RDP ta ti okwa tidhwa mo mOkahao kOswapo

E
HANGANO lyUuthemba womuntu lyOpashigwana, momushangwa gwalyo gwa pitithwa komatango gEtitatu lya zi ko, otali ti kutya aahwahwameki yOngundu yoRDP mOshitopolwa sha Musati ye li lwopomilongombali lwaampoka omutenya gwEtitatu lyOshiwike shika oya li ya kondekelw

a mOkahao kaayambidhidhi yOswapo noku ya tidha mo mOkahao moka.Ehokololo lyUuthemba wOmuntu otali ti kutya Aahwahwameki mbaka yo RDP, ya li mewiliko lyaAmushanga gwaagundjuka moRDP Nicanor Ndjoze, oya adhika ashike opo hanga ya tameke nehwahwameko lyawo okuza egumbo negumbo mOndoolopa ya Kahawo, sho ya papala ya kundukidhwa kongundu onene yAakwaSwapo mwa kwatelwa naanasikola. AakwaSwapo mbaka oya kala aniwa taye ya tuku nokwiigidha kutya naya ze mo mOkahao. Aniwa taya ti kutya RDP ke na mo ehala na ze mo mOkahao nomOmusati aguhe. Taya tameke aniwa taye ya umbu nomamanya noku ya dhenga kumwe niihauto yawo. Osheenditho shawo shimwe aniwa osha dhengwa ekende lyokomeho. Yamwe yomaantu ya li mpoka, Uuthemba wOmuntu tau ti, aanasikola yomOsikola ya Nangombe mOkahao moka. Opolisi, ya thikama unene mAapolisi yoomeme, oye ya pehala mpoka nokukembadhala ngeno yi mwene ke onkalo, ashike mboka yOswapo, oya kala inaya hala okwiiyutha komalombwelo gOpolisi noya tsikile nokuumba omamanya kuNdjoze nongundu ye. Mayor gwOndoolopa ya Kahao, naye okwa li ta kembadhala a mweneke onkalo,ashike naye ine shi vula. Ndjoze naawiliki yakwawo yongundu yawo ndjoka,sho ya mono kutya oshinima kashi li we nawa, oya tokola ya ze po mpoka noya yi yuuka lwokEtunda. AakwaSwapo oye ya lamba. Taya ti naya ze mo mOkahao nomOmusati gwogwene. Ohela,The Namibian ina vula okumona na Ndjoze opo a gandje okomenda ye moshinima shika,ashike oya mono Omunashipundi gwOmahogololo go RDP mOshitopolwa sha Musati omusamane Kamunyengo Shilongo ngoka wo e li Omukuluntusikola gwOseko yopombanda ya Etalaleko mOkahao, ngoka wo a li gumwe gwomosheendo sho RDP mOkahao mEtitatu lyoshiwike shika nokukondekwa kAakwaSwapo ngawo. Omusamane Shilongo ota ti oshinima shoka hashi ningwa kOswapo , unene tuu mOshitopolwa sha Musati, shokukelela RDP a ninge iikonga ye yehwahwameko lyoshigwana, oshiwinayi noonkondo. Ta ti yo oya li ye ya ashike nombili mOkahao moka ya tsikile niilonga yawo yehwahwameko mOndoolopa nomomudhingoloko ngoka,ashike Swapo okwe ya kelele ya gwanithe po uuthemba wawo mboka, nokwe ya tidha mo. ‘ Swapo, shoka ta ningi shokutilitha, shokuthiminika yakwawo noku ya yeka uuthemba wawo, osha fa ashike shoka sha li tashi ningwa komakakunya pethimbo lyiita yekondjelomanguluko, nenge noku li shi vulithe po,’ Shilongo ta ti nokugwedha po kutya oshinima shika itashi vulu we nande okwiidhidhimikilwa. ‘ Oshinima tatu ningilwa kOswapo,osha fa ashike omuntu wa pewa oshithima wulye, ashike manga ngaa ngeno to shi tula mokana wu lye, ye gumwe ote shi kukutha noku ku thiga mpoka wa sa ondjala,’ Shilongo ta ti ngawo nokugwedha po kutya sho nee ya tokola okuza mo mOkahao ngawo oye ya lwokEtunda, hoka ya zi nokuya kOshifo koRuacana, ya pitila mokuti pokati kOmbalantu nOngandjera, molwashoka kopate yokuya koTsandi ,oya mona kutya itaya vulu okupitila ko, otaye kiidhenga mumwe nAakwaSwapo mboka, ye ya tidha momOkahao.Omuunganeki gwOswapo mOshikandjo sha Kahao, tate Natangwe Nambashu okwa ti kutya Shilongo nongundu ye yAakwaRDP oye na ondjo oshoka mOkahao oye yile mo yi iyakela mo. Inaya lombwela Elelo lyOndoolopa noshowo Opolisi. Sho ye ya mo ngawo oya yi kOomweelo dhOosikola, unene kOsikola ya Nangombe noshowo kOseko yEtalaleko, hoka ya adha aanona inaye ya hala nokutameka taye ula ngiika omalaka noku ya tidha ko oshoka kaye shi yo RDP. Nambashu ta ti kutya ye ka li naanaa popepi nayo,ashike sho a mono kutya onkalo kayi li ngaa lwanawa, okwa yi kOpolisi meendelelo noku yi lombwela yi ye yi kondolole onkalo. Kutya, Shilongo nongundu ye,kumwe niihauto yawo, oya dhengwa nomamanya, Nambashu okwa ti kutya shoka kashi shi shoshili. Ta ti aantu ya li mpoka oyendji oya thikama unene maanona yosikola.Opolisi opo ya li na kapwa li ompito yoku ya dhenga nomamanya. Meya gwOndoolopa ya Kahao, tate David Uuzombala Isai, naye okwa gandja ombedhi kAakwaRDP mbaka. Ta ti oyo haye ya taya hindi nokupiyaganeka onkalo. Omusamane Isai ta ti, nokuli, oye a ninga onkambadha onene yokukelela yaa ponokelwe kaanona yaanasikola mboka ya li mpoka noya li ya hala oku ya ponokela. ‘ Kutya okwa tidhwa mo mOkaho, tse katu shi shi,’ Meya gwa Kahao tate Isai ta ti ngawo.