Sackeus Nyemba ota ti ota tidhwa megumbo ku meme gwe

OMUMATI omugundjuka gwoomvula 32 Sackeus Eden Nyemba gwomomukunda Onyoka mOndonga moshitopolwa sha Shikoto oku li ta nyenyeta kutya okwa tidhwa megumbo kuyina Rosalia Gideon, sho aniwa e li oshilyo sho RDP, ashike nee meme Rosalia ota ti kutya omapopyo ngoka taga popiwa ku Sac keus kage shi goshili, megumbo okwa za mo kuye mwene nota vulu okugalukila mo kehe ethimbo.

‘Ngame otandi tidha omumwandje, osheeli shandje megumbo ngiini. Otandi mu tidha megumbo ngiini, ye e na nokuli ohango momwedhi tagu ya, tu li metifa lyomalongekidho gohango ye ndjika nokuli sho tu li mpaka,’ meme Rosalia ta ti ngawo nonkumwe onene okuuva kutya aniwa ota tidha osheeli she Sackeus megumbo.Sackeus okwa lombwela wo The Namibian kutya niinima ye ngashi ombete, omakumbatha nosho tuu iikutu ye, yina okwe yi kutha mo mondunda ye yokulala noku yi ekela pondje. The Namibian sho a yi moomeme Rosalia moka komatango gEtiyali lyoshiwike shika, okwa dhidhilika shili ombete yi li pondje pehale lwaampoka, na meme Rosalia, kepulo okwa ti kutya oya Sackeus shili, ashike oye e yi tula po ye mwene, haye e yi kutha mo m ondunda ye ngashi ta ti. Sho meme Rosalia ta popi ngawo, ano ta lombwele Oshifo shika ngawo, na Kapatashu ka mwene gwomukunda Onyoka, ano tatekulu Mbokoma Nambahu opo a li mpoka pamwe nayamwe yomomukunda, ya pulakena. Sackeus Nyemba ngoka pethimbo ndika e li Amushanga gwOpevi gwo RDP moshitopolwa sha Shikoto, ota gandja wo uusama ku Kaansela gwOshikiandjohogololo sha Muntele tate Sackeus Nangula, kutya moshinima shokutidhwa megumbo kuyina, naye oku na mo sha. Sackeus ta ti Kaansela nangula okwe mu dhengelele ongodhi esiku limwe te mu pula kutya oku li shili moRDP? Te mu lombwele wo aniwa kutya, ‘Kala ano mo RDP yoye, nge wa s`ondjala to galuka.’ Pethimbo a li moSwapo, Sackeus Nyemba, okwa li oshilyo shOngundu yEhumithokomeho lyOshikandjohogololo sha Muntele. Okwa kala nokuli natango oshilyo shEhangano lyAanyasha lyOpashigwana mOmuntele.Kepulo, Kaansela gwOshikandjohogololo sha Muntele tate Sackey Nangula, okwa ti ye shi valelwe a tidhithe Sackeus kuyina megumbo lye. ‘Ngame itandi gwana miinima yomazimo nande. Ina lundila ndje nandenande,’ Kaansela Nagula ta ti ngawo nokugwedha ko kutya, oshoshili okwe mu dhengelele ongodhi te mu pula kutya nge oshoshili kutya okwa za mo moSwapo nokwa ka ndjoina RDP. ‘Epulo ndyoka onde li mu pula oshoka Sackeus okwa kala gwetu moSwapo nokwa kala e na iinakugwanithwa yoSwapo mOshikandjohogololo shetu sha Muntele. Onkee onda li ndi na okwiikwashilipaleka kutya oshoshili, okwa ka ndjoina RDP, opo wo ndi lombwele omalutu getu gOswapo mOshikandjohogololo kutya oshilyo shetu shimwe sha za mo sha ya ko RDP,’ Kaansela Nangula ta ti ngawo nokwiindila Sackeus, ngoka e li osheeli she, ano e li omukuluntu gwayakwawo, ngeno a ha piyagneke yina, ihe ngeno a kale nayina nombili noneuvathano.