Shaduka ota yi kondholongo omimvo 20 molwedhipago

OMUNANGESHEFA Lazarus Shaduka okwa monika ondjo yoku dhipaga omukulukadhi gwe mu July 2008 mo Venduka, onkene oku na oku longela ondholongo oomvula omilongo mbali.Etokolo ndika olya gandjwa kohofa Onene yoshilongo metine oshiwike shayi.

Ohofa oya tokola muuwanawa wepangelo ndyoka lya li lya kondjitha etokolo lya gandjelwe kohofa yOpombanda ndjoka ya li ya tokola kutya Shaduka okwa dhipaga omukadhi, Selma Shaimemanya shaashi owina.Aapanguli Peter Shivute, Gerhard Maritz na Sylvester Mainga oya kuthapo etokolo lyohofa yopombanda ndyoka lya li lya mono Shaduka ondjo yedhipago lyaashi lyowina nokwa tokolwa afute oodola omayovi 25 000 nenge a kale mondholongo omumvo gumwe, pehulilo lyiihokolola ye mu Auguste 2010. Aapanguli mbaka yatatu yohofa Onene yoshilongo oya pingenepo etokolo lyohofa yopombanda nethimbo mondholongo lyomimvo 20.He ya nakusa Selma, Leopold Shaimemanya okwa ti uuyuki owa longwa ngashingeyi, meyamukulo ketokolo lyOhofa Onene yoshilongo. Okwa tisigo oompaka konima yomimvo ne sho omwana a dhipagwa ina ya dhimbwa natango ekanitho ndika . Nonando ota ya kambadhala ngaa oku dhimbwa oshinima shika oshidhigu.Okwa ti okwa mwene Shaduka lwa hugunina pethimbo lyiihokolola ye.Shaduka okwa li a holoka komeho gomupanguli, Kato van Niekerk pokati ka Juni sigo Auguste 2010. Okwa li ta hokololithwa kutya okwa dhipaga noshowo kutya okwa kambadhala oku ya oveta moshipala nenge a thikama oveta moshipala shina sha neso lyomukulukadhi gwe moshiponga shokuyahwa nondjembo momasiku 13 Juli 2008.Shaimemanya okwa si sho a yahwa koshikuti shoka sha zi kondjembo yonomola 9mm ya Shaduka. Pamahokololo ngoka ga gandjelwe pethimbo lyiihokolola Shaduka okwa tile omukadhi okwiiyaha yemwene, konima okwa ti Shaimemanya okwa yahwa kaantu nenge komuntu kee shiwike, nokonima okwa ka hokolola kutya omukadhi okwa yahwa pamupya sho ondjembo yuumbu inaashi tegelelwa.Omupanguli van Niekerk kali a zimine omahokololo ngaka, ndele okwa taamba ehokololo ndyoka lya Shaduka a li a gandja tango kopolisi konima yoku kwatwa kwe. Konima yiihokolola mbika omupanguli okwa mono Shaduka ondjo yokudhipaga kaakushi kowina , konima yoku mona kutya okwa longitha ondjembo ye nuuhasha.Ohofa oya li woo yuuvu uumbangi kutya Shaduka oha hepeke omukulukadhi gwe nopethimbo limwe okwa li emu tilitha kutya ote ke mudhipaga. Okwa li woo kwa hokololwa kutya Shaimemanya okwa li a indile opolisi opo yi kutheko ondjembo ku Shaduka. Ondjembo ndjoka nando oya li ya kuthwako, Shaduka okwe keyi kuthako kopolisi , a ti aniwa okwiitedhulula na okwa hala oku tungulula ondjokana ye konima yokweethapo okulongitha iingangamithi yo kokaina.Omupanguli Mainga okwa ti ehokololo ndika ota li ulike kutya ondjokana ndjoka oya li yaana ombili, noshikwawo, Shaduka okwa li omulumentu ena onyanya ngoka a li tula omwenyo gwomukadhi moshiponga. Okwa ti omupanguli Van Niekerk okwa tala ehokololo lya Shaduka no kwe li tindi molwaashoka okwe keli dhiladila ashike konima.Omupanguli Mainga okwa ti oshinima shokuumba ondjembo osha ningwa, esiku ndyoka, Shaduka a thigipo egumbo ongula onene nokwa ka galuka komatango, kwaluudha nokwa li ta nika omalovu. Monkalo yondjokana yuudha omahilathano , osha yela kutya opwa ka tameka oontamanana, nosho oshikuti shoka sha dhipaga shuumbwa, Shaduka okwa li nondjembo meke lye eyi thindila kombunda ya Shaimemanya, na okwa hili monkandja yondjembo.Nonando Shaduka okwa li a tilitha kutya otaka dhipaga omukulukadhi gwe esiku limwe kapena uumbangi ta wuulike kutya nguka okwali a longekidha oshinima shika, ndele edhipago ndika olya ningwa mepathimo lyeho.