RDP otaka nyanya mOndangwa mehuliloshiwike ndika

ORALLY for Democracy and Progress (RDP) mehuliloshiwike ndika twa thinda otaka kala nomaashinga (Road Show) onene mOndangwa nomomudhingoloko; Oshilyo shomOmutimangundu gwo RDP Ismael Shailemo ta ti ngawo.

Omusamane Shailemo ta ti omaashinga onene ndjika, tayi kwatelwa komeho kOpolisi nokAawiliki yOpashitopolwa yo RDP, otayi ka tameka pokamwandi ka Nandjokwe pOniipa moshitopolwa sha Shikoto, notayi kiihanena nOndangwa nomudhingoloko aguhe gwa Ndangwa.’Elalakano okuulikila oshigwana kutya RDP okwe ya a tsima ko nokweya okukalelela,’tate Shailemo ta ti ngawo nokutsikila ko ta ti mehuliloshiwike olyo tuu ndyoka otaya ka kala nEyotho lyOnyama lya dhengambanda, tali ningilwa pegumbo lye mOluno mOndangwa. Oshinima sha simana, osho shoka, tate Shailemo ta ti, okukatula wo miilonga uungalo uupe womaimbilo gOngundu yo RDP, mboka tau ka longithwa unene pethimbo lyIikonga yOmahogololo gOpauperesidende nogIilyo yOshigongi shoPashigwana ngoka taga ka kala ko meti 27 sigo 28 Novemba 2009.Shailemo okwa lombwela wo The Namibian kutya RDP okwa tokola toko okuya mokati koshigwana noku shi uvitha ko omalalakano ge. Ta ti okuza nee mpaka otaya ka longekidha po oshigongi oshinenenene, tashi ka ningilwa mOshakati sha Nangombe moShana noshowo koMusati nokuya ishewe ya ninge iigongi yawo iinenenene moHangwena, pEenhana noshowo mwaashoka sha Shikoto mOmuthiya nenge ngaa pehala opo tali ka tseyithwa.