Shalli a tulwa pevi

OMUPRESIDENDE Hifikepunye Pohamba mEtitatu lyoshiwike shika okwa tula pevi Letenanda-Ndjayi gwEtanga lyEgameno lya Namibia, Martin Shalli, shi na sha nomapopyo kutya okwa li ko a li ko sha melando lyiilongitho yEtanga lyEgameno.

Oshinima shika osha halutha noonkondo aantu oyendji, unene tuu mEtanga lyEgameno. Oshifo shika osha yakelwa ko kutya Shalli okwa taalelwa komapopyo kutya okwa a mono oshimaliwa sha zi komuntu omutitatu – okuza kOkampani yAachina – hoka kwa li kwa landa iilongitho mbika.Pamushangwa, Ominista yIinima yi na sha nOmupresidende Albert Kawana – etulopevi lya Shalli oli na sha ‘niinima kayi li nawa iinene,’ mbyoka yi na okukonanwa mo nawa. Okangundundu okaningimatokolo omanene gopapolitika mSwapo noka oka li wo ka lombwelwa oshinima shika ongula yEtitatu.Kawana okwa tseyitha kutya Mayola Ndjayi, Peter Nambundunga, oya ta ka keelela po pehala lya Shalli sigo oshipotha sha manithwa. Otaku popiwa kutya etulopevi lya Shalli olya zi miinima ya ningwa manga Omukalelipo gwa Namibia ku Zambia.Oonzo dhomauyelele odha popi kutya Shalli okwa kala mekwatathano naaniilonga yamwe mOmbelewa yOmukalelipo gwa Namibia mu Zambia, konima sho a galulilwa kegumbo kOmupresidende Pohamba mu Novemba 2006, a ye poshipundi sha Solomon Hawala, ngoka a li a yi mopenzela.Otaku popiwa kutya Shalli okwa li a longitha oakaunta yomuniilonga gumwe mOmbelewa yOmukalelipo gwa Namibia ku Zambia, moka omo nee aniwa mwa li mwa tula ‘Oondola oomiliyuna.’ Mwene gwoakaunta ndjika okwa ka gandja nee oshimaliwa shika ku Shalli.Nande ongaaka, Opolisi ya Zambia oya li ya mono kutya opu na sha sha puka, konima sho ya lombwelwa kutya oshimaliwa shomwaalu ogundji osha yi mOakaunta yOmuniilonga mOombelewa dhOmukalelipo gwa Namibia mu Zambia na omuniilonga nguka okwa li a pulwa-pulwa.Osha fa nee shi li ngeyi kutya omuniilonga nguka okwa ka gandja uuyelele auhe na oshinima shika osha ka gandjwa kOshikondo shOpolisi hashi ungunga niimaliwa kayi li pauyuuki nosho wo kOkomisi yi na sha nekondjitho lyiilonga yOkoraputo.Oonzo dhomauyelele odha popi kutya Shalli okwa hokolola kutya oshimaliwa shOondola dhaAmerika omayuvi omathele gaali nomilongo ntano osha tulwa moakaunta ye okuza ko China, kaantu ya li haya hiira egumbo lye mOvenduka uule womvula.’Itandi komenda. Ina shi uka,’ Shalli osho a lombwele The Namibian ngaaka mEtitatu.Oonzo dhomauyelele odha ti kutya Omutamaneki-Ndjayi, Martha Imalwa, omasiku ga zi ko okwa li ko China a ka manithe omakonakono moshinima shika. ‘Shoka taya konakona pethimbo ndika okutala ngele opu na wo aantu yalwe yalya ko sha kOomiliona,’ onzo yimwe yomauyelele osho ya popi ngaaka.Kawana okwa ti Okomisi yEgemaneo, ndjoka oyo ya li wo ya zimine kutya Shalli na pewa iilonga mbika – oya li wo ya lombwele Omupresidende kutya Shalli na tulwe pevi. Okomisi ndjika oya thikama po mu Shalli ye mwene, Inspekta-Ndjayi gwOpolisi, kOmufala gwOondholongo, Omunashipundi gwOkomisi yAaniilonga mEpangelo nosho wo iilyo iyali yOmutumba gwOpashigwana – yu ulikwa kOmupresidende pazimino lyEgumbo ndika lyOpashigwana.Shalli okwa kala mnEtanga lyEgameno lya Namibia okuza momumvo 1990 sigo Febuluali 2005, sho Omukokolipresidende Sam Nujoma a li e mu tumu ko Zambia a ka kale Omukalelipo gwa Namibia hoka. Ihe konima yethimbo lya konda poomwedhi 18, Pohamba okwa li e mu galulile kegumbo e te mu ningi Omukuluntu gwEtanga lyEgameno lya Namibia.Shalli oye li omukwiita gwotango nOmunadiplomate a li Omukuluntu gwEtanga lyEgameno na okwa li a gana kutya ota ka komba iilongo yokoraputo nokwaahenevuluko mEtanga lyEgameno. ‘Etumwalaka lyandje ku kehe oshilyo kashi na evuluko mo NDF olyo ndika kutya – lundula nenge inda,’ Shalli osho a li a popi ngaaka sho a li pewa opoosa ndjika.