Sheya a ekelahi omapopyo gaanyasha yo Swapo

OMUKULUNTUSIKOLA gwOseko yopombanda ya Haimbili Haufiku, Dineinge Sheya, okwa ekelahi gaanyasha yo Swapo moshitopolwa shas Hangwena, kutya okwa li a fala aanasikola yomOseko ye komaashinga yo RDP ya li pEenhanga meti: 29 Maalitsa 2009.

Ngashiingeyi aanyasha yo Swapo oya hala nee Sheya a kuthwe mo miilonga kEpangelo meendelelo ngashi tashi vulika. Kakele komusamane Sheya, aanyasha yoSwapo moshitopolwa sha Hangwena otaya ti wo kutya nOmukuluntu gwOmuhandjo gwOseko ndjoka ya Haimbili Haufiku, Hafeni Mwahafa naye wo na ze mo miilonga mOseko moka molwashoka oye wo naanaa a etha aanasikola ya ye komashinga yo RDP mOsoondaha ndjoka.
Taya ti wo kutya, yo noshigwana shomOshitopolwa sha hangwena, oya kanitha einekelo mOmuwiliki gwElongo mOshitopolwa sha Hangwena noshowo maaendithi aakuluntu yElongo mOshitopolwa shoka ngashi Aatalelisikola, Aakuluntusikola noshowo aaleli yo NANTU yamwe moshitopolwa shoka noshowo Aanambelewa yamwe haya longo mIilonga yEpangelo moshitopolwa shoka notaya indile ya lishafwe meendelelo ngashi tashi vulika, ano ya lundululwe po pomahala gawo meendelelo ngashi tashi vulika.
Kepulo, Sheya okwa ti ndhoka tadhi popiwa kaanyasha yo Swapo kadhi shi dhoshili. Ta ti ye shi valelwe a kuthe aanasikola ye mboka mOsikola noku ya fala kiigongi yoopolitika nenge kOmaashinga ndjoka tayi popiwa.
Ta ti ye oko a li shili koshigongi hoka, naanona yamwe oko e ya mona, ashike haye e ya fala ko. Ta ti sho a pula kOmukuluntu gwomuhandjo, tate Mwahafa, okwe mu lombwela kutya aanona mboka sho ya za mOhostela moka, oya lekela taya ti kutya otaya ka landa iinima yawo kondoolopa. Inaya za mo ya ti otaya yi koshigongi nenge komaashinga ndjoka yOpolotika.
Ta ti oshinima shimwe ishewe aanona yamwe haya sikola Oseko ye moka, ohaya zi komagumbo na ngele oye li komagumbo ohaya ningi shoka ya hala nenge okuya kiigongi yawo hoka ya hala.