RDP ota ka opelaka tango elongo ngele okwa yi koshipundi

SHAMPA ashike opaati yo RDP a hogololwa koshigwana nomake ogendji e ta ningi Epangelo, ota ka tameke tangotango newapaleko lyelongo lyoshigwana shokomongula sha Namibia, gumwe gwomaawiliki aakuluntu yOpaati ndjika osho a popi okuya pehulilo lyomumvo gwa zi ko.

Omusamande Kandy Nehova, ngoka e li oshilyo shOngundumutima yo RDP okwa ti kutya Oosikola dhIikunino (Ookinde) otadhi ka ninga dhEpangelo. Uunona mOosikola itau ka futa we Osikola ngashi tashi ningwa pethimbo ndika kohi yEpangelo lyoSwapo. NAMCOL otaye ke yi kutha po thiluthilu molwashoka oyi li Okampani yaantu yamwe aayamba nale ye na mo iiyipambuliko nohaya li mo oshimaliwa shoka tashi futilwa aanasikola kaakuluntu yawo, mboka ye li aathigona lela nokuli.
Nehova shika okwe shi popi pethimbo a li ta popitha oshigongi shopaati yawo pOnangwe meti: 27 Desemba 2008. Okwa ti ngashi nuumvo aanasikola oyendji ya ndopa noya thinda nee kONAMCOL, ooyene ya NAMCOL oya panda sho taya ka mona iimaliwa oyindji. ‘Iimaliwa mbyoka ohayi futwa kaavali aathigona nokaakuluntu yaanona mboka, ye li moluhepo olunene, ihe Epangelo lyOswapo kali sa ohoni, otali etha oohepele dhi thipwe ombinzi kaayamba mboka ye na iiyipambuliko moNAMCOL,’ Nehova ta ti ngawo nokugwedha po kutya mEpangelo lya RDP itamu ka kala NAMCOL nande esiku limwe, otaye ke mu kutha po thiluthilu.
Ta ti aahona ya NAMCOL, uunona wawo hamo wu li moka, ou li tau mono elongo ewanawa ko South Africa nosho tuu kulwe muuyuni. Nehova ta ti kutya Oswapo nEpangelo lyayo kayi na we iimaliwa yokutungitha Oosikola, oshoka oya yakwa po, yo ya mwena ashike itayi landula mboka ye yi yaka po.
‘Tse ngele otwa yi koshipundi otatu ka landula mboka ya yaka po iimaliwa yEpangelo, ndele taye yi galula, yi longe muuwanawa woshigwana ashihe, ‘ Nehova ta popi. Okwa gwedha po ta ti kutya pethimbo ndika mOosikola kamu na omambo. Aanona yosikola kaye na we omambo ga gwana notaya nana nondatu.
Taya uhala taya topola embo limwe, ye li yatano nenge yahetatu.Kombinga yomeya, Nehova okwa ti kutya Epangelo lyOswapo kali shi kupulanda, molwashoka ngele olya li li shi kupulanda ngeno omeya gefundja ngoka ga li muka ogendjigendji petameko lyomvula 2008, inaga fadhuka po nokukana ngashi ga kana ngashiingeyi.
Ta ti ngeno Epangelo olya fulile oondama, omatale omanene ndele tamu tondokele omeya ngoka, ngeno katu na ompumbwe yomeya moshilongo nenge moshitopolwa shika shomoNooli. Okwa ti ngele RDP okwa ningi Epangelo, otaka tunga oondama, omatale omanene gokukwata omeya ndele oshigwana tashi kala sha za mo mompumbwe yomeya.
Kombinga yUuhaku, Nehova, okwa ti kutya Epangelo lya Swapo olya nyengwa thiluthilu okugandja uuhaku wu li nawa nowongushu koshigwana okuzilila mIipangelo yEpangelo. Nehova ta ti kutya omiti mIipangelo kadhi mo we.
Iikwaniipangitho oyindji yopauhaku mIipangelo nomOoklinika kayi mo we. Omiti nee ndhoka dhongushu itadhi popiwa we nee nokuli. Nehova ta ti ngele owa yi mIipangelo yEpangelo moka oto pewa ashike shapo oopanado. Omuwiliki mo RDP nguka ta ti kutya RDP ngele okwa yi koshipundi otaka eta uuhaku wiihwapo mokati koshigwana.
Ta ti otaya ka tunga Ofaabulika onene yomiti moNamibia opo Namibia kaa kale we
mompumbwe yomiti, unene tuu ndhoka dhongushu, ngashi e li mo pethimbo ndika lyElelo lyoSwapo.