda ngashi muukulungtusikola nomuukuluntu wIikondo, mboka ye li ashike iilyo naayambidhidhi yo RDP( Ongundu ndjoka ya yi pewa iimaliwa tayi zi pondje). Tatu indile kUuministeli wElongo ku landulwe omikalo dhi li nawa uuna taku kutwa aantu pomahala ngoka gopombanda mElongo mOshitopolwa sha Hangwena. Tatu indile wo kutya Aanambelewa naaniilonga ayehe mEpangelo ya kale taya simaneke Epangelo ndyoka taya longele nokusimaneka wo aawiliki mboka taya wilike Epangelo ndjoka ngashi ya hogololwa koshigwana,’ taya ti ngawo nokwiindila
kOminsta Mbumba kutya Ombelewa yElongo mOshitopolwa sha Hangwena yi kale ya lundululilwa kOshitopolwa sha Hangwena, unene tuu kEenhana. Mokutaamba ko omukanda ngoka Minista Mbumba okwa ti kutya ote gu fala ku
Presidende nokaakuluntu wo ye yalwe. Ta dhimbulukitha ayehe kutya kehe Omunamibia na kale e shi shi kutya tse atuhe yamwe tu li kmohi yoOmuleli gumwe.
Ta ti mElongo inamu ningwa iinima mbyoka inayi pamba elongo.
Ta indile kaalongisikola naakuluntusikola ya longe iilonhga yawo ngashi ye
yi inekelelwa kEpangelo. Minista Mbumba ta ti, Ombelewa yElongo moshitopolwa sha Hangwena oya adhika nale tayi zi ko kOndangwa okuya kEenhana.
Pokati mpoka omusamane Sheya, okwa ti kutya mboka ya li momaashinga ndjoka kaye shi nande aavali yaanona taya sikola mOseko yawo, ihe aakwashigwana ya kuthwa ashike mEenhana mboka ye li iilyo yoSwapo, ngashi ye ya ye li momizalo dhoSwapo ngawo. ‘Opo tatu ka ninga oshigongi shaavalivali yaanona taya hiti mOseko yetu, mu ye mu tale kutya aavali yaanona yomOsikola yetu oolye,’ Sheya ta ti ngawo.