Minista wounamapya nounaimuna, omeva nomatendululo omadu Calle Schlettwein oku li moshipyu molwomapopyo aye oo taa ti okulongifa oikuni
nomakala ngee ovanhu tava teleke nakuxulifwe po shaashi otaku kakeke omhepo.
Oshinima eshi okwa li eshi tulika komalungula Etitatu la dja ko.
Oshinima sha tya ngaha osha kumwifa ovalongifi vomalungula novanapolotika vahapu.
Schlettwein okwa ti okulongifa oikuni okwa nyika oshiponga shaashi ohaku di omwifi wa nyika oshiponga u dule nowoyeedifo yomefuta needila.
“Owa nyika oshiponga neenghono koukolele wovanhu ve dule peemiliyona 175 muAfrica,” Osho a ti ngaho
‘INASHI FIMANA’
Omupopiliko wongudu yoIndependent Patriots for Change (IPC) Imms Nashinge okwa ti inashi fimana opo minista a ye koshoongalele shi na sha nokuteleka noinima ya yela omanga shihe na omauwa Ovanamibia.
Eshi oshe ya konima eshi minista kwa li a ya koshoongalele shokuteleka oinima ya yela koFrance Etivali loshivike sha dja ko.”Okutondokela koFrance okwa li ashike okuhepeka oimaliwa oyo tuhe na nale. Opu na oyoongalele ihapu ya fimana oyo kwa li ta dulu okuya kuyo,” Osho a ti ngaho.
Nashinge okwa pula efimano lokuteleka noinima ya yela naasho tashi ka holoka po ngee ovanhu ova xulifa po okutelekifa oikuni.
“Mbela epangelo kali na vali omadilaadilo noitali dilaadila kutya oshike shi na okuningwa po kombinga yomaupyakadi oo ovanhu va taalela,” Osho a ti ngaho.
Nashinge okwa ti Ovanamibia vamwe unene ngaa komikunda ohava longifa oikuni natango opo va dule okulongekida oikulya yavo.
“Ovanhu vetu kave na oikulya nomeva, itava dulu okulanda oipumbiwa yakeshefiku, kave na omalusheno fyee noho otu na oupyakadi wokuhe na oilonga. Ongahelipi mbela ngee otwa tameke opo tete?” Osho a pula ngaho.
Nashinge okwa ti oinima ei tai dulu okupingena po elongifo loikuni oi na ondilo ndee epangelo otashi dulika liha dule okuvatela ovakwanaluhepo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
