SDFN a tunga Omatala gokulandithila pOhadiwa

E
HANGANO hali tungile aantu mboka ye na iiyemo yopepvi omagumbo lya Shack Dwellers Federation of Namibia (SDFN) olya tunga Omatala gokulandithila pOhadiwa moshitopolwa sha Hangwena, mpoka oomeme yoomvula dhopakati ye li taya landitha iipindi yawo opo ya lundululwe onkalamwenyo yawo.

Omatala ngoka oga tunga pooha nomatsakaneno gopate ndjoka yaza kOshikango ya pita pEngela yu uka kOkalongo, mpoka hapu ithanwa pOmaborta gaMungwelume na oga li ga tulwa miiponga pambelewa kOminista yOmagumbo nOmpangelo gOpaitopoilwa, Jerry Ekandjo, momasiku 17 ga Desemba 2008.
Oomeme mboka haya landithile pOmatala ngaka, ohaya landitha unene kaantu mboka taa ende mondjila ndjika niihauto ya thinda koondjila adhihe noshowo aantu yomoshitopolwa shika.
‘Otwa hala okweeta elunduluko moonkalamwenyo dhetu. Ota tu ithana aagundjuka ooyakwet ye ye tu waimine mongeshefa mpaka,’ meme Martha Shiweda (gwoomvula 24) ha landitha oohi dha kangwa nuuleke, osho a lombwele The Namibian ngaaka.
Julia Ashipala (gwoomvula 39) naye omunangeshefa pomatala mpaka ha landitha uukuki, ontaku niiyimati. Okwati okuza sho Omatala ngaka ga patululwa oga tameke okweeta elunduluko moonkalamwenyo dhaakiintu oyendji mbaka yokomikunda.Meme Rosalia Wileinge, naye oku li omunangeshefa omushona pOmatala ngaka.
Okwa pandula etungopo lyOmatala ngaka noyi indile opo komatala ku gwedhelwe ishewe oshoka itaaka gwanamo we. ‘Otwa hala opo komatala getu huka ku gwedhelwe oshoka ita tu gwana mo wee. Ota tu indile woo oomeme nootate ya tameke okungeshea natse tu etepo elunduluko,’ ta indile ngaaka.
Omatala ngaka oga longelwa aalandithi ye thike pomulongo nayahetatu lwaampoka naanangeshefa mbaka otaa indile opo ga gwedhelwe oshoka iitaaka gwanamo we ngaashi ethimbo lyomagongo moka iipindi ya ninga oyindji.
Amushila Heinrich, Omukwatakanithi gwIitopolwa moNamibia Housing Action Group (NHAG) ehangano ndjoka hali kwathele ehangano ndika lya tungitha omatala ngaka, okwa koleke kutya okwa nyanykilwa iilonga tayi longwa koomeme mbaka oku tala kunkee taa longitha omatala ngaka.
Amushila, ngoka a talelepo omatala ngaka mehuliloshiwike okwa tumbula kutya oya tegeelela aanangeshefa mbaka ya longekidhe omushangwa moka taa hokolola ngele opena tuu elunduluko miiyemo yoongeshefa dhawo okuza sho yali haya landithile kohi yomiti naasho ngashingeyi haya landithile meni lyomatala.
‘Otwa hala okutala ngele omatala ngaka ogeli eyamukulo koshigwana nenge omukundu kusho. Ngele otwa mono kutya omatala oge etapo elunduluko,otatu vulu ihe oku yagwedhelapo omatala omape,’ osho Amushila tu uvaneke.