RDP ta ningwa nayi kOswapo mOhangwena

POKONGO PETHIMBO ta popitha oshigongi shoRDP pOkongo moHangwena, Amushanga gwo RDP moHangwena omusamane Timotheus Shikongo, okwa ti kutya RDP ota longo neitulomo nonuudhiginini , ashike nee oku li ta ningwa nayi, ta longithwa nuudhigu nokuhepewa nayi unene kOswapo.

Omusamane Shikongo ta ti, Oswapo nEpangelo moHangwena oku li mo ta kondjo nokutilitha nokuthiminika aawiliki, iilyo naayambidhidhi yo RDP, unene tuu momikunda moka. Swapo ta tuku, ta sheke, ta dhenge nokuningila iilyo naayambidhidhi yoRDP omatilitho noku yi dhenga. ‘ Ongundu yOswapo oyi na onyanya. Yo yi na oukoloni wu vulithe anuwa woombulu dha li moshilongo muka, ‘ tate Shikongo ta ti ngawo. ‘Oombulu hwepo ku Swapo. Swapo oomululu noonkondo,’ omusamane Shikongo ta ti ngawo. Ta ti RDP okwa li e na ehalalye ewanawa mOkongo moka, ndele te li yekwa kOswapo. Ta ti Swapo a ende nokukengelela pampango ndele ta kutha RDP ehala lye. Nande ongawo, Shikongo ta ti, nayo oya ya kompango yi ka tale nokukonaakona ekuthopo lyehala lyawo kOswapo ngele oshi li tuu shili pampango nenge ahawe.’Swapo ota longitha ooyene yomikunda kaatu ye mo momikunda dhawo tu ka lombwele oshigwana omalakalano gOngundu yetu yo RDP. Te tu kelele twaa ye pomahala gamwe mIikandjohogololo nomomikunda moka. Ano ta longo naanaa ngashi Epangelo lyoombulu lya li ta li longo pethimbo lyuukoloni. Swapo naye osho ta longo ngawo. Oshilongo naantu yamo otaya ende taya tilithwa kOswapo. RDP ta ende ta tilithwa nokuningilwa omatilitho nomathiminikotilitho kookaansela dhimwe dhOswapo noshowo kAapongololi yOswapo yamwe moshitopolwa nomIikandjohogololo moka. Aantu yetu ya dhengwa kOshaango hoka noshowo kEpoli nokOshali. Aantu yetu taya uhala taya ningilwa iiyulilo. Omapandela getu taga fikwa po nokukuthwa ko komiti,omanga Swapo a kutha ko evi alihe, omiti adhihe a tsilika ko omapandela ge ye, ta kutha ko getu noku ga fika po,’ omusamane Shikongo ta ti ngawo nokutsikila ko ta ti kutya mOhangwena omwa mona iihuna.Mu na oluhepo olunene lwiinima oyindji,oshoka EpangelolyOswapo itali longo mo sha,olya mwena ashike.’Ngashi Okongo,oshitopolwa sha mona iihuna pethimbo lyiita yekondjelomanguluko. Aakalimo ya kondja nokuhepekwa omolu ekondjelomanguluko, nomuntu owa li nee wa tegelela kutya osho oshitopowla shotango shomu Namibia tashi ka talika ko tango nokuningilwa ngaa omauwanawa mEpangelo lyOswapo. Ashike hasho sha ningwa kEpangelo lyOswapo.Olya yi ashike koshipundi nokudhimbwa aantu ngashi Aakongo mbaka ya hepekelwa emanguluko lyoshilongo shika Namibia,’omusamane Shikongo ta ti ngawo nokugwedha po kutya oshitopolwa sha Kongo, oshi na enota noonkondo. Kashi na Iipangelo nooklinika, Oosikola ndhoka dhi li po aalongiskola naanasikola oye li po taya hepa. Aalongisikola kaye na omagumbo oyi itungila uundunda womwiidhi owo omagumbo gawo. Kamu na omalusheno noondjila. Ta ti ngashi etungululo lyondjila onene ya Elundu noRundu ndjoka tayi tungululwa okupitila mOkongo, Epangelo lyOswapo olye yi tameke ashike, sho RDP e yi popi, ngeno inayi tamekwa okutungwa nokutulwa oteya ngashi ya tamekiwa nayo pethimbo ndika. Shikongo ta ti, oshigwana sha Namibia nashi pandule RDP, oshoka oyo tayi hingi Swapo nEpangelo lye a kale ta tameke okutunga oondjila ngeyi nosho tuu. Ta ti oshili,oshitopolwa sha Kongo osha ethiwa nayi ngele tashi ya kehumokomeho miinima yi ili noyi ili. Unene tuu melongo, muuhaku, megandjo lyomeya nolusheno noshowo metungo lyoondjila. Ta ti aanuuvu otaya ende iinano iile meefuka moka komalupadhi okuya kIipangelo, unene tuu mboka ye li kepango otaya nana nondatu noonkondo okuthika kUupangelo wontumba mboka wu li po nowiili kokule noonkondo. Otaya ende wo oondjila oonde okuthika kOshipangelo shimwiike shoka shi li mOshikandjohogololo. ‘ Omupresidende Omusimanekwa gwo RDP, ngele otwe ku hogolola, ngele oshigwana oshe ku hogolola, ka kandule po omaudhigu noompumbwe ndhika,’ omusamane Shikongo ta lombwele oshigongi.